ଭୁବନେଶ୍ୱର : କେନ୍ଦ୍ର ସରକାରଙ୍କ ମହତ୍ୱାକାଂକ୍ଷୀ ବୀମା ଯୋଜନା ‘ଆୟୁଷ୍ମାନ ଭାରତ’ରେ ସାମିଲ ନହୋଇ ଓଡ଼ିଶା ସରକାର ସମାନ୍ତରାଳ ଭାବେ ସାମଗ୍ରିକ ବୀମା ଯୋଜନା ‘ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା’ ଘୋଷଣା କରିଛନ୍ତି । ଏହି ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଅଗଷ୍ଟ ୧୫ତାରିଖରୁ କାର୍ଯ୍ୟକାରୀ ହେବ । ରାଜ୍ୟର ୭୦ଲକ୍ଷରୁ ଊଦ୍ଧ୍ୱର୍ ପରିବାରର ପ୍ରାୟ ସାଢ଼େ ୩କୋଟି ଲୋକ ଉପକୃତ ହେବେ । ଏବାବଦରେ ସମସ୍ତ ଖର୍ଚ୍ଚ ରାଜ୍ୟ ସରକାର ବହନ କରିବେ ।
ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏ ସମ୍ପର୍କରେ ଘୋଷଣା କରି କହିଛନ୍ତି ଯେ, ଆସନ୍ତା ଅଗଷ୍ଟ ୧୫ତାରିଖରୁ ରାଜ୍ୟରେ ‘ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା’ କାର୍ଯ୍ୟକାରୀ ହେବ । ସମଗ୍ର ରାଜ୍ୟର ୭୦ଲକ୍ଷରୁ ଊଦ୍ଧ୍ୱର୍ ପରିବାର ଏଥିରେ ସାମିଲ ହେବେ । ପ୍ରତ୍ୟେକ ପରିବାରକୁ ୫ଲକ୍ଷ ଟଙ୍କାର ସ୍ୱାସ୍ଥ୍ୟବୀମା ସୁବିଧା ମିଳିବ । ଏହା ବ୍ୟତୀତ ସମସ୍ତ ସରକାରୀ ହସ୍ପିଟାଲ( ଉପକେନ୍ଦ୍ରରୁ ଜିଲ୍ଲା ମୁଖ୍ୟ ଚିକିତ୍ସାଳୟ ପର୍ଯ୍ୟନ୍ତ) ସମ୍ପୂର୍ଣ୍ଣ ମାଗଣାରେ ସ୍ୱାସ୍ଥ୍ୟସେବା ଉପଲବ୍ଧ ହେବ । ପ୍ରସୂତୀ, ନବଜାତ ଓ ଅସୁସ୍ଥ ଶିଶୁଙ୍କୁ ଡାକ୍ତରଖାନାରୁ ଘରକୁ ଆସିବା ପାଇଁ ସରକାର ୫୦୦ଟଙ୍କାର ଯାତାୟତ ଖର୍ଚ୍ଚ ମଧ୍ୟ ବହନ କରିବେ । ଏ ସମ୍ପର୍କରେ ସାମ୍ବାଦିକମାନଙ୍କୁ ସୂଚନା ଦେଇ ସ୍ୱାସ୍ଥ୍ୟମନ୍ତ୍ରୀ ପ୍ରତାପ ଜେନା କହିଛନ୍ତି ଯେ ପ୍ରାୟ ୭୦ଲକ୍ଷ ପରିବାରର ସାଢ଼େ ୩କୋଟି ଲୋକଙ୍କୁ ବାର୍ଷିକ ୫ଲକ୍ଷ ଟଙ୍କାର ସ୍ୱାସ୍ଥ୍ୟସେବା ସୁରକ୍ଷା ସହାୟତା ମିଳିପାରିବ । ରାଜ୍ୟ ସରକାର ଏନେଇ ସମସ୍ତ ଖର୍ଚ୍ଚ ବହନ କରିବେ । ସେହିପରି ସମସ୍ତ ସରକାରୀ ହସ୍ପିଟାଲରେ ଉଭୟ ବିପିଏଲ୍ ଓ ଏପିଏଲ ରୋଗୀଙ୍କୁ ମାଗଣା ସ୍ୱାସ୍ଥ୍ୟସେବା ଓ ମେଡିସିନ୍ ସରକାର ଯୋଗାଇ ଦେବେ ।
ସୂଚନାଯୋଗ୍ୟ, କେନ୍ଦ୍ର ସରକାରଙ୍କ ସାର୍ବଜନୀନ ବୀମା ଯୋଜନା ‘ଆୟୁଷ୍ମାନ ଭାରତ’କୁ ଓଡ଼ିଶାରେ କାର୍ଯ୍ୟକ୍ଷମ କରିବା ପାଇଁ ରାଜ୍ୟ ସରକାର ଆଗ୍ରହ ଦେଖାଇ ନଥିଲେ । ଆୟୁଷ୍ମାନ ଯୋଜନାରେ ଓଡ଼ିଶାର ୪୪ଲକ୍ଷ ପରିବାରକୁ ୫ଲକ୍ଷ ଟଙ୍କା ଲେଖାଏ ସ୍ୱାସ୍ଥ୍ୟବୀମା ଯୋଗାଇ ଦେବା ନିମନ୍ତେ କେନ୍ଦ୍ର ସରକାର ୬୦ ପ୍ରତିଶତ ଓ ରାଜ୍ୟ ସରକାର ୪୦ ପ୍ରତିଶତ ଅର୍ଥ ବହନ କରିଥାନ୍ତେ । ଏହି ଯୋଜନା ମାଧ୍ୟମରେ କେନ୍ଦ୍ରର ନେତୃତ୍ୱାଧୀନ ବିଜେପି ସରକାର ରାଜନୀତିକ ଫାଇଦା ନେବାର ଆଶଙ୍କା କରି ଓଡ଼ିଶାର କ୍ଷମତାସୀନ ବିଜେଡି ସରକାର ନିଜସ୍ୱ ଅର୍ଥରେ ଏହି ବୀମା ଯୋଜନା କାର୍ଯ୍ୟକାରୀ କରିବା ପାଇଁ ନିଷ୍ପତ୍ତି ନେଇଛନ୍ତି ।
