ନୂଆଦିଲ୍ଲୀ(ଓଡ଼ିଶା ୱେୟାର): ଧାନର ଏମଏସପି କ୍ୱିଣ୍ଟାଲ ପିଛା ୨୯୩୦ଟଙ୍କାକୁ ବୃଦ୍ଧି କରିବା ଦାବିରେ ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ବିଜେଡି ଦିଲ୍ଲୀରେ ବିଶାଳ ଚାଷୀ ସମାବେଶ କରିଛନ୍ତି। ଏହି ସମାବେଶରେ ନବୀନ ପୁଣିଥରେ ‘ଆର୍ଥିକ ସ୍ୱାୟତ୍ତତା’ ଦାବି ଉଠାଇବା ସହ ଏହା ମିଳିଲେ ରାଜ୍ୟର ଚାଷୀଙ୍କ ହକକୁ ପୂରଣ କରିବାରେ ରାଜ୍ୟ ସରକାର ସକ୍ଷମ ହେବେ ବୋଲି କହିଛନ୍ତି।
ଆଜି ଦିଲ୍ଲୀର ତାଲକୋଟରା ଷ୍ଟାଡ଼ିୟମରେ ବିଜେଡିର ଚାଷୀ ସମାବେଶରେ ଶ୍ରୀ ପଟ୍ଟନାୟକ ରାଜ୍ୟ ସରକାର କୃଷି ଓ କୃଷକଙ୍କ କଲ୍ୟାଣ ପାଇଁ ‘କାଳିଆ’ ଯୋଜନାକୁ ସବୁଠୁ ଭଲ ବୋଲି କହିଛନ୍ତି। ଏହି ଯୋଜନାରରେ ରାଜ୍ୟର ୯୨% ଚାଷୀ,ନାମମାତ୍ର ଚାଷୀ,ଭାଗଚାଷୀ ଓ ଭୂମିହୀନ ଉପକୃତ ହେବେ। ୫ବର୍ଷ ମଧ୍ୟରେ ରାଜ୍ୟର ୧୦ହଜାର ହେକ୍ଟର ଜମିକୁ ଜଳସେଚନ ଯୋଗାଇ ଦେବାର ଯେଉଁ ପ୍ରତିଶ୍ରୁତି ଦିଆଯାଇଥିଲା ତା’ର ନିକଟତର ହୋଇସାରିଛୁ । ସାଢ଼େ ୪ବର୍ଷ ମଧ୍ୟରେ କୃଷି ପାଇଁ ୩୦ହଜାର କୋଟି ଟଙ୍କା ଖର୍ଚ୍ଚ କରାଯାଇଛି। ଧାନର ଏମଏସପି ୨୯୩୦ଟଙ୍କାକୁ ବୃଦ୍ଧି ଓ ସ୍ୱାମୀନାଥନ କମିଶନଙ୍କ ସୁପାରିସ ଲାଗୁ ପାଇଁ ରାଜ୍ୟର ଦାବି କେନ୍ଦ୍ର ସରକାର ନଶୁଣିବାରୁ ବିଜେଡି ଦିଲ୍ଲୀରେ କୃଷକ ଅଧିକାର ସମାବେଶ କରିଛି। ଏମଏସପି ବୃଦ୍ଧି ଚାଷୀଙ୍କ ହକ୍। ଏହି ହକ୍ ପାଇଁ ଦଳ ତା’ର ଲଢ଼େଇ ଜାରି ରଖିବ। ରାଜ୍ୟଗୁଡ଼ିକୁ ଅର୍ଥନୀତିକ ସ୍ୱାୟତ୍ତତା ଦେବାକୁ ଦାବି କରି ନବୀନ କହିଛନ୍ତି ଯେ ଏହା ସମ୍ଭବ ହୋଇପାରିଥିଲେ ଆଜି ଚାଷୀଭାଇଙ୍କୁ ଦିଲ୍ଲୀ ଆସିବାକୁ ପଡ଼ିନଥାନ୍ତା । ଏମଏସପି ଚାଷୀଙ୍କ ହକ୍, କାହାର ଦୟା ନୁହେଁ। ଚାଷୀଙ୍କ ହକ ପାଇଁ ବିଜେଡି ଲଢ଼େଇ ଜାରି ରଖିବ। ଏମଏସପି ସ୍ଥିର କରିବା ଓ ସ୍ୱାମୀନାଥନ କମିଶନଙ୍କ ସୁପାରିସ କାର୍ଯ୍ୟକାରୀ କରିବା କେନ୍ଦ୍ର ସରକାରଙ୍କ ଦାୟିତ୍ୱ। ଏହି ଦାୟିତ୍ୱରୁ କେନ୍ଦ୍ର ଖସିପାରିବନି। ଧାନର ଏମଏସପି ବୃଦ୍ଧି ପାଇଁ ଓଡ଼ିଶା ବିଧାନସଭା ଗୃହ କମିଟି କେନ୍ଦ୍ର ସରକାରଙ୍କୁ ଭେଟିବା ପାଇଁ ଉଦ୍ୟମ କରିଥିଲେ ସୁଦ୍ଧା ବିଫଳ ହୋଇଥିଲେ ବୋଲି ଶ୍ରୀ ପଟ୍ଟନାୟକ କହିଥିଲେ।
ଏହି ସମାବେଶରେ ବିଜୁ କୃଷକ ଜନତା ଦଳର ସଭାପତି ପ୍ରସନ୍ନ ଆଚାର୍ଯ୍ୟ, ମହାସଚିବ ତଥା ମନ୍ତ୍ରୀ ପ୍ରତାପ ଜେନାଙ୍କ ସମେତ ବରିଷ୍ଠ ସୂର୍ଯ୍ୟନାରାୟଣ ପାତ୍ର, ସଞ୍ଜୟ ଦାସବର୍ମା, ଅତନୁ ସବ୍ୟସାଚୀ ନାୟକ, ମନ୍ତ୍ରୀ ସୂର୍ଯ୍ୟନାରାୟଣ ପାତ୍ର, ମହିଳା ବିଜେଡି ସଭାନେତ୍ରୀ ମୀନତୀ ବେହେରା, ଏୟୁ ସିଂହଦେଓ, ଭର୍ତ୍ତୃହରି ମହତାବ,ତଥାଗତ ସତପଥୀ, ପ୍ରଶାନ୍ତ ମୁଦୁଲି ଓ ବହୁ ବିଧାୟକ ଓ ଦଳୀୟ ନେତା କେନ୍ଦ୍ର ସରକାରଙ୍କ ଚାଷୀ ମାରଣ ନୀତିକୁ କଡ଼ା ଭାଷାରେ ସମାଲୋଚନା କରିଥିଲେ। ଏହି ସମାବେଶରେ ଓଡ଼ିଶାରୁ ପ୍ରାୟ ୩ହଜାର ଓ ୨ହଜାର ପ୍ରବାସୀ ଓଡ଼ିଆ ଯୋଗ ଦେଇଥିଲେ।
