ଭୁବନେଶ୍ୱର : ରାଜ୍ୟରେ ଓକିଲଙ୍କ ଆନ୍ଦୋଳନ ପଛରେ ବିଜେପିର ହାତ ରହିଛି ବୋଲି ବିଜେଡି ସିଧାସଳଖ ଅଭିଯୋଗ କରିଛି । ତେବେ ଉଭୟ କଂଗ୍ରେସ ଓ ବିଜେପି ଏହି ଆନ୍ଦୋଳନ ପାଇଁ ସରକାରଙ୍କ ନିଷ୍କ୍ରିୟତାକୁ ଦାୟୀ କରିଛନ୍ତି ।
ଆଜି ଦଳର ମୁଖପାତ୍ର ତଥା ସାଂସଦ ପ୍ରତାପ କେଶରୀ ଦେବ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ଆଇନର ରକ୍ଷକ ଯିଏ ସିଏ ଆଇନ ଭାଙ୍ଗୁଛନ୍ତି । ଦୁଇମାସ ହେଲା ସାଧାରଣ ଲୋକ ହଇରାଣ ହେଉଛନ୍ତି । ଲୋକଙ୍କୁ ଆଇନ ସେବା ଯୋଗାଇବା ଓକିଲମାନଙ୍କ କର୍ତବ୍ୟ । ଲୋକଙ୍କୁ ସେବା ଯୋଗାଇବା ପାଇଁ କିଛି ଓକିଲ ଚାହିଁଥିଲେ କିନ୍ତୁ ସେମାନଙ୍କ ଉପରେ ଆକ୍ରମଣ ହୋଇଛି । କୋର୍ଟ ପରିସରରେ ଆଜି ଯାହା ଘଟିଲା ତାହା ଦୁଃଖଦାୟକ । ୩ଦିନ ପୂର୍ବରୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓକିଲ ଆନ୍ଦୋଳନକୁ ଉସକାଇବା ଭଳି ମନ୍ତବ୍ୟ ଦେଇ ନିଆଁରେ କିରାସିନି ଢ଼ାଳିଛନ୍ତି । ଏହି ଆନ୍ଦୋଳନ ପଛରେ ବିଜେପିର ହାତ ଅଛି । ଗଣ୍ଡଗୋଳିଆ ପରିସ୍ଥିତି ସୃଷ୍ଟି କରାଯାଉଛି । ଏଥିରେ ବିଜୁ ଯୁବ ବାହିନୀର ହାତ ନାହିଁ ବୋଲି ସେ ସ୍ପଷ୍ଟ କରିବା ସହ ରାଜନୀତିକ ଉଦ୍ଦେଶ୍ୟ ରଖି ବିଜେପି ଯାହା କରୁଛି ସେଥିରେ ସେମାନେ କଦାପି ସଫଳ ହେବେ ନାହିଁ ବୋଲି ଶ୍ରୀ ଦେବ କହିଛନ୍ତି ।
ଅପରପକ୍ଷରେ ବିଜେଡିର ଅଭିଯୋଗକୁ ବିଜେପି ଉପସଭାପତି ସମୀର ମହାନ୍ତି ଖଣ୍ଡନ କରି କହିଛନ୍ତି ଯେ, ଦୁଇମାସ ହେଲା ଓକିଲମାନେ ଆନ୍ଦୋଳନ କରୁଛନ୍ତି, ସରକାର କାହିଁକି ନିରବ ହୋଇ ବସି ରହିଛନ୍ତି । କୋର୍ଟ ପରିସରରେ ବିଜୁ ଯୁବବାହିନୀର ସଦସ୍ୟମାନେ ଛୁରୀ,ଭୁଜାଲୀ ଧରି ପ୍ରବେଶ କରୁଛନ୍ତି । ଏ ସରକାର ଆଇନ ବିରୋଧୀ ଓ ଆଇନକୁ ସମ୍ମାନ ଦେବା ଜାଣନ୍ତି ନାହିଁ । ନିଜର ଅପାରଗତା ଲୁଚାଇବା ପାଇଁ କେବଳ ଅନ୍ୟ ଉପରେ ଦୋଷ ଲଦିବା ଜାଣନ୍ତି ବୋଲି ସେ କହିଛନ୍ତି ।
ସେହିପରି ପିସିସି ସଭାପତି ନିରଞ୍ଜନ ପଟ୍ଟନାୟକ ମଧ୍ୟ ସିଧାସଳଖ ରାଜ୍ୟ ସରକାରଙ୍କୁ ଦାୟୀ କରିଛନ୍ତି । ଜନସାଧାରଣଙ୍କ ସ୍ୱାର୍ଥ ଦୃଷ୍ଟିରୁ ଓକିଲ ଆନ୍ଦୋଳନର ସମାଧାନ କ୍ଷେତ୍ରରେ ମୁଖ୍ୟମନ୍ତ୍ରୀ ହସ୍ତକ୍ଷେପ କରିବାକୁ ସେ ଦାବି କରିଛନ୍ତି ।
ସେହିପରି ବରିଷ୍ଠ ବିଜେପି ନେତା ବିଜୟ ମହାପାତ୍ର ଏହି ଓକିଲ ଆନ୍ଦୋଳନକୁ ନାପସନ୍ଦ କରି ଆଇନ ମନ୍ତ୍ରୀ ଓ ଆଇନ ସଚିବ ତୁରନ୍ତ ଓକିଲମାନଙ୍କ ସହ ଆଲୋଚନା କରି ସମାଧାନ ରାସ୍ତା ବାହାର କରିବାକୁ ପରାମର୍ଶ ଦେଇଛନ୍ତି ।
