ଲଣ୍ଡନ: ଲିଡ୍ସ ପରାଜୟର ମଧୁର ପ୍ରତିଶୋଧ ନେଇଛି ଟିମ୍ ଇଣ୍ଡିଆ। ଇଂଲଣ୍ଡକୁ ତା’ରି ମାଟିରେ ଧରାଶାୟୀ କରିଛି ବିରାଟ ବାହିନୀ। ଲଣ୍ଡନର ଦି ଓଭାଲରେ ଖେଳାଯାଇଥିବା ୪ର୍ଥ ଟେଷ୍ଟକୁ ବେଶ ରୋମାଞ୍ଚକର ଢଙ୍ଗରେ ଜିତି ନେଇଛି ଟିମ୍ ଇଣ୍ଡିଆ। ଶେଷ ଦିନରେ ହିଁ ଇଂଲଣ୍ଡର ୧୦ ୱିକେଟ ଝଡ଼ାଇ ଭାରତ ଚଳିତ ସିରିଜ୍ରେ ଦ୍ୱିତୀୟ ବିଜୟ ହାସଲ କରିଛି।
ଭାରତ ଦେଇଥିବା ୩୬୮ ରନ୍ର ପିଛା କରୁଥିବା ଇଂଲଣ୍ଡ ଶେଷରେ ୨୧୦ ରନ୍ରେ ଅଲଆଉଟ ହୋଇଯାଇଛି। ଭାରତ ଏହି ମ୍ୟାଚ୍କୁ ୧୫୭ ରନ୍ରେ ଜିତି ଟେଷ୍ଟ ସିରିଜ୍ରେ ୨-୦ରେ ଆଗୁଆ ହୋଇଯାଇଛି। ଏବେ ୧୦ ତାରିଖରୁ ୫ମ ତଥା ଶେଷ ଟେଷ୍ଟ ଆରମ୍ଭ ହେବ।
ଇଂଲଣ୍ଡ ବିପକ୍ଷ ପ୍ରଥମ ଟେଷ୍ଟ ଡ୍ର ରହିଥିବା ବେଳେ ଲର୍ଡସରେ ଭାରତ ଜିତିଥିଲା। କିନ୍ତୁ ତୃତୀୟ ଟେଷ୍ଟରୁ ଇଂଲଣ୍ଡ ବାଜିମାତ କରି ସିରିଜ୍କୁ ୧-୧ରେ ବରାବର କରିଦେଇଥିଲା। ଏବେ ଭାରତ ୪ର୍ଥ ମ୍ୟାଚ୍କୁ ଜିତି ପୁଣି ୨-୦ରେ ଆଗୁଆ ହୋଇଯାଇଛି।
ଭାରତ ୪ର୍ଥ ଦିବସରେ ଅଲଆଉଟ ହେବାପରେ ଇଂଲଣ୍ଡ ତା’ର ଦ୍ୱିତୀୟ ଇନିଂସ ଆରମ୍ଭ କରିଥିଲା। ଦଳର ଦୁଇ ଓପନର ରୋରୀ ବର୍ନସ ଓ ହସିବ ହମିଦ ଦମଦାର ବ୍ୟାଟିଂ କରିଥିଲେ। ୪ର୍ଥ ଦିନର ଷ୍ଟମ୍ପ ଅପସାରଣ ବେଳକୁ ଇଂଲଣ୍ଡ ବିନା ୱିକେଟରେ ୭୭ ରନ୍ କରିଥିଲା।
ପଞ୍ଚମ ଦିନରେ ଦଳକୁ ଜିତିବାକୁ ୨୯୨ ରନ୍ର ଟାର୍ଗେଟ ରହିଥିବା ବେଳେ ଭାରତକୁ ୧୦ ୱିକେଟ ଦରକାର ଥିଲା। ଆଜି ଇଂଲଣ୍ଡର ଦୁଇ ଓପ୍ନର ଭଲ ଷ୍ଟାର୍ଟ ଦେଇଥିଲେ। ବର୍ନସ ଓ ହମିଦ ପ୍ରଥମେ ଦଳୀୟ ସ୍କୋରକୁ ୧୦୦ରେ ପହଞ୍ଚାଇଥିଲେ। ଏଥିସହ ନିଜ ନିଜର ଅର୍ଦ୍ଧଶତକ ମଧ୍ୟ ହାସଲ କରିଥିଲେ। ତେବେ ବର୍ନସ୍ (୫୦) ଅର୍ଦ୍ଧଶତକ ମାରିବାର ପରବର୍ତ୍ତୀ ବଲରେ ହିଁ ପ୍ୟାଭିଲିୟନ୍ ଫେରିଥିଲେ। ତାଙ୍କୁ ଶାର୍ଦ୍ଦୁଲ ଠାକୁର ଆଉଟ୍ କରିଥିଲେ।
ତାଙ୍କ ସ୍ଥାନ ପୂରଣ କରିବାକୁ ଆସିଥିବା ଡାୱିଡ୍ ମଲାନ୍ ମାତ୍ର ୫ ରନ୍ କରିଥିବା ବେଳେ ଦୁର୍ଭାଗ୍ୟପୂର୍ଣ୍ଣ ଭାବେ ରନଆଉଟ୍ ହୋଇଥିଲେ।
ସେଟ୍ ହୋଇସାରିଥିବା ହସିବ ହମିଦ(୬୩) ଜାଡେଜାଙ୍କ ସ୍ପିନ୍ ଜାଲରେ ଫସିଯାଇଥିଲେ। ଇଂଲଣ୍ଡର ସ୍କୋର ୧୪୧ ରନରେ ଥିବା ବେଳେ ଜାଡେଜା ତାଙ୍କୁ କ୍ଲିନ୍ ବୋଲ୍ଡ କରି ଭାରତକୁ ତୃତୀୟ ସଫଳତା ଦେଇଥିଲେ।
ଏହାପରେ ୧ ରନ୍ ଭିତରେ ତିନି ୱିକେଟ୍ ହରାଇ ଭାରତ ଘରୋଇ ଦଳକୁ ବ୍ୟାକଫୁଟକୁ ଠେଲି ଦେଇଥିଲା। ପ୍ରଥମ ଇନିଂସରେ ଇଂଲଣ୍ଡ ପାଇଁ ସର୍ବାଧିକ ରନ୍ କରିଥିବା ଓଲି ପପ୍ (୨) ଓ ଜନ୍ନି ବେୟାରଷ୍ଟୋ (୦)ଙ୍କୁ ଯଶ୍ରପ୍ରୀତ ବୁମ୍ରା କ୍ଲିନବୋଲ୍ଡ କରିଥିଲେ। ସେହିପରି ସ୍ପିନ୍ ଅଲରାଉଣ୍ଡର ମୋଇନ୍ ଅଲୀ (୦)ଙ୍କୁ ପୁଣିଥରେ ଆଉଟ୍ କରିଥିଲେ ଜାଡେଜା।
ସୁପର୍ ଫର୍ମରେ ଥିବା କ୍ୟାପଟେନ୍ ଜୋ ରୁଟ୍ ଓ କ୍ରିସ୍ ଓକ୍ସ ସ୍ଥିତି ସମ୍ଭାଳିବାକୁ ପ୍ରୟାସ କରିଥିଲେ। କିନ୍ତୁ ଏହି ଯୋଡ଼ିକୁ ଭାଙ୍ଗିଥିଲେ ଶାର୍ଦ୍ଦୁଲ ଠାକୁର। ଟିମର ସ୍କୋର ୧୮୨ ଥିବା ବେଳେ ଶାର୍ଦ୍ଦୁଲ ଇନଫର୍ମ ରୁଟ୍ (୩୬)ଙ୍କୁ କ୍ଲିନ୍ ବୋଲ୍ଡ କରିଥିଲେ। ଏହା ପରେ ଓକ୍ସ (୧୮)ଙ୍କୁ ଠିକ୍ ଚା’ ପାନ ବରତି ପୂର୍ବରୁ ପ୍ୟାଭିଲିୟନ୍ ପଠାଇ ଉମେଶ ଯାଦବ ଇଂଲଣ୍ଡର ଅଷ୍ଟମ ୱିକେଟ ଝଡ଼ାଇଥିଲେ।
ଚା’ ପାନ ବିରତି ପରେ ଭାରତକୁ ଜିତିବା ପାଇଁ ୨ଟି ୱିକେଟ ଦରକାର ଥିଲା। କ୍ରେଗ ଓଭରଟନ୍ ଯଥା ସମ୍ଭବ ଭଲ ବ୍ୟାଟିଂ କରିବାକୁ ଚେଷ୍ଟା କରିଥିଲେ ହେଁ ଉମେଶ ଯାଦବ ଏହା କରିବାକୁ ଦେଇ ନଥିଲେ। ଉମେଶଙ୍କ ଗୋଟିଏ ଇନସୁଇଂ ଓଭରଟନ୍ଙ୍କ କହୁଣୀରେ ମାଡ଼ ହୋଇ ସିଧା ୱିକେରେ ବାଜିଥିଲା। ଏହି ସମୟରେ ଦଳୀୟ ସ୍କୋର ୨୦୨ ରହିଥିଲା। ଏହାପରେ ଓଲି ରବିନସନ ଲଢ଼ୁଆ ବ୍ୟାଟିଂ କରିଥିଲେ। ତେବେ ଦଳୀୟ ସ୍କୋର ୨୧୦ ରନ୍ ଥିବା ବେଳେ ଉମେଶ ଆଣ୍ଡରସନଙ୍କୁ ଆଉଟ କରି ଇଂଲିଶ ଟିମ୍ର ଇନିଂସରେ ପୂର୍ଣ୍ଣଚ୍ଛେଦ ଟାଣିଥିଲେ।
