୧୨୭୯୦କୋଟିର ଅତିରିକ୍ତ ବଜେଟ୍
ବିଜୁ ସ୍ୱାସ୍ଥ୍ୟ କଲ୍ୟାଣ ପାଇଁ ୨୦୭୫କୋଟି
ଭୁବନେଶ୍ୱର : ନିର୍ବାଚନୀ ବର୍ଷରେ ରାଜ୍ୟ ସରକାର ୧୨,୭୯୦ କୋଟି ଟଙ୍କାର ଅତିରିକ୍ତ ବଜେଟ୍ ଆଗତ କରିଛନ୍ତି । ଫଳରେ ୨୦୧୮-୧୯ ମସିହାରେ ରାଜ୍ୟର ମୋଟ ବଜେଟ୍ ୧ଲକ୍ଷ ୩୨ହଜାର ୮୧୮କୋଟି ଟଙ୍କା ଛୁଇଁଛି । ଯାହାକି ଗତବର୍ଷର ମୋଟ ବଜେଟ୍ ତୁଳନାରେ ୧୦ ପ୍ରତିଶତ ଅଧିକ ବୋଲି ଜଣାପଡ଼ିଛି ।
ରାଜ୍ୟ ସରକାର ନିଜସ୍ୱ ଯୋଜନା ‘ବିଜୁ ସ୍ୱାସ୍ଥ୍ୟ କଲ୍ୟାଣ’ ଓ ଖାଦ୍ୟ ସୁରକ୍ଷା ଯୋଜନା ପାଇଁ ପାଣ୍ଠି ବରାଦ କରିବା ସହ ଏକସଙ୍ଗେ ନିର୍ବାଚନ ପାଇଁ ୪୧ କୋଟି ଟଙ୍କା ବ୍ୟୟବରାଦ କରି ନିର୍ବାଚନ ପ୍ରସଙ୍ଗରେ ରାଜ୍ୟ ସରକାରଙ୍କ ଆଭିମୁଖ୍ୟକୁ ସ୍ପଷ୍ଟ କରାଇଛନ୍ତି । ଏହା ସହିତ ନୂଆ ଯୋଜନା ‘ବିଜୁ ଗାଁ’ ପାଇଁ ୭୫କୋଟିର ବନ୍ଦୋବସ୍ତ କରିଛନ୍ତି ।
ବିରୋଧୀଙ୍କ ହଟ୍ଟଗୋଳ ମଧ୍ୟରେ ବିଧାନସଭାରେ ଆଜି ଅର୍ଥମନ୍ତ୍ରୀ ଶଶୀଭୂଷଣ ବେହେରା ଅତିରିକ୍ତ ବଜେଟକୁ ଆଗତ କରିଥିଲେ । ଏହି ଅତିରିକ୍ତ ବଜେଟ୍ ସହ ୨୦୧୮-୧୯ ଆର୍ଥିକ ବର୍ଷର ମୋଟ ବଜେଟ ୧,୩୨,୮୧୮କୋଟି ଟଙ୍କାକୁ ଛୁଇଁଛି । ଅତିରିକ୍ତ ବଜେଟ୍ରେ କାର୍ଯ୍ୟକ୍ରମ ବ୍ୟୟ ବାବଦରେ ୯୬୧୧ କୋଟି ଟଙ୍କା, ପ୍ରଶାସନିକ ବ୍ୟୟ ପାଇଁ ୧୮୦୦କୋଟି ଟଙ୍କା, ବିପର୍ଯ୍ୟୟ ପ୍ରଶମନ ପାଣ୍ଠି ବାଦରେ ୧୩୬୪ କୋଟି ଟଙ୍କାର ବ୍ୟୟବରାଦ ହୋଇଛି ।
ନିର୍ବାଚନକୁ ଦୃଷ୍ଟିରେ ରଖି ରାଜ୍ୟ ସରକାରଙ୍କ ସହରାଂଚଳ ବସ୍ତିବାସିନ୍ଦାଙ୍କ ଭୋଟକୁ ହାତେଇବା ପାଇଁ ଆରମ୍ଭ କରିଥିବା ‘ଜାଗା ମିଶନ’ ପାଇଁ ୧୦୦କୋଟି ଟଙ୍କାର ବ୍ୟୟବରାଦ କରିଥିବାବେଳେ ନୂଆ ଯୋଜନା ‘ବିଜୁ ଗ୍ରାମ ଯୋଜନା’ରେ ୭୫କୋଟି ଟଙ୍କାର ବ୍ୟବସ୍ଥା କରିଛନ୍ତି । ଗ୍ରାମାଂଚଳରେ ଭିତିଭୂମି ସୁଧାର ପାଇଁ ୫୨୭୬ କୋଟି ଟଙ୍କାର ବ୍ୟୟବରାଦ କରିଥିବାବେଳେ ଏଥିରେ ବସୁଧା ଯୋଜନାରେ ପାନୀୟ ଜଳ ଯୋଗାଣ ପାଇଁ ୪୦୦କୋଟି ଟଙ୍କା, ବିଜୁ ପକ୍କାଘର ପାଇଁ ୧୫୦୦କୋଟି ଓ ସ୍ୱଚ୍ଛ ଭାରତ ମିଶନ ପାଇଁ ୧୦୦କୋଟି, ଏନଆରଜିଏସ୍ ପାଇଁ ୨୧୧ କୋଟି, ମୁଖ୍ୟମନ୍ତ୍ରୀ ଗ୍ରାମ୍ୟ ସଡ଼କ ଯୋଜନା ପାଇଁ ୫୦କୋଟି ଓ ଗ୍ରାମାଂଚଳର ସଡ଼କ ଓ ପୋଲ ଉନ୍ନତିକର ପାଇଁ ୫୦କୋଟି ଟଙ୍କା ସାମିଲ ରହିଛି ।
ସେହିପରି ଆମ ଘର ଏଲଇଡି ଯୋଜନାରେ ୧୦୦କୋଟି ଓ ଶିକ୍ଷା ସହାୟକଙ୍କୁ ସ୍ଥାୟୀ ନିଯୁକ୍ତି ବାବଦରେ ୭୫୦କୋଟି ଟଙ୍କାର ବନ୍ଦୋବସ୍ତ କରିଛନ୍ତି । ଋଣ ପାଇଁ ସୁଧ ପରିଶୋଧ ବାବଦରେ ୩୫୦କୋଟି ଟଙ୍କା ମଧ୍ୟ ବ୍ୟୟବରାଦ କରିଛନ୍ତି ।
୨୦୧୮-୧୯ ଆର୍ଥିକ ବର୍ଷ ପାଇଁ ୧୨,୭୯୦ କୋଟି ଟଙ୍କାର ଅତିରିକ୍ତ ବଜେଟକୁ ଆଜି ବିଧାନସଭାରେ ଉପସ୍ଥାପନ ପରେ ଏକ ସାମ୍ବାଦିକ ସମ୍ମିଳନୀରେ ରାଜ୍ୟ ଅର୍ଥ ସଚିବ ତୁହିନକାନ୍ତ ପାଣ୍ଡେ କହିଛନ୍ତି ଯେ, ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ହେଉଛି ଏକ ଅମ୍ବ୍ରେଲା ଯୋଜନା । ଏଥିରେ ନିରାମୟ, ନିଦାନ ଓ ସହାୟ ଯୋଜନାକୁ ସାମିଲ କରାଯାଇଛି । ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ପାଇଁ ଚଳିତବର୍ଷ ମୋଟ ୨୦୭୫ କୋଟି ଟଙ୍କା ବ୍ୟୟ ହେବ । ଏଥିରେ ୧୩୭୫ କୋଟି ଟଙ୍କା ରାଜ୍ୟ ସରକାର ଓ ୭୦୦କୋଟି ଟଙ୍କା କେନ୍ଦ୍ର ସରକାର ବହନ କରିବେ ।
