ଭୁବନେଶ୍ୱର(ଓଡ଼ିଶା ୱେୟାର): ଆସନ୍ତା ଫେବୃୟାରୀ ୧୫ ସୁଦ୍ଧା ଦଳୀୟ ଟିକେଟ ବଣ୍ଟନ ପ୍ରକ୍ରିୟା ଆରମ୍ଭ କରାଯିବ ବୋଲି କଂଗ୍ରେସ ପ୍ରଭାରୀ ଜୀତେନ୍ଦ୍ର ପ୍ରସାଦ ସିଂହ କହିଛନ୍ତି ।
ଓଡ଼ିଶା ଗସ୍ତରେ ଆସିଥିବା ଅବସରରେ ଶ୍ରୀ ସିଂ କହିଥିଲେ ଯେ, ଆସନ୍ତା ଫେବୃୟାରୀ ୧୫ ସୁଦ୍ଧା ଟିକେଟ ବଣ୍ଟନ କରାଯିବ । ବିଭିନ୍ନ କାରଣ ନେଇ ଟିକେଟ ପ୍ରଦାନରେ ବିଳମ୍ବ ହୋଇଛି । ଆସନ୍ତା ନିର୍ବାଚନରେ ଓଡ଼ିଶାରେ ନବୀନ ପଟ୍ଟନାୟକ ସରକାର ଓ କେନ୍ଦ୍ରରେ ନରେନ୍ଦ୍ର ମୋଦିଙ୍କ ସରକାର ହଟିବ। ଓଡ଼ିଶାରେ କୁଶାସନ କାୟା ବିସ୍ତାର କରିଛି । ନବୀନ ପଟ୍ଟନାୟକ ସରକାର ଯିବା ନିଶ୍ଚିତ । ଦଳରୁ ବିଧାୟକ ଓ ନେତା ଛାଡ଼ିବା ଘଟଣା ସମ୍ପର୍କରେ ସେ କହିଛନ୍ତି ଦଳରେ ଏପରି ଆୟାରାମ ଓ ଗୟାରାମ ଚାଲିଥାଏ, ଏଥିପାଇଁ ଚିନ୍ତା କରିବାର କିଛିନାହିଁ। ଯେଉଁମାନେ ଯାଉଛନ୍ତି ତାଙ୍କ ବିକଳ୍ପ ମଧ୍ୟ ଦଳରେ ଅଛନ୍ତି। ଆଉ ବହୁ ଲୋକ ଆସିବେ ଓ ଯିବେ। ଶ୍ରୀକାନ୍ତ ଜେନା ରାହୁଲଙ୍କ ଗୁମର ଖୋଲିବେ ବୋଲି ରଖିଥିବା ମତ ଉପରେ ଶ୍ରୀ ସିଂହ କହିଛନ୍ତି କଂଗ୍ରେସ ମଧ୍ୟ ତାଙ୍କ ଗୁମର ଖୋଲିବ। ଉଲ୍ଲେଖ ଯୋଗ୍ୟ ଯେ, ଅଗଷ୍ଟ ଶେଷ ସୁଦ୍ଧା ୫୦ ଆସନରେ ପ୍ରଥମେ ଟିକେଟ ପ୍ରଦାନ କରାଯିବ ବୋଲି ଘୋଷଣା କରାଯାଇଥିଲା । ଉଭୟ ପ୍ରଭାରୀ ଶ୍ରୀ ସିଂହ ଓ ପିସିସି ସଭାପତି ନିରଂଜନ ପଟ୍ଟନାୟକ କହିଥିଲେ । କିନ୍ତୁ ସମୟ ଗଡ଼ି ଚାଲିଲା । ଟିକେଟ ଆସିଲା ନାହିଁ । ଦଳୀୟ କମିଟି ବସି ପ୍ରସ୍ତାବ ପଠାଗଲା । ସେ ସମୟରେ କୁହାଗଲା ଅକ୍ଟୋବର ସୁଦ୍ଧା ପ୍ରକାଶ କରାଯିବ । ଦଳର ସବୁ ବିଧାୟକଙ୍କୁ ପ୍ରାର୍ଥୀ କରାଯିବ । ହେଲେ ଇତିମଧ୍ୟରେ ଜଣକ ପରେ ଜଣେ ବିଧାୟକ ଦଳ ଛାଡ଼ିଲେ । ୩ ଜଣ ବିଧାୟକ ଇତିମଧ୍ୟରେ ପଦ ଛାଡ଼ି ସାରିଲେଣି । ଏହି ୩ ଜଣଙ୍କ ମଧ୍ୟରୁ ନବ ଦାସଙ୍କୁ ବହିଷ୍କାର କରାଯାଇଛି, ଯୋଗେଶ ସିଂଙ୍କୁ ନିଲମ୍ବିତ କରାଯାଇଛି ଓ କୃଷ୍ଣଚନ୍ଦ୍ର ସଗରିଆଙ୍କୁ ମଧ୍ୟ ଦଳର ପ୍ରାଥମିକ ସଦସ୍ୟ ପଦରୁ ବହିଷ୍କାର କରାଯାଇଛି । ଇତିମଧ୍ୟରେ ବରିଷ୍ଠ ନେତା ଶ୍ରୀକାନ୍ତ ଜେନାଙ୍କୁ ମଧ୍ୟ ପ୍ରାଥମିକ ସଦସ୍ୟ ପଦରୁ ବହିଷ୍କାର କରାଯାଇଛି ।
