ଭୁବନେଶ୍ୱର : ପୁରୀ ଶ୍ରୀମନ୍ଦିରରେ ରାଷ୍ଟ୍ରପତିଙ୍କ ପତ୍ନୀଙ୍କୁ ଦୁର୍ବ୍ୟବହାର ହୋଇଛି ବୋଲି ବିଜେଡି ମୁଖପାତ୍ର ପ୍ରତାପ କେଶରୀ ଦେବ ଦେଇଥିବା ବୟାନ ଏବେ ତାଙ୍କୁ ମହଙ୍ଗା ପଡ଼ିଛି । ଦୁର୍ବ୍ୟବହାର କଥା ପ୍ରତାପ ଦେବ ଜାଣିଲେ କେମିତି ଓ କେଉଁ ଆଧାରରେ ଗଣମାଧ୍ୟମକୁ ବୟାନ ଦେଲେ ବୋଲି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆଜି ପ୍ରଶ୍ନ କରିଥିବାବେଳେ ଏହି ସମସ୍ତ ଘଟଣାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ପଷ୍ଟୀକରଣ ଦାବି କରିଛନ୍ତି ।
କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ଆଜି ସାମ୍ବାଦିକମାନଙ୍କୁ ପ୍ରତିକ୍ରିୟା ଦେଇ କହିଛନ୍ତି ଯେ, ଶ୍ରୀମନ୍ଦିରରେ ସେଭଳି କୌଣସି ଘଟଣା ହୋଇଥିବା ସେ ଜାଣିନାହାନ୍ତି । ରାଷ୍ଟ୍ରପତିଙ୍କ ଅଫିସ୍ ମଧ୍ୟ ଏଭଳି କିଛି ଲିଖିତ ଅଭିଯୋଗ ମଧ୍ୟ କରିବାର ପ୍ରଶ୍ନ ଉଠୁନି । ମୁଖ୍ୟମନ୍ତ୍ରୀଙ୍କ ବିନା ନିର୍ଦ୍ଦେଶରେ ପ୍ରତାପ ଦେବ ମନ୍ତବ୍ୟ ରଖିବା ସମ୍ଭବପର ନୁହେଁ । ତେଣୁ ଏହା ପଛରେ ମନ୍ଦ ଉଦ୍ଦେଶ୍ୟ ରହିଛି ଓ ଷଡ଼ଯନ୍ତ୍ର କରି ଜନମତକୁ ବିଭ୍ରାନ୍ତ କରିବା ପାଇଁ ଅପଚେଷ୍ଟା ହେଉଛି । ବିଜେଡି ହୀନ ଉଦ୍ଦେଶ୍ୟ ନେଇ ରାଜନୀତି କରାଯାଉଛି ବୋଲି କହିଛନ୍ତି । ତୃତୀୟ ମହଲାର ବିନା ଅନୁମତିରେ ଏଠି ପତ୍ର ବି ହଲେନି । କାହା ନିର୍ଦ୍ଦେଶରେ ସେ ଏଭଳି କଥା କହିଥିଲେ ତାହା ସେ ସ୍ପଷ୍ଟ କରନ୍ତୁ । ଏହି ଦୁର୍ବ୍ୟବହାର ପ୍ରସଙ୍ଗରେ ପ୍ରତାପ ଦେବ ଓ ମୁଖ୍ୟ ସଚିବଙ୍କ ମନ୍ତବ୍ୟ ମଧ୍ୟରୁ କାହାର ଠିକ୍ ତଥା ସତ କ’ଣ ତାହା ବି ମୁଖ୍ୟମନ୍ତ୍ରୀ ସ୍ପଷ୍ଟ କରନ୍ତୁ ବୋଲି ଧର୍ମେନ୍ଦ୍ର ଦାବି କରିଛନ୍ତି । ଅନ୍ୟପକ୍ଷରେ ବିଜେଡି ମୁଖପାତ୍ର ଶ୍ରୀ ଦେବ କହିଛନ୍ତି ଯେ, ସେ ନିଜ ଆଡ଼ୁ ଏଭଳି ବୟାନ ଦେଇନଥିଲେ । ଗଣମାଧ୍ୟମ ତାଙ୍କର ପ୍ରତିକ୍ରିୟା ନେଇଥିଲା ଓ ସେ ମତ ରଖିଥିଲେ । ତେଣୁ ଏହି ପ୍ରସଙ୍ଗ କେଉଁଠି ଆସିଲା ତାହା ଧର୍ମେନ୍ଦ୍ର ବାବୁ ଗଣମାଧ୍ୟମକୁ ପ୍ରଶ୍ନ କଲେ ଠିକ୍ ଉତ୍ତର ପାଇପାରନ୍ତେ ।
