ନୂଆଦିଲ୍ଲୀ : ପ୍ରାୟ ୧୦୦ବର୍ଷ ପରେ କେରଳରେ ଭୟାବହ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଏପର୍ଯ୍ୟନ୍ତ ବନ୍ୟାରେ ୩୨୬ଜଣଙ୍କ ମୃତ୍ୟୁ ହୋଇଥିବାବେଳେ ପ୍ରାୟ ଅଢ଼େଇ ଲକ୍ଷ ଲୋକ ବାସହରା ହୋଇଛନ୍ତି । ସ୍ଥିତିର ଅନୁଧ୍ୟାନ କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ସନ୍ଧ୍ୟାରେ କେରଳ ଅଭିମୁଖେ ଗସ୍ତ କରିଛନ୍ତି । ଭୟାବହ ବନ୍ୟାର ମୁକାବିଲା ଓ ରିଲିଫ୍ ସାମଗ୍ରୀ ପାଇଁ କେରଳ ସରକାର ସବୁ ବର୍ଗର ସହାୟତା ଲୋଡ଼ିଛନ୍ତି ।
କେରଳ ମୁଖ୍ୟମନ୍ତ୍ରୀ ପିନରାଇ ବିଜୟନ କହିଛନ୍ତି ଯେ ବନ୍ୟାରେ ବାସହରା ହୋଇଥିବା ୨.୨୩ଲକ୍ଷ ଲୋକଙ୍କୁ ପ୍ରାୟ ୧୫୬୮ଟି ଆଶ୍ରୟସ୍ଥଳୀରେ ରଖାଯାଇଛି । ଇତିମଧ୍ୟରେ ଓଡ଼ିଶା ସରକାର ୫କୋଟି ଟଙ୍କା ଓ ପଞ୍ଜାବ ସରକାର କେରଳ ପାଇଁ ୧୦କୋଟି ଟଙ୍କା ସହାୟତା ରାଶି ଘୋଷଣା କରିଛନ୍ତି ।
ପ୍ରଧାନମନ୍ତ୍ରୀଙ୍କ କେରଳ ଗସ୍ତ
ଶୁକ୍ରବାର ରାତି ପ୍ରାୟ ୧୧ଟାବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କେରଳର ରାଜଧାନୀ ତିରୁଅନନ୍ତପୁରମ୍ ପହଂଚିଛନ୍ତି । ସେ ଆସନ୍ତାକାଲି ଆକାଶମାର୍ଗରୁ ବନ୍ୟାଂଚଳ ବୁଲି ଦେଖିବା ସହ ରାଜ୍ୟ ସରକାରଙ୍କ ସହ ରିଲିଫ୍ ଓ ଉଦ୍ଧାର କାର୍ଯ୍ୟର ସମୀକ୍ଷା କରିବେ।
ଅପରପକ୍ଷରେ କେରଳ ସରକାରଙ୍କ କହିବା ଅନୁସାରେ କେରଳରେ ପ୍ରାୟ ୮୦ଟି ନଦୀ ବନ୍ଧ ଭାଙ୍ଗିଯାଇଛି । ମେ’ ମାସରୁ ଏପର୍ଯ୍ୟନ୍ତ ୩୨୪ଜଣଙ୍କ ମୃତ୍ୟୁ ହୋଇଛି। ଅଲ୍ଲାପ୍ପୁଝା, ଏର୍ଣ୍ଣାକୁଲମ୍, ପଥନମତିତା ଓ ତ୍ରିଚୁର ଜିଲ୍ଲାରେ ବନ୍ୟା ସ୍ଥିତି ଭୟାବହ ହୋଇଛି । ଏହି ବନ୍ୟାରେ ପ୍ରାୟ ୮ହଜାର କୋଟି ଟଙ୍କାର ସମ୍ପତି ନଷ୍ଟ ହୋଇଛି।
