କାବୁଲ: ଆଫଗାନିସ୍ତାନକୁ ନିଜ ଦଖଲକୁ ନେବା ପରେ ତାଲିବାନ ସରକାର ଗଢିବାକୁ ପ୍ରସ୍ତୁତ ହେଉଛି । ସମାନ୍ତରାଳ ଭାବେ ଆଫଗାନିସ୍ତାନରେ ତାଲିବାନଙ୍କ ପାଇଁ ଆଉ ଏକ ସମସ୍ୟା ମୁଣ୍ଡ ଟେକିବାରେ ଲାଗିଛି । ତାଲିବାନୀ ବିରୋଧୀ ସଂଗଠନ ଦିନକୁ ଦିନ ତାଲିବାନ ବିରୋଧରେ ଏକ ପ୍ରକାର ଯୁଦ୍ଧ ଘୋଷଣା କରିଛି । ପଞ୍ଜଶିରରେ ଏହି ତାଲିବାନ ବିରୋଧୀ ସଂଗଠନର ଆକ୍ରମଣରେ ପ୍ରାୟ ୩୦୦ ତାଲିବାନୀ ସେନାଙ୍କ ମୃତ୍ୟୁ ହୋଇଥିବା ସୂଚନା ରହିଛି । ଏହା ସହିତ ଏକାଧିକ ତାଲିବାନୀ ସେନାକୁ ଗିରଫ କରିଥିବା ନେଇ ମଧ୍ୟ ସୂଚନା ରହିଛି ।
ବିବିସିର ଜଣେ ସାମ୍ବାଦିକଙ୍କ ମୁତାବିକ ବଗଲାନର ଅନ୍ଦ୍ରାମ ଅଞ୍ଚଳରେ ଲୁଚି ରହିଥିବା ତାଲିବାନୀ ସେନାଙ୍କ ଉପରକୁ ଏହି ବଡ଼ଧରଣର ଆକ୍ରମଣ ହୋଇଥିଲା । ଏହି ଆକ୍ରମଣ ଫଳରେ ତାଲିବାନକୁ ଏକ ବଡ଼ କ୍ଷତି ସହିବାକୁ ପଡ଼ିଛି । ଏହି ଆକ୍ରମଣରେ ପାଖାପାଖି ୩୦୦ ତାଲିବାନୀ ସେନାଙ୍କ ମୃତ୍ୟୁ ହୋଇଥିବା ସେ ସୂଚନା ଦେଇଛନ୍ତି। ତାଲିବାନ ବିରୋଧୀ ସେନା ଏକାଧିକ ତାଲିବାନୀଙ୍କୁ ଗିରଫ ମଧ୍ୟ କରିନେଇଥିବା ସେ ସୂଚନା ଦେଇଛନ୍ତି ।
ଏହା ପୂର୍ବରୁ ଆଫଗାନିସ୍ତାନର ଉପରାଷ୍ଟ୍ରପତି ଅମରୁଲ୍ଲାହ ସାଲେହ ଏହି ଆକ୍ରମଣ ପାଇଁ ପୂର୍ବରୁ ସଂକେତ ଦେଇଥିଲେ । ଏକ ଟ୍ବିଟ ଜରିଆରେ ତାଲିବାନକୁ ଟାର୍ଗେଟ କରିବା ସହିତ କହିଥିଲେ କି ତାଲିବାନ ଉପରେ ଯେଉଁଭଳି ଭାବେ ଆକ୍ରମଣ ହୋଇଥିଲା, ସେମାନେ ମୁହୁର୍ତ୍ତକ ପାଇଁ ବଞ୍ଚିବା ମଧ୍ୟ ମୁସ୍କିଲ ହୋଇ ପଡ଼ିଥିଲା । ସେଠାରୁ ବଞ୍ଚିବା ତାଙ୍କ ପାଇଁ ଚ୍ୟାଲେଞ୍ଜ ହୋଇ ପଡ଼ିଥିଲା । ତେବେ ତାଲିବାନ ପଞ୍ଜଶୀରରେ ତାର ସେନା ସଂଖ୍ୟାକୁ ମଧ୍ୟ ବୃଦ୍ଧି କରିଥିବା ସୂଚନା ରହିଛି ।
ପଞ୍ଜଶୀର ନେତା ଅହମଦ ଶାହ ମାସୁଦଙ୍କ ୩୨ ବର୍ଷିୟ ପୁଅ ଅହମଦ ଶାହ କହିଛନ୍ତି କି ଆମର ଆଧିକାରିକ ଅଞ୍ଚଳକୁ ତାଲିବାନ ହାତକୁ କଦାପି ଦେବୁ ନାହିଁ । ଏହି ଅଞ୍ଚଳ ଛାଡ଼ିବାକୁ ତାଲିବାନ ସହିତ ଆଲୋଚନା କରିବାକୁ ପ୍ରସ୍ତୁତ ଅଛୁ। ଯଦି ଆଲୋଚନା ସଫଳ ନ ହୁଏ, ତେବେ ଯୁଦ୍ଧକୁ ମଧ୍ଯ ଏଡ଼ାଇ ଦିଆଯାଇ ପାରିବ ନାହିଁ ବୋଲି ସେ କହିଛନ୍ତି ।
ସେପଟେ ତାଲିବାନ ପଞ୍ଜଶୀରକୁ ଅକ୍ତିଆର ନ କଲେ ଦେଶରେ ସରକାର ଗଠନ କରିବା ଅସମ୍ଭବ ହୋଇ ପଡ଼ିବ । ଫଳରେ ପଞ୍ଜଶୀର ଉପରେ ତାଲିବାନ କବଜା କରିବାକୁ ପ୍ରୟାସ ଜାରି ରଖିଛି । ଆଫଗାନିସ୍ତାନରେ ଖୁବ କମ ଦିନରେ ସରକାର ଗଢିବାକୁ ଯାଉଛି ତାଲିବାନ । ଦେଶରେ ସରକାର ଗଢିବା ତାଲିବାନ ପାଇଁ କାଠିକର ସମସ୍ୟା ହୋଇଥାଇ ପାରେ, କିନ୍ତୁ ସରକାର ଗଢିବା ଦିଗରେ ତାଲିବାନ ନେତାଙ୍କ ପ୍ରୟାସ ଜୋରଦାର ଜାରି ରହିଛି। ତାଲିବାନୀ ନେତା ଆଫଗାନୀ ନେତାଙ୍କୁ ସାକ୍ଷାତ କରିବା ସହିତ ବାରମ୍ବାର ବୈଠକ କରୁଛନ୍ତି । ପୂର୍ବତନ ରାଷ୍ଟ୍ରପତି ହାମିଦ କରଜଇ ସହିତ ମଧ୍ୟ ତାଲିବାନୀ ନେତା ବୈଠକ କରୁଛନ୍ତି ।
