ଭୁବନେଶ୍ୱର :ସମ୍ଭାବ୍ୟ ବନ୍ୟା ମୁକାବିଲା ପାଇଁ ରାଜ୍ୟ ସରକାର ପ୍ରସ୍ତୁତି ଆରମ୍ଭ କରିଛନ୍ତି । ମୌସୁମୀ ଆସିବା ପୂର୍ବରୁ ବନ୍ୟାପ୍ରବଣ ଅଞ୍ଚଳ ଓ ଦୁର୍ଗମ ଅଞ୍ଚଳରେ ଆବଶ୍ୟକ ପରିମାଣର ଖାଦ୍ୟ ମହଜୁଦ୍ ରଖିବା ପାଇଁ ସମସ୍ତ ୩୦ ଜିଲ୍ଲାର ପ୍ରଶାସନକୁ ସ୍ୱତନ୍ତ୍ର ରିଲିଫ୍ କମିଶନର ବିଷ୍ଣୁପଦ ସେଠୀ ନିର୍ଦ୍ଦେଶ ଦେଇଛନ୍ତି ।
ମଙ୍ଗଳବାର ଶ୍ରୀ ସେଠୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ପ୍ରସ୍ତୁତି ବୈଠକରେ ସମସ୍ତ ଜିଲ୍ଲାର ଅତିରିକ୍ତ ଜିଲ୍ଲାପାଳ ଓ ଜିଲ୍ଲା ଜରୁରୀକାଳୀନ ଅଧିକାରୀମାନଙ୍କୁ ଜୁନ୍ ୧୦ ତାରିଖ ସୁଦ୍ଧା ଜିଲ୍ଲା ବିପର୍ଯ୍ୟୟ ପରିଚାଳନା ଯୋଜନା ପ୍ରସ୍ତୁତ କରି ତାକୁ ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷଙ୍କ ନିକଟରେ ଅନୁମୋଦନ କରାଇ ନେବାକୁ କୁହାଯାଇଛି । ଏହି ବିପର୍ଯ୍ୟୟ ପରିଚାଳନା ଯୋଜନା ଅନୁମୋଦନ ଲାଭ କରିବା ପରେ ସମ୍ପୃକ୍ତ ଜିଲ୍ଲାପାଳମାନେ ତାକୁ ନିଜର ୱେବ୍ସାଇଟ୍ରେ ପ୍ରଦର୍ଶିତ କରିବେ । ବନ୍ୟା ସମ୍ଭାବନା ଥିବା ଦୁର୍ଗମ ଅଞ୍ଚଳରେ ଆସନ୍ତା ୨ରୁ ୩ମାସ ପାଇଁ ପିଡିଏସ୍ ସାମଗ୍ରୀ ମହଜୁଦ ରଖିବାକୁ ଅତିରିକ୍ତ ଜିଲ୍ଲାପାଳମାନଙ୍କୁ ଶ୍ରୀ ସେଠୀ ନିର୍ଦ୍ଦେଶ ଦେଇଛନ୍ତି । ମୌସୁମୀ ଆସିବା ପୂର୍ବରୁ ଖାଦ୍ୟଶସ୍ୟ ମହଜୁଦ ରହିଛି କି ନାହିଁ ଜିଲ୍ଲାପାଳମାନେ ସୁନିଶ୍ଚିତ କରାଇବେ ଓ ଗୋଦାମରେ ରହୁଥିବା ଖାଦ୍ୟଶସ୍ୟର ପରିମାଣ ନିୟମିତ ଭାବେ ଅବଗତ କରାଇବେ । ଶୁଖିଲା ଖାଦ୍ୟ ଯଥା ଛତୁଆ, ଗୁଡ଼ ଓ ଅନ୍ୟାନ୍ୟ ସାମଗ୍ରୀ ସ୍ଥାନୀୟ ବ୍ୟବସାୟୀଙ୍କଠୁ କ୍ରୟ ପାଇଁ ଆବଶ୍ୟକ ପ୍ରକ୍ରିୟା ସମ୍ପାଦନ ନିମନ୍ତେ କୁହାଯାଇଛି । ରାଜ୍ୟରେ ଚଳିତବର୍ଷ ବିଭିନ୍ନ ନଦୀରେ ୧୦୮ଟି ସ୍ଥାନକୁ ସମ୍ବେଦନଶୀଳ ନଦୀବନ୍ଧ ଭାବେ ଚିହ୍ନଟ କରାଯାଇଛି । ଏଥିରୁ ୩ଟି ଅତ୍ୟଧିକ ସମ୍ବେଦନଶୀଳ ନଦୀବନ୍ଧ ବୋଲି ଶ୍ରୀ ସେଠୀ କହିଛନ୍ତି ।
