ଭୁବନେଶ୍ୱର(ଓଡବ୍ଲ୍ୟୁ): ରାଜ୍ୟର ୬ଲକ୍ଷ ମହିଳା ସ୍ୱୟଂ ସହାୟକ ଗୋଷ୍ଠୀ(ଏସଏଚଜି)କୁ ସ୍ମାର୍ଟଫୋନ୍ ଯୋଗାଇ ଦିଆଯିବ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିଛନ୍ତି ।
ମେକ୍ ଇନ୍ ଓଡ଼ିଶା କନକ୍ଲେଭରେ ଆଜି ମହିଳା ଉଦ୍ୟୋଗୀଙ୍କ ପାଇଁ ଆୟୋଜିତ ଏକ ସମ୍ମିଳନୀରେ ଯୋଗ ଦେଇ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କହିଛନ୍ତି ଯେ ରାଜ୍ୟର ପ୍ରତ୍ୟେକ ମହିଳା ଜ୍ଞାନ ଅର୍ଥନୀତିର ସୁଯୋଗ ପାଆନ୍ତୁ । ସ୍ମାର୍ଟଫୋନ୍ ମାଧ୍ୟମରେ ସେମାନଙ୍କୁ ଡିଜିଟାଲ ସଶକ୍ତିକରଣ କରିବା ପାଇଁ ଲକ୍ଷ୍ୟ ରଖାଯାଇଛି । ରାଜ୍ୟରେ ୨୦୦୧ ମସିହାରୁ ମିଶନ ଶକ୍ତି କାର୍ଯ୍ୟକ୍ରମ ଆରମ୍ଭ ହୋଇଛି । ଏବେ ଏହା ଏକ ବିରାଟ ଆନ୍ଦୋଳନରେ ପରିଣତ ହୋଇଛି । ୬ଲକ୍ଷ ଗ୍ରୁପ୍, ୭୦ଲକ୍ଷ ମହିଳା ଓ ୫ହଜାର କୋଟି ଟଙ୍କାର ସଂଚୟ ସମ୍ଭବପର ହୋଇପାରିଛି । ବାର୍ଷିକ ପ୍ରାୟ ୨ହଜାର କୋଟି ଟଙ୍କାର କାରବାର ଏହି ଗ୍ରୁପ୍ କରୁଛନ୍ତି । ରାଜ୍ୟର ଏପରି କୌଣସି ଗାଁ କିମ୍ବା ପଡ଼ା ନାହିଁ ଯେଉଁଠି ମହିଳା ଏସଏଚଜି ନାହିଁ । ରାଜ୍ୟର ପ୍ରତି ଦ୍ୱିତୀୟ ପରିବାରର କେହିନା କେହି ମିଶନ ଶକ୍ତିର ସଦସ୍ୟ ଅଛନ୍ତି । ମାତୃ ମୃତ୍ୟୁହାର ସର୍ବାଧିକ ହ୍ରାସ କରି ଓଡ଼ିଶା ସବୁଠୁ ଆଗରେ ରହିଛି । ମହିଳାମାନଙ୍କ ସମ୍ପତି ମାଲିକାନା ଓଡ଼ିଶାରେ ସର୍ବାଧିକ । ସର୍ବୋପରି ବ୍ୟକ୍ତିଗତ ଭାବରେ ମୋ’ ପାଇଁ ସବୁଠୁ ସନ୍ତୋଷଜନକ କଥା ହେଉଛି ଆମ ରାଜ୍ୟରେ ଜନ୍ମ ନେଉଥିବା ପ୍ରତ୍ୟେକ ମହିଳାଙ୍କ ଆୟୁଷରେ ହାରାହାରି ୧୦ବର୍ଷ ବୃଦ୍ଧି ଘଟୁଛି ।
