ଜୋରହାଟ: ବ୍ରହ୍ମପୁତ୍ର ନଦୀରେ ଗତ ବୁଧବାର ଘଟିଥିବା ଡଙ୍ଗା ବୁଡ଼ି ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ବ ଶର୍ମା । ଗତ ବୁଧବାର ଜୋରହାଟ ଜିଲ୍ଲାର ବ୍ରହ୍ମପୁତ୍ର ନଦୀର ନିମତି ଘାଟରେ ଏକ ସରକାରୀ ଡଙ୍ଗା ସହିତ ଧକ୍କା ହେବା ଫଳରେ ଏକ ବେସରକାରୀ ଡଙ୍ଗା ନଦୀରେ ବୁଡି ଯାଇଥିଲେ । ପରବର୍ତ୍ତି ସମୟରେ ମୁଖ୍ୟମନ୍ତ୍ରୀଙ୍କ ସହିତ ଅନ୍ୟ ବରିଷ୍ଠ ଅଧିକାରୀମାନେ ଘଟଣାସ୍ଥଳ ପରିଦର୍ଶନ କରି ଅନୁଧ୍ୟାନ କରିଛନ୍ତି। ତେବେ ଏହି ଦୁର୍ଘଟଣାର ତଦନ୍ତ କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। ଅପରାଧିକ ମାମଲା ରୁଜୁ କରିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି। ଏହି ଘଟଣାର ତଦନ୍ତ ପାଇଁ ଏକ ଉଚ୍ଚସ୍ତରୀୟ କମିଟି କରିବାକୁ ମୁଖ୍ୟମନ୍ତ୍ରୀ କହିଛନ୍ତି।
ତେବେ ଘଟଣାର ଅନୁଧ୍ଯାନ କରିବା ପରେ ମୁଖ୍ଯମନ୍ତ୍ରୀ ବିଶ୍ବଶର୍ମା କହିଛନ୍ତି କି ଖାମଖିଆଲି ନୌଚାଳନା କାରଣରୁ ଏହି ଦୁର୍ଘଟଣା ଘଟିଛି। ଏହି ମାମଲାରେ ମୁଁ ଜୋରହାଟ ଥାନା ଅଧିକାରୀଙ୍କୁ ଆପରାଧିକ ମାମଲା ରୁଜୁ କରି ମାମଲାର ତଦନ୍ତ ପାଇଁ ନିର୍ଦ୍ଦେଶ ଦେଇଛି। ଆଜି ସନ୍ଧ୍ୟା ସୁଦ୍ଧା ଦୁର୍ଘଟଣାର ସଠିକ କାରଣ ପାଇଁ କମିଟି ତଦନ୍ତ ଆରମ୍ଭ କରିବ । ମୁଖ୍ୟମନ୍ତ୍ରୀ ଏହା ମଧ୍ୟ କହିଛନ୍ତି ଯେ ବ୍ରହ୍ମପୁତ୍ରର ଦକ୍ଷିଣ କୂଳରେ ଥିବା ଜୋରହାଟର ନିମାଟି ଘାଟରୁ ବିଶ୍ୱର ବୃହତ୍ତମ ନଦୀ ଦ୍ୱୀପ ମଜୁଲି ମଧ୍ୟରେ ଏକକ ଇଞ୍ଜିନ ସହିତ ୧୦ଟି ଘରୋଇ ମେସିନ୍ ଡଙ୍ଗା ଅଛି।
ଏହା ସହିତ ମୁଖ୍ୟମନ୍ତ୍ରୀ ସମସ୍ତ ସିଙ୍ଗଲ ଇଞ୍ଜିନ ଡଙ୍ଗା ଚଳାଚଳ ଉପରେ ପ୍ରତିବନ୍ଧକ ଲଗାଇଛନ୍ତି। ସିଏମ୍ କହିଛନ୍ତି ଯେ ସେହି ଇଞ୍ଜିନ୍ ସାମୁଦ୍ରିକ ଇଞ୍ଜିନ ନୁହେଁ। ଯଦିଓ, ଯଦି କୌଣସି ମାଲିକ ସେମାନଙ୍କୁ ସାମୁଦ୍ରିକ ଇଞ୍ଜିନରେ ପରିଣତ କରିବାକୁ ଚାହାଁନ୍ତି, ତେବେ ଆମେ ସେମାନଙ୍କୁ ସହାୟତା ଏବଂ ସବସିଡି ଦେବୁ । ଶର୍ମା କହିଛନ୍ତି ଯେ ସାମୁଦ୍ରିକ ଇଞ୍ଜିନର ମୂଲ୍ୟ ପ୍ରାୟ ୧୦ ଲକ୍ଷ ଟଙ୍କା। ଏହାର ସ୍ଥାପନ ପାଇଁ ଆବେଦନ କରିବା ପରେ ତୁରନ୍ତ ସରକାର ଏହାକୁ ଡଙ୍ଗା ମାଲିକମାନଙ୍କୁ ଯୋଗାଇଦେବେ।
ସୂଚନାଯୋଗ୍ୟ ଆସାମର ବ୍ରହ୍ମପୁତ୍ରରେ ଦୁଇଯାତ୍ରୀବାହୀ ଡ଼ଙ୍ଗା ମୁହାଁମୁହିଁ ଧକ୍କା । ଏବେ ସୁଦ୍ଧା ୫୦ରୁ ଅଧିକ ନିଖୋଜ । ମାଜୁଲି ଦ୍ବୀପରୁ ଜୋରାହଟ ଯାଉଥିବା ବେଳେ ନିମତିଘାଟଠାରେ ଦୁର୍ଘଟଣା ଗ୍ରସ୍ତ । ନଦୀ ମଝିରେ ଧକ୍କା ଲାଗି ଦୁଇ ଡଙ୍ଗା ବୁଡି ଯାଇଥିବା ନେଇ ସୂଚନା ମିଳିଛି । ଉଦ୍ଧାର କାର୍ଯ୍ୟରେ ଏସ୍ଡ଼ିଆରଏଫ ଟିମ ନିୟୋଜିତ | ଦୁଇ ଡ଼ଙ୍ଗାରେ ୧୨୦ରୁ ଅଧିକ ଯାତ୍ରୀ ଥିବା ନେଇ ସୂଚନା ।
