ଭୁବନେଶ୍ୱର : ଦୀର୍ଘ ୪ବର୍ଷ ଧରି ବିଜେଡିରେ ଅଣଦେଖା ହୋଇ ପଡ଼ିରହିଥିବା ପୂର୍ବତନ ମନ୍ତ୍ରୀ ଅରବିନ୍ଦ ଢାଲିଙ୍କୁ ରାଜ୍ୟ ବିହନ ନିଗମ ଅଧ୍ୟକ୍ଷ ଭାବେ ନିଯୁକ୍ତି ମିଳିଛି । ସେ କ୍ୟାବିନେଟ୍ ମନ୍ତ୍ରୀ ପାହ୍ୟାର ସୁବିଧା ସୁଯୋଗ ପାଇବେ । ଚଳିତମାସ ୧୮ତାରିଖରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମାଲକାନଗିରି ଗସ୍ତରେ ଯାଇ ଗୁରୁପ୍ରିୟା ସେତୁ ଉଦଘାଟନ କରିବାର କାର୍ଯ୍ୟକ୍ରମ ଥିବାରୁ ତା’ପୂର୍ବରୁ ଶ୍ରୀ ଢାଲିଙ୍କୁ ଏହି ଦୁହାଁଳିଆ ନିଗମରେ ଥଇଥାନ କରାଯାଇଥିବା ଚର୍ଚ୍ଚା ।
୧୧ତାରିଖ ସନ୍ଧ୍ୟାରେ ରାଜ୍ୟ ବିହନ ନିଗମ ଅଧ୍ୟକ୍ଷ ତଥା ବିଜେଡିର ପୁରୁଖା ନେତା ଯୋଗେନ୍ଦ୍ର ତ୍ରିପାଠୀଙ୍କୁ ଏହି ପଦରୁ ଇସ୍ତଫା ଦେବାକୁ କୁହାଯିବା ପରେ ତାଙ୍କ ସ୍ଥାନରେ ଶ୍ରୀ ଢାଲିଙ୍କୁ ନିଯୁକ୍ତି ମିଳିଛି । ଶ୍ରୀ ଢାଲିଙ୍କର ମାଲକାନଗିରି ଜିଲ୍ଲାରେ ଥିବା ବଙ୍ଗୀୟ ଭୋଟ୍ ଉପରେ ବେଶ୍ ପ୍ରଭାବ ରହିଛି । ଜିଲ୍ଲାରେ ଦୁର୍ବଳ ହୋଇପଡ଼ିଥିବା ବିଜେଡି ସଂଗଠନକୁ ସକ୍ରିୟ କରିବା ପାଇଁ ତାଙ୍କୁ ଥଇଥାନ କରାଯାଇଥିବା ଦଳୀୟ ସୂତ୍ରରୁ ଜଣାପଡ଼ିଛି ।
