ଭୁବନେଶ୍ୱର, ରାଜ୍ୟର ବିଭିନ୍ନ ଶିଳ୍ପାନୁଷ୍ଠାନ ଉପରେ ୩୪୪୦କୋଟି ଟଙ୍କାର ଜଳକର ଅନାଦେୟ ହେବା ପ୍ରସଙ୍ଗରେ ଓଡ଼ିଶା ସରକାରଙ୍କୁ ଜାତୀୟ ମାନବାଧିକାର କମିଶନ(ଏନ୍ଏଚ୍ଆରସି) ନୋଟିସ୍ ଜାରି କରିଛନ୍ତି । ରାଜ୍ୟ ମୁଖ୍ୟ ସଚିବ ଓ ଜଳସମ୍ପଦ ସଚିବଙ୍କୁ ୪ ସପ୍ତାହ ମଧ୍ୟରେ ଏନେଇ କାର୍ଯ୍ୟାନୁଷ୍ଠାନ ରିପୋର୍ଟ ଦାଖଲ ପାଇଁ କମିଶନ ନିର୍ଦ୍ଦେଶ ଦେଇଛନ୍ତି ।
ନଦୀ ଜଳ ଉପଯୋଗ କରୁଥିବା ବିଭିନ୍ନ ଶିଳ୍ପ ସଂସ୍ଥାଠୁ ବର୍ଷ ବର୍ଷ ଧରି ଜଳକର ଆଦାୟ ହେଉନଥିବା ନେଇ ମାନବାଧିକାର କର୍ମୀ ଅଖଣ୍ଡଙ୍କ ଆବେଦନ ଉପରେ କମିଶନ ଏହି ନୋଟିସ୍ ଜାରି କରିଛନ୍ତି । ସେ ତାଙ୍କ ଆବଦେନରେ ଅଭିଯୋଗ କରିଛନ୍ତି ଯେ, ମହାନଦୀ ଓ ବ୍ରାହ୍ମଣୀରୁ ବହୁସଂଖ୍ୟକ ଶିଳ୍ପାନୁଷ୍ଠାନକୁ ଜଳ ଆବଣ୍ଟିତ ହୋଇଛି । ୨୦୧୦ରୁ ୨୦୧୭ ମସିହା ମଧ୍ୟରେ ୧୧୩ଟି କମ୍ପାନୀକୁ ମୋଟ ୧୨୨୯.୮୫୭ କ୍ୟୁସେକ ଜଳ ବିଭିନ୍ନ ନଦୀରୁ ବିଶେଷକରି ମହାନଦୀରୁ ଆବଣ୍ଟିତ ହୋଇଛି । ଏହି ନଦୀ ଜଳ ଉପଯୋଗ ବାବଦରେ ଶିଳ୍ପ ସଂସ୍ଥାଗୁଡ଼ିକ ଉପରେ ୩୪୪୦କୋଟି ଟଙ୍କା ଜଳକର ବାବଦ ବକେୟା ଅଛି । ଯଦି ଏହି ବକେୟା ଜଳକର ଓ ତା’ର ସୁଧକୁ ହିସାବକୁ ନିଆଯିବ ତା’ହେଲେ ପ୍ରାୟ ୫ହଜାର କୋଟି ଟଙ୍କା ଶିଳ୍ପ ସଂସ୍ଥାଗୁଡ଼ିକ ଉପରେ ବାକି ରହିଛି ବୋଲି ଅଖଣ୍ଡ ଅଭିଯୋଗ କରିଛନ୍ତି ।
