ନୂଆଦିଲ୍ଲୀ: ଆଫଗାନିସ୍ତାନରେ ତାଲିବାନିଙ୍କ ରାଜୁତି ଘଟଣାକୁ ନେଇ ବର୍ତ୍ତମାନ ଦେଶରେ ବାକଯୁଦ୍ଧ ଜୋର ଧରିଛି । କିଛି ରାଜନୈତିକ ଦଳ ତାଲିବାନକୁ ସମର୍ଥନ କରୁଥିବା ବେଳେ ଆଉ କିଛି ବିରୋଧ କରି ତାଲିବାନୀ ସମର୍ଥକଙ୍କୁ ଘୋର ବିରୋଧ କରିଆସୁଛନ୍ତି। ତେବେ ଏହାରି ମଧ୍ୟରେ ଏଆଇଏମ୍ଆଇଏମ୍ ମୁଖ୍ୟ ଅସଦୁଦ୍ଦିନ ଓୱେସି ଆଫଗାନିସ୍ତାନର ପରିସ୍ଥିତି ସମ୍ପର୍କରେ କେନ୍ଦ୍ର ସରକାରଙ୍କ ଉପରେ ବର୍ଷିଛନ୍ତି। ଓୱେସି ଗୁରୁବାର ବିଳମ୍ବିତ ରାତିରେ ଏକ କାର୍ୟ୍ୟକ୍ରମରେ କହିଛନ୍ତି ଯେ ଆଫଗାନିସ୍ତାନର ମହିଳାମାନଙ୍କ ପାଇଁ ଭାରତ ଅଧିକ ଚିନ୍ତିତ ହୋଇ ପଡ଼ିଛନ୍ତି । କିନ୍ତୁ ଭାରତରେ ମହିଳାମାନେ ଯେ ଅସୁରକ୍ଷିତ ତାହା ଉପରେ କେବେ ଚିନ୍ତା ପ୍ରକଟ କରିନାହାନ୍ତି ।
ଓୱେସି ଆହୁରି ମଧ୍ୟ କହିଛନ୍ତି ଯେ ଭାରତରେ ପ୍ରତି ୯ଟି ଝିଅ ପିଲାଙ୍କ ମଧ୍ୟରୁ ଜଣେ ପାଞ୍ଚ ବର୍ଷରୁ କମ୍ ମୃତ୍ୟୁ ମୁଖରେ ପଡ଼ୁଛନ୍ତି। ଦେଶରେ ମହିଳାଙ୍କ ପ୍ରତି ଅପରାଧ ଏବଂ ବଳାତ୍କାର ମାମଲା ବୃଦ୍ଧି ପାଇଛି, କିନ୍ତୁ ଆଫଗାନିସ୍ତାନରେ ଫସି ରହିଥିବା ମହିଳାଙ୍କ ବିଷୟରେ ଆମେ ଅଧିକ ଚିନ୍ତିତ। ଆଫଗାନିସ୍ତାନରେ ମହିଳାଙ୍କ ସହ କ’ଣ ଘଟୁଛି ସେଥିପାଇଁ ସରକାର ଚିନ୍ତିତ ବୋଲି ସେ କହିଛନ୍ତି। ଏଠାରେ କଣ ସେହିଭଳି ଘଟୁନାହିଁ ବୋଲି ସେ ପ୍ରଶ୍ନ କରିଛନ୍ତି ।
ଏହା ସହିତ ଏଆଇଏମ୍ଆଇଏମ୍ ମୁଖ୍ୟ ଅସଦୁଦ୍ଦିନ୍ ଓୱାଇସି କହିଛନ୍ତି ଯେ ତାଲିବାନର ଆଫଗାନିସ୍ତାନକୁ କବଜା କରି ପାକିସ୍ତାନ ଅଧିକ ଲାଭ କରିଛି। ବିଶେଷଜ୍ଞମାନେ କହିଛନ୍ତି ଯେ ଅଲ କାଏଦା ଏବଂ ଅନ୍ୟ ଆତଙ୍କବାଦୀମାନେ ଆଫଗାନିସ୍ତାନର କିଛି ଅଞ୍ଚଳରେ ପହଞ୍ଚିଛନ୍ତି। ଆତଙ୍କବାଦୀ ସଂଗଠନ ଆଇଏସଆଇ ହେଉଛି ଭାରତର ଶତ୍ରୁ । ସେ ଆହୁରି କହିଛନ୍ତି ଯେ ଆଇଏସଆଇ ତାଲିବାନକୁ ନିୟନ୍ତ୍ରଣ କରେ ଏବଂ ଏହାକୁ ଏକ କାଠ କଣ୍ଡେଇ ରୂପେ ବ୍ୟବହାର କରେ ବୋଲି ସେ କହିଛନ୍ତି।
