ଲକ୍ଷ୍ନୌ: ଉତ୍ତରପ୍ରଦେଶରେ ଆଗକୁ ବିଧାନସଭା ନିର୍ବାଚନ ରହିଛି । ତେବେ ନିର୍ବାଚନର ଅବ୍ୟବହିତ ପୂର୍ବରୁ ରାଜ୍ୟରେ ନିର୍ବାଚନ ଉଷ୍ମତା ପାଇବାରେ ଲାଗିଛି । ରାଜ୍ୟର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ବିରୋଧୀ ସମାଜବାଦୀ ପାର୍ଟିର ନେତା ଅଖିଳେଶ ଯାଦବଙ୍କୁ ଟାର୍ଗେଟ କରି କଡ଼ା ସମାଲୋଚନା କରିଛନ୍ତି । କଟାକ୍ଷ କରି ମୁଖ୍ୟମନ୍ତ୍ରୀ ଆଦିତ୍ୟନାଥ ଅଖିଳେଶଙ୍କୁ ଅବ୍ବାଜାନ ବୋଲି ସମ୍ବୋଧନ କରିଛନ୍ତି । ତେବେ ଏହି ଅବ୍ବାଜାନ ଶବ୍ଦକୁ ନେଇ ରାଜ୍ୟରେ ରାଜନୈତିକ ତୁମ୍ଭିତୋଫାନ ଆରମ୍ଭ ହୋଇ ଯାଇଛି ।
ଏହି ଶବ୍ଦକୁ ଅଖିଳେଶ କଡ଼ା ବିରୋଧ କରିଥିବା ବେଳେ ବିଜେପି ନେତା ସିଦ୍ଧାର୍ଥ ନାଥ ଅଖିଳେଶଙ୍କ ଉପରେ ପ୍ରଶ୍ନ ଉଠାଇଛନ୍ତି । ଉତ୍ତରପ୍ରଦେଶର ସରକାରର କ୍ୟାବିନେଟ ମନ୍ତ୍ରୀ ସିଦ୍ଧାର୍ଥ ନାଥ କହିଛନ୍ତି ଅଖିଳେଶଙ୍କୁ ପ୍ରଶ୍ନ କଲେ ଅବ୍ବା ଶବ୍ଦ ଉପରେ ତାଙ୍କର ଏତେ ଆପତ୍ତି କାହିଁକି । ମୁଲାୟମ ସିଂହ ମଧ୍ୟ ଅଖିଳେଶଙ୍କୁ ଟିପୁ କହିକରି ଡାକୁଥିଲେ ବୋଲି ସେ କହିଛନ୍ତି ଯ।
ସେ ଆହୁରି ମଧ୍ୟ କହିଛନ୍ତି କି ଅବ୍ବା ଶବ୍ଦ ଉର୍ଦ୍ଦୁ ଭାଷାରେ ସବୁଠାରୁ ଶ୍ରୁତ ମଧୁର ତଥା ମିଠା ଶବ୍ଦ ଅଟେ । ଏହି ଶବ୍ଦ ପ୍ରତି ଅଖିଳେଶଙ୍କର ଏତେ ଘୃଣ୍ୟ ଭାବନା କାହିଁକି ବୋଲି ସେ ପ୍ରଶ୍ନ କରିଛନ୍ତି । ଅଖିଳେଶ ନିଜ ବାପାଙ୍କୁ ପିତା ବଦଳରେ ଡାଡି ଡାକିପାରିବେ । ଯାହା ଏକ ଇଂରାଜୀ ଶବ୍ଦ । ପିତା ତ ଡାକୁନାହାନ୍ତି । ଯଦି ଇଂରାଜୀ ଶବ୍ଦ ଏତେ ପସନ୍ଦ ତେବେ ଉର୍ଦ୍ଦୁ ଭାଷା ପ୍ରତି ଏତେ ଘୃଣା କାହିକି ବୋଲି । ଏହାର ଉତ୍ତର ଅଖିଳେଶ ଦେବା ନିହାତି ଜରୁରୀ ବୋଲି ସେ କହିଛନ୍ତି ।
