ଭୁବନେଶ୍ୱର : ବିଜେଡିରେ ଏବେ ଦଳଡିଆଁଙ୍କୁ ଅଧିକ ଗୁରୁତ୍ୱ ମିଳୁଛି । ଦଳରେ ଦୀର୍ଘବର୍ଷ ଧରି ପଡ଼ିରହିଥିବା କର୍ମୀ ଓ ସଂଗଠକମାନଙ୍କୁ ଅଣଦେଖା କରାଯାଇ ଯେଉଁମାନେ ଅନ୍ୟ ଦଳ ଛାଡ଼ି ଆସିଛନ୍ତି ସେମାନଙ୍କୁ ଅପେକ୍ଷାକୃତ ପ୍ରାଧାନ୍ୟ ଦିଆଯାଉଥିବା ଜଣାପଡ଼ିଛି । ଦଳ ପକ୍ଷରୁ ଆଜି ନିଆଯାଇଥିବା ନିଷ୍ପତିରୁ ଏହା ସ୍ପଷ୍ଟ ପ୍ରମାଣିତ ହୋଇଛି ।
ବିଜେଡି ପ୍ରେସ୍ ରିଲିଜ୍ ଅନୁସାରେ ‘ଆମ ଓଡ଼ିଶା ପାର୍ଟି’ ଛାଡ଼ି ବିଜେଡିରେ ସାମିଲ ହୋଇଥିବା ସୌମ୍ୟରଞ୍ଜନ ପଟ୍ଟନାୟକ, କଂଗ୍ରେସରୁ ଆସିଥିବା ଚନ୍ଦ୍ରଶେଖର ସାହୁ ଓ ଅଚ୍ୟୁତ ସାମନ୍ତଙ୍କୁ ଏବେ ଦଳ ପକ୍ଷରୁ ଗୁରୁଦାୟିତ୍ୱ ନ୍ୟସ୍ତ ହୋଇଛି । ସୌମ୍ୟ ଓ ଅଚ୍ୟୁତଙ୍କୁ ପୂର୍ବରୁ ରାଜ୍ୟସଭାକୁ ପଠାଇ ଦଳର ଅନ୍ୟ ଯୋଗ୍ୟ ନେତାମାନଙ୍କୁ ଉପେକ୍ଷିତ କରିଥିବା ବିଜେଡି ଆଜି ଅଚ୍ୟୁତଙ୍କୁ କନ୍ଧମାଳ ଓ ମୟୂରଭଞ୍ଜ ଜିଲ୍ଲାର ସହ-ପର୍ଯ୍ୟବେକ୍ଷକ ଭାବେ ନିଯୁକ୍ତ କରିଛି । ରାଜନୀତି ଓ ସାଂଗଠନିକ ଦକ୍ଷତା ନଥିବା ଅଚ୍ୟୁତଙ୍କୁ ଏହି ଦୁଇ ଜିଲ୍ଲାର ଦଳୀୟ କର୍ମୀ ଓ ନେତାମାନେ କିଭଳି ଗୁରୁତ୍ୱ ଦେବେ ତଥା ଅଚ୍ୟୁତ କେଉଁ ଢଙ୍ଗରେ ସେମାନଙ୍କ ସହ ମିଶିବେ ତାକୁ ନେଇ ପ୍ରଶ୍ନ ଉଠିଲାଣି । ସେହିପରି ୨୦୧୯ ସାଧାରଣ ନିର୍ବାଚନକୁ ଦୃଷ୍ଟିରେ ରଖି ଦଳ ମହାନଦୀ ଓ ପୋଲାଭରମ୍କୁ ପ୍ରସଙ୍ଗ କରିବାକୁ ଚାହୁଁଥିବାରୁ ଆଜି ଏକ ଷ୍ଟିଅରିଂ କମିଟି ଗଠନ କରିଛି । ଏଥିରେ ଦଳର ଦୁଇ ବରିଷ୍ଠ ଉପସଭାପତି ପ୍ରସନ୍ନ ଆଚାର୍ଯ୍ୟ ଓ ଦେବୀପ୍ରସାଦ ମିଶ୍ରଙ୍କ ସମେତ ସୌମ୍ୟରଞ୍ଜନ ପଟ୍ଟନାୟକ ଓ ଚନ୍ଦ୍ରଶେଖର ସାହୁଙ୍କୁ ଷ୍ଟିଅରିଂ କମିଟିର ସଦସ୍ୟ ଭାବେ ସାମିଲ କରିଛି । ଦଳଡିଆଁ ନେତାଙ୍କ ଉପରେ ବିଜେଡି ସୁପ୍ରିମୋଙ୍କ ମାତ୍ରାଧିକ ଆସ୍ଥାକୁ ନେଇ ଏବେ ଦଳ ଭିତରେ ଅସନ୍ତୋଷ ସୃଷ୍ଟି ହୋଇଛି । ସୌମ୍ୟ ଏପର୍ଯ୍ୟନ୍ତ ନିଜର ‘ଆମ ଓଡ଼ିଶା ପାର୍ଟି’ର ବିଲୟ ବିଜେଡିରେ କରିନଥିବାବେଳେ ତାଙ୍କୁ ଦଳୀୟ ସଂଗଠନରେ ଏଭଳି ଗୁରୁତ୍ୱ ଦେବା ପଛରେ କ’ଣ କାରଣ ତାକୁ ନେଇ ପ୍ରଶ୍ନ ଉଠିଛି ।
ଅନ୍ୟପକ୍ଷରେ ଦଳର ଜଣେ କର୍ମକର୍ତା ଏହି ନିଯୁକ୍ତି ପ୍ରସଙ୍ଗରେ ସପକ୍ଷରେ ଯୁକ୍ତି ବାଢ଼ି କହିଛନ୍ତି ଯେ, ଯେହେତୁ ଉକ୍ତ ଦୁଇଜଣଙ୍କୁ ରାଜ୍ୟସଭା ପଠାଯାଇଛି,ସେମାନଙ୍କୁ ସାଂଗଠନିକ କାର୍ଯ୍ୟରେ ନିୟୋଜିତ କରିବାକୁ ଦଳ ଚାହିଁଛି । ଅବଶ୍ୟ ଅଚ୍ୟୁତଙ୍କର ରାଜନୀତିକ କିମ୍ବା ଦଳୀୟ ସଂଗଠନ ସମ୍ପର୍କରେ କିଛି ଧାରଣା ନାହିଁ । କିନ୍ତୁ ଦଳର ସାଂସଦ ହୋଇଥିବାରୁ ତାଙ୍କର ରାଜନୀତିକ ଦକ୍ଷତାକୁ ସୁପ୍ରିମୋ ମଧ୍ୟ ପରଖିବାକୁ ଚାହୁଁଛନ୍ତି । ସୂଚନାଯୋଗ୍ୟ, ଦୀର୍ଘ ୨୦ବର୍ଷ ଧରି ଦଳ ପାଇଁ କାର୍ଯ୍ୟ କରୁଥିବା ଶତାଧିକ ଆଗଧାଡ଼ିର ନେତାଙ୍କୁ କ୍ରମାଗତ ଭାବେ ଅଣଦେଖା କରାଯାଉଛି । ସେମାନଙ୍କୁ ଦଳୀୟ ସାଂଗଠନିକ ପଦପଦବୀ କିମ୍ବା ରାଜନୀତିକ ପଦପଦବୀରେ ମଧ୍ୟ ଥଇଥାନ କରାଯାଉ ନଥିବାରୁ ସେମାନଙ୍କ ମଧ୍ୟରେ ତୀବ୍ର ଅସନ୍ତୋଷ ଲାଗି ରହିଛି ।
