ଭୁବନେଶ୍ୱର : କେନ୍ଦ୍ରାପଡ଼ା ଜିଲ୍ଲାର ମହାକାଳପଡ଼ା ଓ ମାର୍ଶାଘାଇ ବ୍ଲକର ୨୦୦ଟି ଗାଁକୁ ପାନୀୟ ଜଳ ଯୋଗାଣ ନିମନ୍ତେ ରାଜ୍ୟ ସରକାର ୨୦୪ କୋଟି ଟଙ୍କାର ଏକ ବୃହତ୍ ପ୍ରକଳ୍ପକୁ ଆଜି ମଞ୍ଜୁରୀ ପ୍ରଦାନ କରିଛନ୍ତି । ଏଥିପାଇଁ ମହାକାଳପଡ଼ା ବିଧାୟକ ଅତନୁ ସବ୍ୟସାଚୀ ନାୟକ ମହାକାଳପଡ଼ାବାସୀଙ୍କ ପକ୍ଷରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ କୃତଜ୍ଞତା ଜଣାଇଛନ୍ତି ।
ଏକ ପ୍ରେସ୍ ରିଲିଜ୍ରେ ଶ୍ରୀ ନାୟକ କହିଛନ୍ତି ଯେ, ମହାକାଳପଡ଼ା ଓ ମାର୍ଶାଘାଇ ବ୍ଲକର ଅଧିକାଂଶ ଗାଁରେ ପାନୀୟ ଜଳ ସଙ୍କଟ ରହିଥିଲା । ରାଜ୍ୟ କ୍ୟାବିନେଟ୍ ଆଜି ଅନୁମୋଦନ କରିଥିବା ଏହି ବୃହତ୍ ପ୍ରକଳ୍ପକୁ ୨ବର୍ଷ ମଧ୍ୟରେ ଶେଷ କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିର୍ଦ୍ଦେଶ ଦେଇଛନ୍ତି । ଏହି ନୂଆ ପ୍ରକଳ୍ପ ନିର୍ମାଣ କରିବା ଦାୟିତ୍ୱ ଏଲ୍ ଆଣ୍ଡ ଟି କମ୍ପାନୀକୁ ଦିଆଯାଇଛି । ଏହି ପ୍ରକଳ୍ପ ଯୋଗୁ ପ୍ରାୟ ୨ଲକ୍ଷ ୩୪ହଜାର ଜନସାଧାରଣ ଉପକୃତ ହେବେ । ଏକକାଳୀନ ୨୦୦କୋଟିରୁ ଅଧିକ ଟଙ୍କାର ଗୋଟିଏ ପ୍ରକଳ୍ପ ମିଳିବାରେ କେନ୍ଦ୍ରାପଡ଼ା ଜିଲ୍ଲାରେ ଏହା ପ୍ରଥମ ପ୍ରକଳ୍ପ । ତାଳସଙ୍ଗା ନିକଟ ଲୁଣା ନଦୀର ପାଣିରୁ ପାଇପ୍ ଯୋଗେ ମହାକାଳପଡ଼ା ଓ ମାର୍ଶାଘାଇର ୨୦୦ଟି ଗାଁକୁ ଯୋଗାଇ ଦେବାର ଯୋଜନା ରହିଛି । ଏଲ୍ ଆଣ୍ଡ ଟି କମ୍ପାନୀ ଚଳିତ ମାସରେ କାର୍ଯ୍ୟ ଆରମ୍ଭ କରିବ ବୋଲି ସୂଚନା ମିଳିଥିବା ଶ୍ରୀ ନାୟକ କହିଛନ୍ତି । ସୂଚନାଯୋଗ୍ୟ ଦୀର୍ଘଦିନ ଧରି ଶ୍ରୀ ନାୟକ ଏହି ପାନୀୟ ଜଳ ପ୍ରକଳ୍ପ ନିମନ୍ତେ ପ୍ରୟାସ କରୁଥିଲେ ।
