ଭୁବନେଶ୍ୱର : ସାଧାରଣ ନିର୍ବାଚନକୁ ଦୃଷ୍ଟିରେ ରଖି ପିସିସି ସଭାପତି ନିରଞ୍ଜନ ପଟ୍ଟନାୟକ ନିଜର ଏକ ବିଶାଳ ଟିମ୍ ଗଢ଼ିଛନ୍ତି। ରାଜ୍ୟ କଂଗ୍ରେସ ମଙ୍ଗୁଆଳ ଦାୟିତ୍ୱ ନେବାର ପ୍ରାୟ ସାଢ଼େ ୩ମାସ ପରେ ନିରଞ୍ଜନ ଗଢ଼ିଥିବା ପିସିସି କମିଟିରେ ୧୩ଜଣ ଉପସଭାପତି,୨୪ଜଣ ସାଧାରଣ ସମ୍ପାଦକ, ୯୯ଜଣ ସମ୍ପାଦକ,ଜଣେ କୋଷାଧ୍ୟକ୍ଷଙ୍କ ସମେତ ୧୩ଜଣଙ୍କୁ ସ୍ୱତନ୍ତ୍ର ନିମନ୍ତ୍ରିତ ସଭ୍ୟ ଭାବେ ସାମିଲ କରାଯାଇଛି। ଏହି ପିସିସି କମିଟି ବ୍ୟତୀତ ଶୃଙ୍ଖଳା କମିଟି, ନିର୍ବାଚନ କମିଟି,କୋର କମିଟି ଓ ପ୍ରଚାର କମିଟି ଘୋଷଣା ହୋଇଛି। ସବୁବର୍ଗର ନେତାଙ୍କୁ ସନ୍ତୁଷ୍ଟ କରିବାକୁ ପ୍ରୟାସ ହୋଇଛି।
କଂଗ୍ରେସ ପକ୍ଷରୁ ଜାରି ପ୍ରେସ୍ ରିଲିଜ୍ ଅନୁସାରେ ପିସିସି କୋଷାଧ୍ୟକ୍ଷ ଭାବେ କିଶେ।ର ଚନ୍ଦ୍ର ପଟେଲ,ପିସିସି ମହିଳା ସଭାନେତ୍ରୀ ସସ୍ମିତା ବେହେରାଙ୍କୁ ଦଳର ଉପସଭାପତି ଭାବେ ନିଯୁକ୍ତି ମିଳିଛି। ସେହିପରି ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କୁ ମିଶାଇ କାର୍ଯ୍ୟନର୍ବାହୀ କମିଟିରେ ମୋଟ ୨୭ଜଣ ନେତାଙ୍କୁ ସାମିଲ କରାଯାଇଛି।
ପ୍ରଦେଶ ନିର୍ବାଚନ କମିଟିରେ ମୋଟ ୨୧ଜଣ ସଦସ୍ୟ ଥିବାବେଳେ ସମସ୍ତ ଏଆଇସିସି ସମ୍ପାଦକ, ସଂଗଠନ ମୁଖ୍ୟଙ୍କୁ ସ୍ୱତନ୍ତ୍ର ନିମନ୍ତ୍ରିତ ସଦସ୍ୟ ରଖାଯାଇଛି। ଏହି କମିଟିରେ ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ସମେତ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର, ରାମଚନ୍ଦ୍ର ଖୁଂଟିଆ, ନବ ଦାସ, ପ୍ରଦୀପ ମାଝୀ, ପ୍ରସାଦ ହରିଚନ୍ଦନ, ହେମାନନ୍ଦ ବିଶ୍ୱାଳ, ଜଗନ୍ନାଥ ପଟ୍ଟନାୟକ, ଭକ୍ତ ଚରଣ ଦାସ, ସୁଶୀଳା ତିରିଆ, ରଞ୍ଜିବ ବିଶ୍ୱାଳ, ଶରତ ପଟ୍ଟନାୟକ, ବିଶ୍ୱ ରଞ୍ଜନ ମହାନ୍ତି, ବିଜୟଲକ୍ଷ୍ମୀ ସାହୁ, କିଶୋର ଚନ୍ଦ୍ର ପଟେଲ, ତାରାପ୍ରସାଦ ବାହିନୀପତି, ଭାଗବତ ପ୍ରସାଦ ମହାନ୍ତି, ମହମ୍ମଦ ଶାହନୱାଜ ଓ ଦେବାଶିଷ ପଟ୍ଟନାୟକ ସଦସ୍ୟ ଅଛନ୍ତି।
ସେହିପରି ପିସିସି ଶୃଙ୍ଖଳା କମିଟିର ଅଧ୍ୟକ୍ଷ ଭାବେ ହେମାନନ୍ଦ ବିଶ୍ୱାଳ ନିଯୁକ୍ତି ପାଇଥିବାବେଳେ ଟିମରେ ଅନ୍ୟ ୬ଜଣ ସଦସ୍ୟ ଅଛନ୍ତି। ସେମାନେ ହେଲେ ଅନନ୍ତ ପ୍ରସାଦ ସେଠୀ(ଆବାହକ), ଭାଗବତ ପ୍ରସାଦ ମହାନ୍ତି, ପ୍ରଦୀପ କୁମାର ରଥ, ରବିନ୍ଦ୍ରନାଥ ମହାନ୍ତି, ନିରଞ୍ଜନ ପାଣିଗ୍ରାହୀ ଓ ସାବିତ୍ରୀ ଚୌଧୁରୀ।
ସେହିପରି ଦଳର ବରିଷ୍ଠ ନେତାମାନଙ୍କୁ ନେଇ କୋର କମିଟିରେ ମୋଟ ୪୨ଜଣ ସଦସ୍ୟ ଅଛନ୍ତି। ସେହିପରି ଓଡ଼ିଶା ପ୍ରଦେଶ କଂଗ୍ରେସ ପ୍ରଚାର କମିଟିର ଅଧ୍ୟକ୍ଷ ଭାବେ ଭକ୍ତଚରଣ ଦାସ, ରଞ୍ଜିବ ବିଶ୍ୱାଳଙ୍କୁ ଆବାହକ ଭାବେ ନିଯୁକ୍ତି ମିଳିଛି। କମିଟିରେ ଅନ୍ୟ ୪୨ଜଣଙ୍କୁ ସଦସ୍ୟ ଭାବେ ସାମିଲ କରାଯାଇଛି। ପିସିସି ମିଡିଆ ଓ ଯୋଗାଯୋଗ ବିଭାଗ ଅଧ୍ୟକ୍ଷ ଭାବେ ସତ୍ୟପ୍ରକାଶ ନାୟକଙ୍କୁ ନିଯୁକ୍ତି ମିଳିଛି।
