ଭୁବନେଶ୍ୱର:ସାମୁଦ୍ରିକ ଝଡ଼ ତିତଲି କ୍ଷୟକ୍ଷତିର ଶୀକାର ହୋଇଥିବା ୧୭ଟି ଜିଲ୍ଲାର ଲୋକଙ୍କ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ସ୍ୱତନ୍ତ୍ର ପ୍ୟାକେଜ୍ ଘୋଷଣା କରିଛନ୍ତି।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଆଜି ଏକ ଉଚ୍ଚସ୍ତରୀୟ ବୈଠକ ପରେ ଏହି କ୍ଷତିପୂରଣ ପ୍ୟାକେଜ୍ ଘୋଷଣା ହୋଇଛି।
୩୩ ପ୍ରତିଶତ ବା ଅଧିକ ଫସଲ କ୍ଷତିଗ୍ରସ୍ତ ହୋଇଥିବା ଚାଷୀଙ୍କୁ ଅଣ ଜଳସେଚିତ ଚାଷ ଜମି ପାଇଁ ହେକ୍ଟର ପିଛା ୬୮୦୦ଟଙ୍କା ଓ ଜଳସେଚିିତ ଜମି ପାଇଁ ୧୩,୫୦୦ ଟଙ୍କା, ସବୁଦିନିଆ ଫସଲ କ୍ଷେତ୍ରରେ ହେକ୍ଟର ପିଛା ୧୮ହଜାର ଟଙ୍କାର ଇନପୁଟ ସବସିଡି ପ୍ରକୃତ ଚାଷୀଙ୍କୁ ହିଁ ଦିଆଯିବ।ଏସବୁ ଇନପୁଟ ସବସିଡି ସବୁଦିନିଆ ଫସଲ କ୍ଷେତ୍ରରେ ଅତିକମରେ ୨ହଜାର ଟଙ୍କା ଓ ଅନ୍ୟାନ୍ୟ ଫସଲ ପାଇଁ ହଜାରେ ଟଙ୍କାରୁ କମ୍ ହେବ ନାହିଁ।ପ୍ରଭାବିତ ଅଂଚଳର ଚାଷୀଙ୍କୁ ୨ଲକ୍ଷ ସ୍ୱତନ୍ତ୍ର ମିନି କିଟ୍ (୧ଲକ୍ଷ ୨୦ହଜାର ଡାଲି ଜାତୀୟ ଶସ୍ୟବୀଜ, ୩୦ହଜାର ତୈଳବୀଜ,୫୦ହଜାର ପନିପରିବା ମଞ୍ଜି କିଟ୍)ଯୋଗାଇ ଦିଆଯିବ।ଗୁହାଳ ପୁନରୁଦ୍ଧାର ପାଇଁ ୧୦ହଜାର ଚାଷୀଙ୍କୁ ୧.୧୩ଲକ୍ଷ ଟଙ୍କା ଲେଖାଏ ,ଛେଳି ଗୁହାଳ ପୁନରୁଦ୍ଧାର ପାଇଁ ୧୦ହଜାର ଚାଷୀଙ୍କୁ ୪୪ହଜାର ଟଙ୍କା ଲେଖାଏ, କୁକୁଡ଼ା ପାଳନ ପାଇଁ ୨୦ହଜାର ଟଙ୍କା ଲେଖାଏ ଦେବାକୁ ସରକାର ଘୋଷଣା କରିଛନ୍ତି।
ସେହିପରି ୨୦୧୮ ଖରିଫର ସ୍ୱଳ୍ପମିଆଦୀ ଋଣକୁ ମଧ୍ୟମମିଆଦୀକୁ ପରିବର୍ତନ କରିବାକୁ ସରକାର ଘୋଷଣା ରକରିଥିବାବେଳେ ଚଳିତବର୍ଷ ଫସଲ ଋଣ ଶୁଝିବା ଅବଧିକୁ ୨୦୧୯ ସେପ୍ଟେମ୍ବର ୩୦ ପର୍ଯ୍ୟନ୍ତ ବୃଦ୍ଧି କରିଛନ୍ତି।ବାତ୍ୟା ଓ ବନ୍ୟା ପ୍ରଭାବିତ ଅଂଚଳରେ ୩୩ ପ୍ରତିଶତରୁ ଅଧିକ ଫସଲ କ୍ଷତି ହୋଇଥିବା ଜମିରୁ ଖଜଣା ଓ ଜଳକର ସମ୍ପୂର୍ଣ୍ଣ ଛାଡ଼ ହେବ।ଏହାବ୍ୟତୀତ ବାତ୍ୟା ପ୍ରଭାବିତ ଅଂଚଳରେ ଥିବା ହାଇସ୍କୁଲ ପର୍ଯ୍ୟନ୍ତ ଛାତ୍ରଛାତ୍ରୀଙ୍କୁ ସମସ୍ତ ଦେୟ ଓ ପରୀକ୍ଷା ଫି ଛାଡ଼ ସହ ପ୍ରାଥମିକ ସ୍କୁଲର ପିଲାମାନଙ୍କୁ ମାଗଣା ଅତିରିକ୍ତ ଦୁଇହଳ ସ୍କୁଲ ୟୁନିଫର୍ମ ଓ ପାଠ୍ୟପୁସ୍ତକ ପ୍ରଦାନ କରାଯିବ।
