ଶନିବାର ବଲାଙ୍ଗୀର ଜିଲ୍ଲାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ୨୭ଟି ପ୍ରକଳ୍ପର ଶିଳାନ୍ୟାସ କରିବା ସହିତ ଶୁଭ ଉଦଘାଟନ କରିଛନ୍ତି । ସେଥିମଧ୍ୟରେ ବହୁ ପ୍ରତିକ୍ଷିତ ୨୫ କିଲୋମିଟର ଦୈର୍ଘ୍ୟ ବିଶିଷ୍ଚ ଲାନ୍ଥ ଜଳସେଚନ ପ୍ରକଳ୍ପର ଭିତ୍ତି ପ୍ରସ୍ତର ସ୍ଥାପନ କରାଯାଇଛି । ମୋଟରେ ୬୧୧ କୋଟି ଟଙ୍କା ବ୍ୟୟବରାଦରେ ସଡ଼କ, ଗ୍ରାମ୍ୟ ଉନ୍ନୟନ ପ୍ରକଳ୍ପ, ଭିନ୍ନକ୍ଷମ ସଶକ୍ତିକରଣ ଆଦି ପ୍ରକଳ୍ପର ଭିତ୍ତି ପ୍ରସ୍ତର ସ୍ଥାପନ କରାଯାଇଛି । ପ୍ରକଳ୍ପର ଶିଳାନ୍ୟାସ ଏବଂ ଉଦଘାଟନ ଆମେ କରିବୁ ବୋଲି ଦୃଢ଼ୋକ୍ତି ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ।
ମୁଖ୍ୟମନ୍ତ୍ରୀ କହିଛନ୍ତି ଯେ ବେଲପଡ଼ାର ଲାନ୍ଥ ଜଳସେଚନ ପ୍ରକଳ୍ପକୁ ସମୟ ସୀମା ମଧ୍ୟରେ ଶେଷ କରି ଉଦଘାଟନ କରିବାକୁ ସେ ପ୍ରତିଶ୍ରୁତି ଦେଇଛନ୍ତି । ବଲାଙ୍ଗିରରେ ବର୍ଷିଛନ୍ତି ମୋହନ । ୧୯୯୮ ମସିହାରେ ଲୋୟର ସୁକତେଲ ପ୍ରକଳ୍ପର ଘୋଷଣା ହୋଇଥିଲା । ୨୦୦୦ ମସିହାରେ ଭିତ୍ତି ପ୍ରସ୍ତର ସ୍ଥାପନ କରାଯାଇଥିଲା । ମାତ୍ର ସେଥିରେ କେତେ ଜଳ ଆପଣ ପାଉଛନ୍ତି ତାହା ଜାଣି ଥିବେ । ଯଦି ଘୋଡ଼ାକୁ ଘାସ ଜଗାଇବା ତାହା ସୁରକ୍ଷିତ ରହିବ ନାହିଁ । ସେହିପରି ଲୋୟର ସୁକତେଲ ପ୍ରକଳ୍ପକୁ ୨୪ ବର୍ଷ ବିତି ଯାଇଥିଲେ ମଧ୍ୟ ପାଣି ପାଇ ପାରିଲେ ନାହିଁ । କାରଣ ସେ ଟଙ୍କାକୁ ମାଳ ମାଳ କୋଠା, ପ୍ଲଟ୍, ସୁନା, ଗହଣା କିଣିବାରେ ଖର୍ଚ୍ଚ କରାଗଲା, ତେଣୁ ପାଣି ଆସିବ କେଉଁଠୁ । କିନ୍ତୁ ସେ ଭୁଲ ଆମ ସରକାର କରିବ ନାହିଁ । ଆମେ କହିବୁ ଏବଂ କରିବୁ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ସେହିପରି ଏ ସରକାର ଚାଷୀଙ୍କ ଉନ୍ନତି ପାଇଁ ପ୍ରତିଶ୍ରୁତି ବଦ୍ଧ । ଏହି ଜଳ ସେଚନ ପ୍ରକଳ୍ପ ଚାଷୀଙ୍କୁ ସୁଦୃଢ଼ କରିବ । ଉଭୟ ଖରିଫ ଏବଂ ରବି ଫସଲକୁ ଜଳ ସେଚନ କରାଯିବ । ଏହା ଦ୍ୱାରା ୨୫ଟି ଗ୍ରାମର ୩୮ ହଜାର ଚାଷୀ ଲାଭ ପାଇବେ । ଚାଷୀର ଉନ୍ନତି ସର୍ବାଗ୍ରେ ବୋଲି ମୁଖ୍ୟମନ୍ତ୍ରୀ କହିଛନ୍ତି । ଏହି କାର୍ଯ୍ୟକ୍ରମରେ, ଉପ ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ, ବଲାଙ୍ଗୀର ସାଂସଦ ସଙ୍ଗୀତା ସିଂହଦେଓ, ସ୍ୱାସ୍ଥ୍ୟ ଓ ପରିବାର କଲ୍ୟାଣମନ୍ତ୍ରୀ ଡଃ ମୁକେଶ ମହାଲିଙ୍ଗ ଓ ବିଧାୟକ ଲକ୍ଷ୍ମଣ ବାଗ ପ୍ରମୁଖ ଉପସ୍ଥିତ ଥିଲେ ।
