ଭୁବନେଶ୍ୱର: କାମ ନାହିଁ ତ ଦରମା ନାହିଁ।ଏଭଳି କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି ରାଜ୍ୟ ସରକାର। ରାଜ୍ୟରେ ବିଭିନ୍ନ ବର୍ଗର କର୍ମଚାରୀମାନେ ଏବେ ଆନ୍ଦୋଳନକୁ ଓହ୍ଲାଇଥିବାବେଳେ ସରକାରଙ୍କ ଏହି କଠୋର ନୀତି କର୍ମଚାରୀମାନଙ୍କ ସମସ୍ୟା ଦ୍ୱିଗୁଣିତ କରିଛି।
ସ୍କୁଲ ଓ ଗଣଶିକ୍ଷା ବିଭାଗ ଅତିରିକ୍ତ ସଚିବ ପ୍ରଭାତ କୁମାର ଭୋଇ ଆଜି ବିଭାଗର ସମସ୍ତ ନିର୍ଦ୍ଦେଶକମାନଙ୍କୁ ଚିଠି ଲେଖି ଆନ୍ଦୋଳନରତ କର୍ମଚାରୀଙ୍କ ବିରୁଦ୍ଧରେ ‘କାମ ନାହିଁ ତ ଦରମା ନାହିଁ ’ ନୀତି ଅବଲମ୍ବନ କରିବାକୁ ନିର୍ଦ୍ଦେଶ ଦେଇଛନ୍ତି।ନିଜର ସରକାରୀ କାର୍ଯ୍ୟକୁ ଛାଡ଼ି ଦୀର୍ଘଦିନ ଧରି ଯେଉଁ କର୍ମଚାରୀମାନେ ଧାରଣା ଓ ଆନ୍ଦୋଳନରେ ସାମିଲ ହୋଇଛନ୍ତି ସେମାନଙ୍କ ପାଇଁ ‘କାମ ନାହିଁ ତ ଦରମା ନାହିଁ ’ ନୀତି ଆପଣାଇବାକୁ କହିଛନ୍ତି।କେଉଁମାନେ କେବେଠୁ ସରକାରୀ କାର୍ଯ୍ୟରେ ଯୋଗ ଦେଇନାହାନ୍ତି ତାହା ଜଣାଇବାକୁ ସେ ନିର୍ଦ୍ଦେଶକମାନଙ୍କୁ କହିଛନ୍ତି।ବିଭାଗର ପ୍ରମୁଖ ସଚିବ ଏବେ ଏହି ରିପୋର୍ଟ ମାଗିଥିବା ଶ୍ରୀ ଭୋଇ ଚିଠିରେ ଲେଖିଛନ୍ତି।
ସୂଚନାଯୋଗ୍ୟ ରାଜ୍ୟରେ ଏବେ ଓକିଲ, ଶିକ୍ଷକ, ଅଗ୍ନିଶମ ବାହିନୀ ଓ ବିଭାଗୀୟ ମୁଖ୍ୟ ଦପ୍ତରର କର୍ମଚାରୀମାନେ ବିଭିନ୍ନ ଦାବିରେ ଆନ୍ଦୋଳନ କରୁଛନ୍ତି।
