ଭୁବନେଶ୍ୱର : ରାଜ୍ୟରେ ଆଗୁଆ ନିର୍ବାଚନ ହେବାର ସମ୍ଭାବନା ରହିଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱାଧୀନ ବିଜେଡି ସରକାର ନିଜର ନିର୍ଦ୍ଧାରିତ କାର୍ଯ୍ୟକାଳ ଶେଷ ହେବା ପୂର୍ବରୁ ବିଧାନସଭାକୁ ଭଙ୍ଗ କରିବାର ସମ୍ଭାବନା ରହିଛି । ତେଲେଙ୍ଗାନାରେ ଟିଆରଏସ୍ ନେତୃତ୍ୱାଧୀନ ସରକାର ଆଗୁଆ ନିର୍ବାଚନ ପାଇଁ ବିଧାନସଭାକୁ ଭାଙ୍ଗିବାର ସଙ୍କେତ ଦେବା ପରେ ଓଡ଼ିଶାରେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଅନୁରୂପ ପଦକ୍ଷେପ ନେଇପାରନ୍ତି ବୋଲି ଚର୍ଚ୍ଚା ।
ରାଜ୍ୟ ସରକାରଙ୍କ ସୂତ୍ରରୁ ମିଳିଥିବା ସୂଚନା ଅନୁସାରେ, ନିର୍ବାଚନ ପାଇଁ ସମସ୍ତ ପ୍ରକ୍ରିୟା ପ୍ରାୟତଃ ଶେଷ ହୋଇସାରିଛି । ଶାସକ ବିଜେଡିର ରାଜନୀତିକ ସ୍ୱାର୍ଥକୁ ସୁହାଇବା ଭଳି ବିଭିନ୍ନ ଲୋକାଭିମୁଖୀ ସରକାରୀ କାର୍ଯ୍ୟକ୍ରମ ଘୋଷଣା ସରିଛି । ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା କାର୍ଯ୍ୟକାରୀ ହୋଇସାରିଥିବାବେଳେ ନିଜସ୍ୱ ଖାଦ୍ୟ ସୁରକ୍ଷା ଯୋଜନା ଆସନ୍ତା ଅକ୍ଟୋବର ୨ତାରିଖରୁ ଲାଗୁ କରାଯିବ । ତେଣୁ ଅକ୍ଟୋବର ୧୫ତାରିଖ ପୂର୍ବରୁ ଯେକୌଣସି ସମୟରେ ବିଧାନସଭାକୁ କ୍ଷମତାସୀନ ବିଜେଡି ସରକାର ଭାଙ୍ଗି ଦେବାର ସମ୍ଭାବନା ରହିଛି । ବିଶେଷକରି ୪ଟି ରାଜ୍ୟର ବିଧାନସଭା ସହ ତେଲେଙ୍ଗାନା ଓ ଓଡ଼ିଶାରେ ସାଧାରଣ ନିର୍ବାଚନ ହୋଇପାରେ ବୋଲି ଆକଳନ କରାଯାଉଛି ।
ଏହି ନିଷ୍ପତି ଦ୍ୱାରା ବିଜେଡି ପୁଣିଥରେ ରାଜ୍ୟରେ ଏକକ ସଂଖ୍ୟାଗରିଷ୍ଠ ଦଳ ଭାବେ ଉଭା ହେବା ପାଇଁ ରଣନୀତି ପ୍ରସ୍ତୁତ କରିଛି । ଅବଶ୍ୟ କେନ୍ଦ୍ରରେ ବିଜେପି ନେତୃତ୍ୱାଧୀନ ସରକାର ସହ ବିଜେଡି ଗୋପନ ବୁଝାମଣା କରି ଆଗୁଆ ନିର୍ବାଚନ ପାଇଁ ସଜବାଜ ହେଉଥିବା ଚର୍ଚ୍ଚା ।
