ଭୁବନେଶ୍ୱର : କେନ୍ଦ୍ର ସରକାରଙ୍କ ‘ଆୟୁଷ୍ମାନ ଭାରତ’ କାର୍ଯ୍ୟକ୍ରମକୁ ରବିବାର ଇଣ୍ଡିଆନ୍ ମେଡିକାଲ ଆସୋସିଏସନ୍(ଆଇଏମ୍ଏ) ବିରୋଧ କରିଛି । କେନ୍ଦ୍ର ସରକାରଙ୍କ ‘ଆୟୁଷ୍ମାନ ଭାରତ’କୁ କାର୍ଯ୍ୟକାରୀ ପାଇଁ ପ୍ରସ୍ତୁତ ୨୦୫ ପୃଷ୍ଠାର ଡ୍ରାଫ୍ଟ ମଡେଲ୍ ଟେଣ୍ଡର ଡକ୍ୟୁମେଣ୍ଟ୍ର ବର୍ତ୍ତମାନର ସ୍ୱରୂପ ଯାହା ରହିଛି ତାହା ଗ୍ରହଣୀୟ ନୁହେଁ ବୋଲି ଆଇଏମ୍ଏ ସ୍ପଷ୍ଟ କରିଛି ।
ଆଜି ଅପରାହ୍ନରେ ନୂଆଦିଲ୍ଲୀରେ ଆଇଏମ୍ଏ ପକ୍ଷରୁ ଏକ ଗୁରୁତ୍ୱପୂର୍ଣ୍ଣ ବୈଠକ ପରେ ଜାରି ପ୍ରେସ୍ ରିଲିଜ୍ ଅନୁସାରେ ‘ଆୟୁଷ୍ମାନ ଭାରତ’ କାର୍ଯ୍ୟକ୍ରମରେ କେନ୍ଦ୍ର ସରକାରଙ୍କ ଦ୍ୱାରା ନିର୍ଦ୍ଧାରିତ ପ୍ୟାକେଜ୍ ହିଁ ରୋଗୀଙ୍କ ଜୀବନକୁ ଅଧିକ ବିପଦ ଭିତରକୁ ଠେଲି ଦେବ ବୋଲି କହିଛି । ଆଇଏମ୍ଏ ପକ୍ଷରୁ ଜାରି ପ୍ରେସ୍ ରିଲିଜ୍ ଅନୁସାରେ ୧୦ଟି ବେଡ୍ ଥିବା ହସ୍ପିଟାଲକୁ ଏହି ସରକାରୀ କାର୍ଯ୍ୟକ୍ରମରେ ସାମିଲ ପାଇଁ ଅନୁମତି ମିଳିବ । ଯାହା ଦ୍ୱାରା ଦଲାଲଙ୍କ ପ୍ରଭାବ ବୃଦ୍ଧି ପାଇବ ଓ କାର୍ଯ୍ୟକ୍ରମରେ ବ୍ୟାପକ ଦୁର୍ନୀତି ପାଇଁ ସୁଯୋଗ ସୃଷ୍ଟି ହେବ ବୋଲି ଆଇଏମ୍ଏ ଆଶଙ୍କା କରିଛି । ସେହିପରି ଆଣ୍ଠୁ ଓ ପିଚା ଅସ୍ତ୍ରୋପଚାର ଖର୍ଚ୍ଚ ପାଇଁ ୯ହଜାର ଟଙ୍କା, ହାର୍ଟ ବାଇପାସ୍ ଅପରେସନ୍ ପାଇଁ ୧.୧୦ଲକ୍ଷ ଟଙ୍କା, ସିଜେରିଆନ୍ ଡେଲିଭରି ପାଇଁ ୯ହଜାର ଟଙ୍କା, ଆଞ୍ଜିଓପ୍ଲାଷ୍ଟି ସହ ଷ୍ଟେଣ୍ଟ୍ ପାଇଁ ୫୦ହଜାର ଟଙ୍କା, ଗର୍ଭାଶୟ କ୍ୟାନସର ଅସ୍ତ୍ରୋପଚାର ପାଇଁ ୫୦ହଜାର ଟଙ୍କା ଧାର୍ଯ୍ୟ କରାଯାଇଛି । ଏହି ନିର୍ଦ୍ଧାରିତ ଦରକୁ ନେଇ ଆଇଏମ୍ଏ ଆପତ୍ତି ଉଠାଇଛି । ଏତେ କମ୍ ଦରରେ ହସ୍ପିଟାଲଗୁଡ଼ିକ ରୋଗୀର ଚିକିତ୍ସା ସେବା ଓ ଉପକରଣକୁ ନେଇ ସାଲିସ୍ କରିବେ ତଥା ନିମ୍ନମାନର ଅସ୍ତ୍ରୋପଚାର କରିବାକୁ ବାଧ୍ୟ ହେବେ । ଯାହାଦ୍ୱାରା ରୋଗୀଙ୍କ ଜୀବନ ଅଧିକ ବିପଦପୂର୍ଣ୍ଣ ହେବ ବୋଲି ଆଇଏମ୍ଏ କହିଛି । ଉଲ୍ଲେଖଯୋଗ୍ୟ ଆୟୁଷ୍ମାନ ଭାରତ କାର୍ଯ୍ୟକ୍ରମର ବର୍ତ୍ତମାନର ସ୍ୱରୂପକୁ ବିରୋଧ କରି ଓଡ଼ିଶା ଓ ପଶ୍ଚିମବଙ୍ଗ ଏଥିରେ ସାମିଲ ହେବେ ନାହିଁ ଖୋଲାଖୋଲି କହିଥିବାବେଳେ ତାମିଲନାଡୁ, କର୍ଣ୍ଣାଟକ, କେରଳ, ଦିଲ୍ଲୀ ଓ ପଞ୍ଜାବ ଏହି କାର୍ଯ୍ୟକ୍ରମକୁ ବିରୋଧ କରିଛନ୍ତି । କେବଳ ବିଜେପି ଶାସିତ ରାଜ୍ୟଗୁଡ଼ିକ ଏହି କାର୍ଯ୍ୟକ୍ରମରେ ସାମିଲ ହେବା ପାଇଁ କେନ୍ଦ୍ର ସରକାରଙ୍କ ସହ ଚୁକ୍ତିବଦ୍ଧ ହୋଇଥିବା ଜଣାପଡ଼ିଛି । ଆଇଏମ୍ଏର ବିରୋଧ ପରେ ଯୋଜନାକୁ ଅକ୍ଟୋବର ୨ ତାରିଖରୁ କାର୍ଯ୍ୟକାରୀ କରିବା ମୋଦି ସରକାରଙ୍କ ପାଇଁ ବଡ଼ ସମସ୍ୟା ହୋଇଛି ।
