ୱାସିଂଟନ : ଏକ ନୂଆ ଅଧ୍ୟୟନରୁ ଜଣା ପଡ଼ିଛି ଫାଇଜର କୋଭିଡ-୧୯ ଟିକାର ତୃତୀୟ ଡୋଜ ସଂକ୍ରମଣ ଓ ଡାକ୍ତରଖାନାରେ ଭର୍ତ୍ତି ହେବାରୁ ରକ୍ଷା ପାଇବା ପାଇଁ ପ୍ରଥମ ଦୁଇଟି ଡୋଜ ତୁଳନାରେ ଅଧିକ ପ୍ରଭାବଶାଳୀ । ‘ଲେନସେଟ ରିଜୋନାଲ ହେଲଥ ଆମେରିକାଜ’ରେ ପ୍ରକାଶିତ ଏହି ଅଧ୍ୟୟନରେ ଟିକାକରଣର ୮ ମାସପରେ ସଂକ୍ରମଣ ଓ ଡାକ୍ତରଖାନାରେ ଭର୍ତ୍ତିହେବାର ସ୍ଥିତି ଓ କୋଭିଡ ଜନିତ ମୃତ୍ୟୁ ଘଟଣାରେ ଫାଇଜର ଟିକାର ଦୁଇଟି ଡୋଜ ଟିକାର ପ୍ରଭାବଶାଳୀତାକୁ ଆକଳନ କରାଯାଇଛି ।
ଗବେଷକମାନେ ଟିକାକରଣ ପରେ ତିନିମାସ ପର୍ଯ୍ୟନ୍ତ ଟିକାର ତୃତୀୟ ଡୋଜର ପ୍ରଭାବଶୀଳତାକୁ ଆକଳନ କରିଛନ୍ତି । ଏହି ଅଧ୍ୟୟନ ୨୦୨୦ ଡିସେମ୍ବରରୁ ୨୦୨୧ ମଧ୍ୟରେ କରାଯାଇଥିଲା । ଏହି ଅଧ୍ୟୟନେରେ ଦକ୍ଷିଣ କାଲିଫର୍ଣ୍ଣିଆର ହେଲଥ କେୟାର କମ୍ପାନୀ ‘କେଶର ପରମାନେଟ’ ୩୧ ଲକ୍ଷ ସଦସ୍ୟଙ୍କ ଇଲେକ୍ଟ୍ରୋନିକ ସ୍ୱାସ୍ଥ୍ୟ ରେକର୍ଡର ବିଶ୍ଳେଷଣ କରାଯାଇଥିଲା ।
ଅଧ୍ୟୟନରେ ଫାଇଜର କୋଭିଡ ନିରୋଧି ଟିକାର ଦୁଇଟି ଡୋଜର ପ୍ରଭାବ ଓ ତୃତୀୟ ଡୋଜର ପ୍ରଭାବ ଆକଳନ କରାଯାଇଥିଲା। ସେଥିରୁ ଜଣା ପଡ଼ିଥିଲା ତୃତୀୟ ଡୋଜ ଟିକାରୁ ଯେଉଁ ଲାଭ ମିଳୁଛି ତାହା ଦୁଇଟି ଡୋଜ ଟିକାରୁ ମିଳୁଥିବା ଲାଭ ଅପେକ୍ଷା ବହୁତ ଅଧିକ। ଏହି ଅଧ୍ୟୟନ ସମୟରେ ୧ଲକ୍ଷ ୯୭ହଜାର ୫୩୫ ଜଣ ଲୋକ କରୋନା ଭୁତାଣୁ ସଂକ୍ରମିତ ହୋଇଥିଲେ। ଓ ସେମାନଙ୍କ ମଧ୍ୟରୁ ୧୫ହଜାର ୭୮୬ଜଣ ଲୋକ ଡାକ୍ତରଖାନାରେ ଭର୍ତ୍ତି ହୋଇଥିଲେ।
ଏହି ଅଧ୍ୟୟନ ସମୟରେ କରୋନା ଭାଇରସର ଡେଲଟା ଭ୍ୟାରିଆଣ୍ଟ ଥିଲା । କିନ୍ତୁ ସେତେବେଳେ ଓମିକ୍ରନ ଭ୍ୟାରିଆଣ୍ଟ ଚିହ୍ନଟ ହୋଇ ନଥିଲା। ଅଧ୍ୟୟନକରେ ଜଣାପଡ଼ିଲାକି ଫାଇଜର ଟିକାର ଦୁଇଟି ଡୋଜ ନେଲା ପରେ ସଂକ୍ରମଣ ବିରୋଧରେ ମିଳୁଥିବା ସୁରକ୍ଷା ପ୍ରଥମ ମାସ ପରେ ୮୫ ପ୍ରତିଶତରୁ ୮ ମାସ ପରେ କମି ୪୯ ପ୍ରତିଶତକୁ କମିଯାଉଛି । କିନ୍ତୁ ଡାକ୍ତରଖାନାରେ ଭର୍ତ୍ତି ହେବା ମାମଲାରେ ଦୁଇଟି ଡୋଜରୁ ମିଳୁଥିବା ସୁରକ୍ଷା ୮ ମାସ ପର୍ଯ୍ୟନ୍ତ ୯୦ ପ୍ରତିଶତ ରହୁଛି ଓ ଏଥିରେ ରୋଗ ପ୍ରତିରୋଧକ ଶକ୍ତି କମୁଥିବା ଲକ୍ଷ କରାଯାଇ ନାହିଁ।
