କାବୁଲ: ଆଫଗାନିସ୍ତାନର ରାଜଧାନୀ କାବୁଲରେ ଆଇନ ଶୃଙ୍ଖଳା ପରିସ୍ଥିତି ସମ୍ପୂର୍ଣ୍ଣ ଭାବେ ବିପର୍ଯ୍ୟସ୍ତ ହୋଇ ପଡ଼ିଛି । ତାଲିବାନ କବଜାକୁ ଯିବା ପରେ ପ୍ରତିଦିନ ଅଘଟଣ ଘଟିବାରେ ଲାଗିଛି । ପ୍ରତିଦିନ ଶହ ଶହ ସଂଖ୍ୟାରେ ମୃତ୍ୟୁ ମୁଖରେ ପଡ଼ୁଛନ୍ତି । ଅନେକ ବାପା ମା ଛେଉଣ୍ଡ ହୋଇ ଯାଉଥିବା ବେଳେ ଅନେକ ନିଖୋଜ ହୋଇଯାଇଛନ୍ତି । ଅନେକ ଶିଶୁ ଏବେ ବେସାହାର ପରିସ୍ଥିତିରେ ରହିଛନ୍ତି । ତେବେ ଦୁଇ ଦିନ ତଳେ ଆତଙ୍କବାଦୀ ସଂଗଠନ ଆଇଏସଆଇଏସ କାବୁଲରେ ନିୟୋଜିତ ଥିବା ଆମେରିକା ସେନା ଓ ସେମାନଙ୍କ ସହଯୋଗୀଙ୍କୁ ଟାର୍ଗେଟ କରି ଆତ୍ମଘାତୀ ବିସ୍ଫୋରଣ ଘଟାଇଥିଲା ।
ଏହି ଘଟଣାର ଦୁଇ ଦିନ ପରେ ଆଜି ପୁଣି ଥରେ ତାଲିବାନୀ ଆତଙ୍କବାଦୀମାନେ କାବୁଲ ବିମାନ ବନ୍ଦର ନିକଟରେ ଗୁଳି ବର୍ଷଣ କରିଛନ୍ତି । ଫଳରେ ପୁଣି ଥରେ ଲୋକମାନେ ଏଣେତେଣେ ଦୌଡ଼ୁଥିବା ଦେଖିବାକୁ ମିଳିଛି । ସେପଟେ କାବୁଲ ବିମାନ ବନ୍ଦର ଉପରେ ଆଇଏସ ରକେଟ ମାଡ଼ କରିବାର ଆଶଙ୍କା କରିଛି ଆମେରିକା । ସେଥିପାଇଁ ସମସ୍ତଙ୍କୁ ଆଗୁଆ ସୂଚନା ଜାରି କରିଛି । ବିମାନ ବନ୍ଦର ନିକଟରୁ ସମସ୍ତଙ୍କୁ ଚାଲିଯିବାକୁ ଆମେରିକା ପକ୍ଷରୁ କୁହାଯାଇଛି । ସେପଟେ ଏହି ସୂଚନା ପାଇବା ପରେ କାବୁଲ ବିମାନ ବନ୍ଦର ବାହାରେ ପ୍ରବଳ ଭିଡ଼ ହୋଇଥିବା ଦେଖିବାକୁ ମିଳିଛି ।
ସେପଟେ ଆତ୍ମଘାତି ବିସ୍ଫୋରଣର ୩୬ ଘଣ୍ଟା ମଧ୍ୟରେ ଆମେରିକା ଆଇଏସ କ୍ୟାମ୍ପ ଉପରେ ରକେଟ ମାଡ଼ କରିଥିବା ଜଣାପଡ଼ିଛି । ଆମେରିକା ରାଷ୍ଟ୍ରପତି ଜୋ ବିଡେନ ଯାହା କହିଥିଲେ ତାହା କଥା ରଖିଛନ୍ତି ବୋଲି ଆମେରିକା ସେନା କହିଛନ୍ତି। ସେପଟେ କାବୁଲ ଆତ୍ମଘାତି ବିସ୍ଫୋରଣରେ ମୃତ୍ୟୁ ସଂଖ୍ୟା ୨୦୦ ଅତିକ୍ରମ କରିଥିବା ଜଣାପଡ଼ିଛି ।
