ଭୁବନେଶ୍ୱର(ଓଡ଼ିଶା ୱେୟାର):ସାଧାରଣ ନିର୍ବାଚନ ପୂର୍ବରୁ କେନ୍ଦ୍ର ସରକାର ଆଜି ଆଗତ କରିଥିବା ୨୦୧୯-୨୦ ମସିହାର ମଧ୍ୟବର୍ତ୍ତୀକାଳୀନ ବଜେଟକୁ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିରାଶା ବ୍ୟକ୍ତ କରିଛନ୍ତି । ଅବଶ୍ୟ ଆୟକର ଛାଡ଼ ପରିମାଣ ବୃଦ୍ଧିକୁ ସେ ସ୍ୱାଗତ କରିଥିବାବେଳେ ଚତୁର୍ଦ୍ଦଶ ଅର୍ଥ କମିଶନ ସୁପାରିସର ପ୍ରାୟ ୨୬,୩୪୨କୋଟି ଟଙ୍କା ଓଡ଼ିଶା ହରାଇବ ବୋଲି ଆଶଙ୍କା ବ୍ୟକ୍ତ କରିଛନ୍ତି। ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କହିଛନ୍ତି, ଟିକସ ଛାଡ଼ ପରିମାଣ ୫ଲକ୍ଷ ଟଙ୍କାକୁ ବୃଦ୍ଧି ଓ ଚାଷୀଙ୍କ ଆକାଉଣ୍ଟକୁ ସିଧାସଳଖ ସହାୟତା ପ୍ରଦାନ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ସ୍ୱାଗତ କରିଥିବାବେଳେ ରାଜ୍ୟ ସରକାରଙ୍କ କାଳିଆ ଯୋଜନା ଭଳି ଚାଷୀ ସହାୟତାକୁ ବାର୍ଷିକ ୧୦ହଜାର ଟଙ୍କା କରିବା ଓ ଭାଗଚାଷୀ ଓ ଭୂମିହୀନଙ୍କ ନିମନ୍ତେ କିଛି ବ୍ୟବସ୍ଥା ନଥିବାରୁ ଅସନ୍ତୋଷ ବ୍ୟକ୍ତ କରିଛନ୍ତି । ସେହିପରି ମନରେଗା ପାଣ୍ଠି ସଂଶୋଧନ, ଅନୁସୂଚିତ ଜାତି ଓ ଜନଜାତି ବର୍ଗ ପାଇଁ ଅର୍ଥ ଆବଣ୍ଟନ ଏବଂ ସାମାଜିକ ସୁରକ୍ଷା ଭତ୍ତା ପରିମାଣ ବୃଦ୍ଧି ନହେବାକୁ ନେଇ ମୁଖ୍ୟମନ୍ତ୍ରୀ ନିରାଶ ବ୍ୟକ୍ତ କରିଛନ୍ତି । ଗ୍ରାମାଞ୍ଚଳ ପାନୀୟ ଯୋଗାଣ ଓ ଗୃହ ନିର୍ମାଣରେ ଆବଣ୍ଟନ ହ୍ରାସ ତଥା ଏମଏସଏମଇ କ୍ଷେତ୍ରରେ ଅଧିକ ପାଣ୍ଠି ଆବଣ୍ଟନ ଜରୁରୀ ଥିଲା ବୋଲି ମୁଖ୍ୟମନ୍ତ୍ରୀ କହିଛନ୍ତି । ସେହିପରି ଓଡ଼ିଶାକୁ ଚତୁର୍ଦ୍ଦଶ ଅର୍ଥ କମିଶନଙ୍କ ସୁପାରିସ ଆଧାରରେ ୧ଲକ୍ଷ ୮୪ହଜାର ୦୭୦କୋଟି ଟଙ୍କା(୨୦୧୫-୨୦) ମିଳିବାକୁ ଥିବାବେଳେ ବାସ୍ତବ କ୍ଷେତ୍ରରେ ଏହା ୧ଲକ୍ଷ ୫୭ହଜାର ୮୨୮କୋଟି ଟଙ୍କା ମିଳିବାକୁ ନେଇ ମୁଖ୍ୟମନ୍ତ୍ରୀ ଚିନ୍ତା ବ୍ୟକ୍ତ କରିଛନ୍ତି । ସେ କହିଛନ୍ତି ଯେ, ୨୦୧୯-୨୦ ଆର୍ଥିକ ବର୍ଷର ବଜେଟ୍ ଆକଳନ ଓ ୨୦୧୮-୧୯ ସଂଶୋଧିତ ବଜେଟ୍ ଆକଳନରୁ ସ୍ପଷ୍ଟ ହୋଇଛି ଯେ ଓଡ଼ିଶାକୁ ୨୬ହଜାର ୩୪୨ କୋଟି ଟଙ୍କା କମ୍ ମିଳିବ ବୋଲି କହିଛନ୍ତି ।
