ଭୁବନେଶ୍ୱର(ଓଡ଼ିଶା ୱେୟାର): ଆଜିଠାରୁ ବିଧାନସଭାର ବଜେଟ୍ ଅଧିବେଶନ ଆରମ୍ଭ ହୋଇଛି। ଅଧିବେଶନ ଆରମ୍ଭରେ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ଅଭିଭାଷଣ ଦେଇ ରାଜ୍ୟ ସରକାରଙ୍କ ସଫଳତା ବଖାଣିଛନ୍ତି। କୃଷି, ସ୍ୱାସ୍ଥ୍ୟ, ଭିତ୍ତିଭୂମି ଓ ଗ୍ରାମାଞ୍ଚଳ ବିକାଶର ସ୍ୱର୍ଣ୍ଣିମ ଚେହେରା ଉପସ୍ଥାପନ କରିଛନ୍ତି।
୫୧ ପୃଷ୍ଠା ସମ୍ବଳିତ ଅଭିଭାଷଣକୁ ବିଧାନସଭାରେ ଉପସ୍ଥାପନ କରି ରାଜ୍ୟପାଳ କହିଛନ୍ତି, ୨୦୦୦ ମସିହା ପରଠାରୁ ଓଡ଼ିଶାରେ ପରିବର୍ତ୍ତନ ଆରମ୍ଭ ହୋଇଛି।“ପ୍ରାକୃତିକ ବିପର୍ଯ୍ୟୟ ମୁକାବିଲାରେ ଓଡ଼ିଶା ଉଦାହରଣ ସାଜିଛି। ରାଜ୍ୟରେ କୃଷି ଉତ୍ପାଦନ ବଢ଼ିଛି। ରାଜ୍ୟକୁ ୫ ଥର କୃଷି କର୍ମଣ ପୁରସ୍କାର ମିଳିଛି। ଆର୍ଥିକ ଦେବାଳିଆରୁ ଆର୍ଥିକ ସ୍ୱଚ୍ଛଳ ରାଜ୍ୟରେ ପରିଣତ ହୋଇଛି ଓଡ଼ିଶା। ସ୍ମାର୍ଟ ସିଟି ଚାଲେଂଜରେ ଭୁବନେଶ୍ୱର ଶ୍ରେଷ୍ଠ ହୋଇଛି।” ବିପର୍ଯ୍ୟୟ ପ୍ରଶମନ, କୃଷି ବିକାଶ, ଜଳସେଚନ ହେଉ କି କନ୍ୟା ଶିକ୍ଷା, ମହିଳା ସଶକ୍ତିକରଣ, ବେକାରୀ ଦୂରୀକରଣରେ ରାଜ୍ୟ ସରକାର ଅଭୂତପୂର୍ବ ପ୍ରଦର୍ଶନ କରିଛନ୍ତି।
ସେ ଆହୁରି କହିଥିଲେ, ସମସ୍ତଙ୍କୁ ସ୍ୱାସ୍ଥ୍ୟ ସୁବିଧା ପାଇଁ ବିଜୁ ସ୍ୱାସ୍ଥ୍ୟ କଲ୍ୟାଣ ଲାଗୁ ହୋଇଛି।ମୋ ସରକାର ଚାଷୀଙ୍କୁ ୬୫ ହଜାର ମୋବାଇଲ ଦେଇଛି। ମହାନଦୀ ଓ ପୋଲାଭରମ୍ ପ୍ରସଙ୍ଗକୁ ଗୁରୁତ୍ୱର ସହ ନିଆଯାଇଛି।”
ଗ୍ରାମୀଣ ବିକାଶକୁ ନେଇ ରାଜ୍ୟପାଳ କହିଥିଲେ ଯେ “ଗ୍ରାମୀଣ ଗୃହ ନିର୍ମାଣରେ ଓଡ଼ିଶା ଏକ ଅଗ୍ରଣୀ ରାଜ୍ୟ ହୋଇଛି। ଗତ ୪ ବର୍ଷ ମଧ୍ୟରେ ରାଜ୍ୟରେ ୪ ନିୟୁତ ଘର ନିର୍ମାଣ ହୋଇଛି। ୩୧୪ ବ୍ଲକରେ ଆମ ଗାଁ ଆମ ବିକାଶ କାର୍ଯ୍ୟ ଶେଷ ହୋଇଛି। ‘ଗ୍ରୀନ୍ ମହାନଦୀ ମିଶନ’ରେ ବ୍ୟାପକ ବୃକ୍ଷରୋପଣ କରାଯାଉଛି। ଗ୍ରାମୀଣ ରାସ୍ତା ନିର୍ମାଣକୁ ମୋ ସରକାର ଗୁରୁତ୍ୱ ଦେଇଛି। ଚଳିତବର୍ଷ ୯୨୩୦ କିମି ଗ୍ରାମୀଣ ରାସ୍ତା ନିର୍ମାଣ କରାଯାଇଛି। ବିଭିନ୍ନ ରାସ୍ତାରେ ଛୋଟବଡ଼ ୧୩୦ଟି ସେତୁ କରାଯାଉଛି।”
ରାଜ୍ୟପାଳ କହିଥିଲେ ଯେ, “କାଳିଆ ଯୋଜନା ପ୍ରଚଳନ କରି ରାଜ୍ୟରେ କୃଷକଙ୍କ ଆର୍ଥିକ ମାନଦଣ୍ଡ ବୃଦ୍ଧି କରିବା ଲାଗି ସରକାର ପଦକ୍ଷେପ ନେଇଛନ୍ତି। ରାଜ୍ୟ ସରକାର ଦାରିଦ୍ର୍ୟ ଦୂରୀକରଣ ଏବଂ କୃଷିର ଉନ୍ନତି ପାଇଁ ନିକଟରେ କାଳିଆ ଯୋଜନାର ଶୁଭାରମ୍ଭ କରିଛନ୍ତି। ଏହି ଯୋଜନା ରାଜ୍ୟର ୯୨ ପ୍ରତିଶତ କ୍ଷୁଦ୍ର, ମଧ୍ୟମ ଓ ନିମ୍ନ ଚାଷୀ ତଥା ଭାଗଚଷୀ, ଋଣୀ ଓ ଅଣ ଋଣୀ ଚାଷୀଙ୍କ ବିକାଶରେ ସହାୟକ ହୋଇପାରିଛି। ଏହି ଯୋଜନାରେ ସରକାର ୧୨ଲକ୍ଷ ୪୫ ହଜାର କ୍ଷୁଦ୍ର ମଧ୍ୟମ ଚାଷୀଙ୍କ ସମେତ ୫୮ ହଜାର ଭାଗଚାଷୀଙ୍କ ବ୍ୟାଙ୍କ୍ ଖାତାକୁ ୬୫୨ କୋଟି ଟଙ୍କା ପ୍ରଦାନ କରିଛନ୍ତି। ନିବେଶକଙ୍କୁ ଆକୃଷ୍ଟ କରିବାକୁ ମୋ ସରକାର ଲ୍ୟାଣ୍ଡ ବ୍ୟାଙ୍କ ଆରମ୍ଭ କରିଥିବା ମଧ୍ୟ ସେ କହିଥିଲେ।
