ଭୁବନେଶ୍ୱର(ଓଡ଼ିଶା ୱେୟାର): ଓଡ଼ିଶା ଲୋକାୟୁକ୍ତଙ୍କ ପାଖରେ ଏବେ ୮୨ଟି ଦୁର୍ନୀତି ମାମଲା ବିଚାରାଧୀନ ରହିଛି ଓ ଏଥିରୁ ୨୮ଟି ମାମଲା ନୂଆ ଅଭିଯୋଗ ବୋଲି ରାଜ୍ୟ ଲୋକାୟୁକ୍ତ ଅଧ୍ୟକ୍ଷ ଜଷ୍ଟିସ ଅଜିତ୍ ସିଂ ସୂଚନା ଦେଇଛନ୍ତି । ତା’ଛଡ଼ା ଓଡ଼ିଶାକୁ ଦୁର୍ନୀତିମୁକ୍ତ ରାଜ୍ୟରେ କରିବା ପାଇଁ ପ୍ରତ୍ୟେକ ଜିଲ୍ଲାରେ ପର୍ଯ୍ୟାୟକ୍ରମେ ଜନସଚେତନା ଶିବିର ଆୟୋଜନ ସହ ରାଜ୍ୟର ଲୋକାୟୁକ୍ତକୁ ଏକ ‘ମଡେଲ୍ ଲୋକାୟୁକ୍ତ’ କରିବା ନିମନ୍ତେ ପଦକ୍ଷେପ ନିଆଯାଉଛି ବୋଲି ସେ କହିଛନ୍ତି । ଚଳିତବର୍ଷ ଫେବୃୟାରୀ ୨୮ତାରିଖରେ ନୂଆ ଲୋକାୟୁକ୍ତ ଗଠନ ହେବାପରେ ଏହା ପ୍ରଥମ ସାମ୍ବାଦିକ ସମ୍ମିଳନୀ ।
ଆଜି ଭୁବନେଶ୍ୱରରେ ଓଡ଼ିଶା ଲୋକୟୁକ୍ତ ଅଧ୍ୟକ୍ଷ ଜଷ୍ଟିସ୍ ସିଂ ଓ ଦୁଇ ସଦସ୍ୟ ଜଷ୍ଟିସ ବିକେ ନାୟକ ଓ ଡଃ ଦେବବ୍ରତ ସ୍ୱାଇଁ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ରାଜ୍ୟରେ ଓଡ଼ିଶା ଲୋକପାଳ ଓ ଲୋକାୟୁକ୍ତ ପ୍ରତିଷ୍ଠାନ ଉଚ୍ଛେଦ ହେବାପରେ ସେଠାରେ ଥିବା ୫୯୨ଟି ମାମଲା ନୂତନ ଲୋକାୟୁକ୍ତ ପ୍ରତିଷ୍ଠାନକୁ ଆସିଥିଲା । ସେଥିରୁ ୬୨ଟି ମାମଲା ଗ୍ରହଣଯୋଗ୍ୟ ହୋଇନଥିବାରୁ ତାକୁ ରଦ୍ଦ କରାଯାଇଥିଲା । ସରକାରୀ କର୍ମଚାରୀଙ୍କ ବିରୁଦ୍ଧରେ ଦୁର୍ନୀତି ଅଭିଯୋଗ ଥିବା ୫୪ଟି ମାମଲାକୁ ତଦନ୍ତ ପାଇଁ ହାତକୁ ନିଆଯାଇଥିଲା । ୪୭୬ଟି ମାମଲା ବ୍ୟକ୍ତିଗତ ଅଭିଯୋଗ ଆଧାରିତ ଥିବାରୁ ସେଗୁଡ଼ିକୁ ସରକାରଙ୍କ ନିକଟକୁ ସ୍ଥାନାନ୍ତର କରାଯାଇଛି । ନୂତନ ଲୋକାୟୁକ୍ତ ପ୍ରତିଷ୍ଠାନ କାର୍ଯ୍ୟକାରୀ ହେବାପରେ ଆଜିସୁଦ୍ଧା ମୋଟ ୨୮ଟି ନୂଆ ଅଭିଯୋଗ ମିଳିଛି । ଏବେ ସର୍ବମୋଟ ୮୨ଟି ଦୁର୍ନୀତି ମାମଲା ଓଡ଼ିଶା ଲୋକାୟୁକ୍ତଙ୍କ ବିଚାରାଧୀନ ରହିଛି ବୋଲି ସୂଚନା ଦେଇଛନ୍ତି ।
ସେହିପରି ୭ବର୍ଷ ଭିତରେ ଘଟିଥିବା ଦୁର୍ନୀତିର ତଦନ୍ତ ଲୋକାୟୁକ୍ତ କରିପାରିବେ । ତେବେ ଦୁର୍ନୀତି ଅଭିଯୋଗର ୬୦ଦିନ ଭିତରେ ପ୍ରାଥମିକ ଅନୁସନ୍ଧାନ ଓ ୬ମାସ ଭିତରେ ତଦନ୍ତ ସମ୍ପୂର୍ଣ୍ଣ ଶେଷ କରି ତଦନ୍ତକାରୀ ସଂସ୍ଥା ନିଜର ରିପୋର୍ଟ ଲୋକାୟୁକ୍ତଙ୍କୁ ପ୍ରଦାନ କରିବ । ଲୋକାୟୁକ୍ତ ଚାହିଁଲେ ଯେକୌଣସି ସମୟରେ ତଦନ୍ତକାରୀ ଅଧିକାରୀଙ୍କୁ ବଦଳାଇପାରିବେ ।
ଓଡ଼ିଶା ଲୋକାୟୁକ୍ତ ଆଇନ ଅନ୍ତର୍ଗତ ଦୁର୍ନୀତି ସଂକ୍ରାନ୍ତ ଅଭିଯୋଗକୁ ଲୋକାଯୁକ୍ତ ଗ୍ରହଣ କରିପାରିବେ ଯାହାକି ଦୁର୍ନୀତି ନିବାରଣ ଆଇନ-୧୯୮୮ରେ ଦଣ୍ଡନୀୟ ହୋଇଥିବ । ଏପରିକି ସମସ୍ତ ସରକାରୀ କର୍ମଚାରୀ, ମୁଖ୍ୟମନ୍ତ୍ରୀ, ମନ୍ତ୍ରୀ, ବିଧାୟକ ଓ ଅନ୍ୟ ଲୋକ ପ୍ରତିନିଧିଙ୍କ ବିରୁଦ୍ଧରେ ଅଭିଯୋଗକୁ ଲୋକାୟୁକ୍ତ ଗ୍ରହଣ କରିବେ । ଅଭିଯୋଗ ମିଳିବା ପରେ ତା’ର ଯଥାର୍ଥତାକୁ ଉପଲବ୍ôଧ କରି ଲୋକାୟୁକ୍ତ ନିଜର ତଦନ୍ତାକାରୀ ୱିଙ୍ଗ୍ କିମ୍ବା ଅନ୍ୟ ସଂସ୍ଥା ମାଧ୍ୟମରେ ପ୍ରାଥମିକ ତଦନ୍ତ ପାଇଁ ନିର୍ଦ୍ଦେଶ ଦେଇପାରିବେ ବୋଲି ସେ କହିଛନ୍ତି ।
ଦୁର୍ନୀତିର ଶିକାର ନହେବା ପାଇଁ ଲୋକାୟୁକ୍ତ ଓଡ଼ିଶାର ଲୋକମାନଙ୍କୁ ଆହ୍ୱାନ କରୁଛନ୍ତି ଓ ସେମାନେ ନିଜର ଅଭିଯୋଗ ଲୋକାୟୁକ୍ତଙ୍କ ପାଖରେ ରଖିବାକୁ ସମ୍ପୂର୍ଣ୍ଣ ସ୍ୱାଧୀନ ବୋଲି ଜଷ୍ଟିସ ସିଂ କହିଛନ୍ତି ।
ଓଡ଼ିଶାକୁ ଦୁର୍ନୀତିମୁକ୍ତ କରିବା ପାଇଁ ଲୋକାୟୁକ୍ତ ରାଜ୍ୟର ଲୋକଙ୍କ ପାଖରେ ପହଞ୍ôଚବାକୁ ପ୍ରୟାସ କରୁଛନ୍ତି । ସମସ୍ତ ଜିଲ୍ଲାରେ ପର୍ଯ୍ୟାୟକ୍ରମେ ସଚେତନତା ଶିବିର ଆୟୋଜନ କରିବାକୁ ନିଷ୍ପତ୍ତି ନେଇଛନ୍ତି । ଏଥିପାଇଁ ପ୍ରଥମେ ଜୁନ୍ ୨୯ ତାରିଖରେ ସମ୍ବଲପୁର ଜିଲ୍ଲାରେ ସଚେତନତା ଶିବିର ଆୟୋଜନ କରାଯିବ ବୋଲି ଜଷ୍ଟିସ୍ ସିଂ କହିଛନ୍ତି ।
ଲୋକାୟୁକ୍ତ ନିକଟ ଅତୀତରେ ଖବରକାଗଜରେ ପ୍ରକାଶିତ ୨ଟି ଦୁର୍ନୀତି ମାମଲାକୁ ନିଜ ତରଫରୁ ଅଭିଯୋଗ ଭାବେ ସ୍ୱୀକାର କରି ତା’ର ତଦନ୍ତ ନିମନ୍ତେ ନିଷ୍ପତ୍ତି ନେଇଥିବା ସେ ସୂଚନା ଦେଇଛନ୍ତି ।
