ନୂଆଦିଲ୍ଲୀ: ଗତକାଲି ମୁମ୍ବାଇରେ ବଡ଼ଧରଣର ବିସ୍ଫୋରଣ ନେଇ ମୁମ୍ବାଇ ପୁଲିସକୁ ଫେକ କଲ ଆସିବା ପରେ ଆଜି ଦିଲ୍ଲୀର ଅନ୍ତର୍ଜାତୀୟ ବିମାନବନ୍ଦରରେ ବିସ୍ଫୋରଣ ନେଇ ଧମକପୂର୍ଣ୍ଣ ବାର୍ତ୍ତା । ଦିଲ୍ଲୀର ଅନ୍ତର୍ଜାତୀୟ ବିମାନବନ୍ଦର ଅପରେସନ କଣ୍ଟ୍ରୋଲ ନିକଟକୁ ଏକ ଧମକପୂର୍ଣ୍ଣ ଇ-ମେଲ ଆସିଥିବା ଜଣାପଡ଼ିଛି । ଏହି ଧମକପୂର୍ଣ୍ଣ ମେଲ ଆଲକାଏଦା ଆତଙ୍କବାଦୀ ସଂଗଠନ ନାଁରେ ଆସିଥିବା ପୁଲିସ ପକ୍ଷରୁ ସୂଚନା ରହିଛି ।
ଦିଲ୍ଲୀ ପୁଲିସ ମୁତାବକ ଏକ ଦମ୍ପତ୍ତି ଏହି ବୋମା ବିସ୍ଫୋରଣ କରିବ ଓ ରବିବାର ଦିନ ହିଁ ଏହି ବୋମା ବିସ୍ପୋରଣ କରାଯିବା ପାଇଁ ନିଷ୍ପତ୍ତି ହୋଇଛି ବୋଲି ଉକ୍ତ ମେଲରେ ଉଲ୍ଲେଖ ରହିଛି। ତେବେ ଏହା ପୂର୍ବରୁ ଗତ ମାର୍ଚ୍ଚ ମାସରେ ମଧ୍ୟ ଏଭଳି ଏକ ଧମକପୂର୍ଣ୍ଣ ମେଲ ଆସିଥିଲା । ସେପଟେ ଏହି ମେଲ ଆସିବା ପରେ ଆଇଜିଆଇ ବିମାନବନ୍ଦରରେ ସୁରକ୍ଷା ବ୍ୟବସ୍ଥାକୁ ବଢାଇ ଦିଆଯାଇଛି । ସମସ୍ତ ସୁରକ୍ଷା ଦାୟିତ୍ବରେ ଥିବା ଏଜେନ୍ସିକୁ ମଧ୍ୟ ଆର୍ଲଟ କରିଦିଆଯାଇଛି । ଆଣ୍ଟି-ସେବୋଟାଜ ଚେକିଂ କରାଯାଉଥିବା ଜଣାପଡ଼ିଛି ।
ଆସିଥିବା ମେଲରେ ସିଙ୍ଗାପୁରରୁ କରଣବୀର ସୁରୀ ଓରଫ ମହମ୍ମଦ ଜଲୀଲ ଓ ତାର ଧର୍ମପତ୍ନୀ ଶୈଲୀ ସାରା ଓରଫ ହସୀନା ଭାରତ ଅଭିମୁଖେ ଆସୁଛନ୍ତି। ତେବେ ଦିଲ୍ଲୀ ବିମାନ ବନ୍ଦରରେ ୧ରୁ ୩ଟି ବିସ୍ଫୋରଣ ହେବା ନେଇ ଷଡ଼ଯନ୍ତ୍ର ହୋଇଥିବା ଜଣାପଡ଼ିଛି ।ତେବେ ତଦନ୍ତ ସମୟରେ ପୂର୍ବରୁ ମଧ୍ୟ ଆସି ସାରିଥିବା ତଦନ୍ତକାରୀ ଟିମ ସୂଚନା ଦେଇଛନ୍ତି ।
ଆସନ୍ତା ୧୫ ତାରିଖ ସ୍ବାଧୀନତା ଦିବସରେ ରାଜଧାନୀ ଦିଲ୍ଲୀରେ ଚକାବନ୍ଦ କରିଦିଆଯିବ । ସୁରକ୍ଷାକୁ ଦୃଷ୍ଟିରେ ରଖି ପୋଲିସ ପକ୍ଷରୁ ଏଭଳି ନିଷ୍ପତ୍ତି ନିଯାଇଥିବା ଜଣାପଡ଼ିଛି । ତେବେ ଲାଲକିଲ୍ଲାରେ ମଧ୍ୟ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିଦିଆଯାଇଛି । ଏନେଇ ପୁଲିସ ପକ୍ଷରୁ କୁହାଯାଇଛି ଯେ ଖାଲିସ୍ତାନୀ ତତ୍ତ୍ବ ସମସ୍ୟା ସୃଷ୍ଟି କରିପାରେ । ଫଳରେ ଏହାକୁ ଦୃଷ୍ଟିରେ ରଖି ସୁରକ୍ଷା ବ୍ୟବସ୍ଥାରେ ସାମାନ୍ୟ ଢିଲା ନ ଦେବାକୁ କୁହାଯାଇଛି ।
