ଭୁବନେଶ୍ୱର : ସାଧାରଣ ନିର୍ବାଚନ ପୂର୍ବରୁ ସଂଗଠନକୁ ସଜାଡ଼ିବା ପାଇଁ ରାଜ୍ୟ କଂଗ୍ରେସରେ ଜିଲ୍ଲା ସଭାପତିମାନଙ୍କ ନାଁ ଘୋଷଣା ହେବା ପରେ ଏବେ ତୀବ୍ର ଅସନ୍ତୋଷ ଦେଖାଦେଇଛି । ଦଳର ଦୁଇ ବରିଷ୍ଠ ନେତା ସୁର ରାଉତରାୟ ଓ ମନୋରଞ୍ଜନ ଦାସ ସିଧାସଳଖ ୱାନ୍ ମ୍ୟାନ୍, ୱାନ୍ ପୋଷ୍ଟ୍ ଫର୍ମୂଲାକୁ ବିରୋଧ କରିଛନ୍ତି ।
ଖୋର୍ଦ୍ଧା ଜିଲ୍ଲା କଂଗ୍ରେସ ସଭାପତି ସୁର ରାଉତରାୟ ଓ ଭୁବନେଶ୍ୱର ଜିଲ୍ଲା ସଭାପତି ମନୋରଞ୍ଜନ ଦାସ ଆଜି ଗଣମାଧ୍ୟମ ଜରିଆରେ ୱାନ୍ ମ୍ୟାନ୍-ୱାନ୍ ପୋଷ୍ଟ୍ ଫର୍ମୂଲାର ପୁନର୍ବିଚାର ନିମନ୍ତେ ଅପିଲ୍ କରିଛନ୍ତି । ଶ୍ରୀ ରାଉତରାୟ ଖୋଲାଖୋଲି ଭାବେ ଏହି ନିଷ୍ପତ୍ତିକୁ କୌଣସି ପରିସ୍ଥିତିରେ ସ୍ୱୀକାର କରିପାରିବେ ନାହିଁ ବୋଲି ଖୋଲାଖୋଲି କହିଛନ୍ତି । ଶ୍ରୀ ରାଉତରାୟ କହିଛନ୍ତି ଯେ, ସେ ହାରିବା ଦିନଠାରୁ ନିଜ ନିର୍ବାଚନ ମଣ୍ଡଳୀ ପାଇଁ ଅକ୍ଲାନ୍ତ ପରିଶ୍ରମ କରୁଛନ୍ତି । ଏଭଳି ପରିସ୍ଥିତିରେ ଯଦି ସେ ନିର୍ବାଚନ ଲଢ଼ି ପାରିବେ ନାହିଁ ତେବେ ତାଙ୍କ ପରିଶ୍ରମ ବୃଥା ଯିବ । ଦଳରେ ସେ ବିଦ୍ରୋହ କରିବାକୁ ଚାହୁଁନାହାନ୍ତି । କିନ୍ତୁ ତାଙ୍କୁ ଟିକେଟ୍ ଦିଆଯାଉ ବୋଲି ସେ କହିଛନ୍ତି । ଅତୀତରେ ବିଜେଡି ସଭାପତି ନବୀନ ପଟ୍ଟନାୟକ ତାଙ୍କୁ ଟିକେଟ୍ ଯାଚିଛନ୍ତି, କିନ୍ତୁ ସେ କଂଗ୍ରେସ ଛାଡ଼ି ଯାଇନାହାନ୍ତି । ତେଣୁ ଆଗାମୀ ନିର୍ବାଚନ ଲଢ଼ିବାରୁ ତାଙ୍କୁ କେହି ଅଟକାଇ ପାରିବେ ନାହିଁ ବୋଲି ଶ୍ରୀ ରାଉତରାୟ ସ୍ପଷ୍ଟ କରିଛନ୍ତି । ସେ କହିଛନ୍ତି ଯେ ଯଦି ୱାନ୍ ମ୍ୟାନ୍ ୱାନ ପୋଷ୍ଟ ନିୟମ ଲାଗୁ କରାଯାଏ ତେବେ ଏଥିରେ ନିରଞ୍ଜନ ପଟ୍ଟନାୟକ, ପ୍ରଦୀପ ମାଝୀ, ଚିରଞ୍ଜିବ ବିଶ୍ୱାଳ, ନବ ଦାସ, ଭକ୍ତ ଦାସଙ୍କ ଭଳି ନେତାମାନେ ଟିକେଟ୍ ପାଇବାରୁ ବି ବାଦ୍ ପଡ଼ିବେ ।
