ଭୁବନେଶ୍ୱର: ବିଜୁ ସ୍ୱାସ୍ଥ୍ୟ କଲ୍ୟାଣକୁ ନେଇ ବିଜେପି ଯେଉଁ ଅଭିଯୋଗ କରୁଛି ତାହା ସମ୍ପୂର୍ଣ୍ଣ ମିଥ୍ୟା ଓ କପୋଳକଳ୍ପିତ । ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଓ ଆୟୁଷ୍ମାନ ଭାରତ ଯୋଜନାରେ କୌଣସି ସମାନତା ନାହିଁ । ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ହେଉଛି ଏକ ଆସ୍ୟୁରାନ୍ସ ସ୍କିମ୍ , ଆଉ ଆୟୁଷ୍ମାନ ଭାରତ ହେଉଛି ଇନ୍ସ୍ୟୁରାନ୍ସ ସ୍କିମ୍ । ବିଜେପି ଏବେ ଯେଉଁ ସ୍ୱାସ୍ଥ୍ୟ ଯୋଜନା କାର୍ଯ୍ୟକାରୀ କରିବାକୁ ଯାଉଛି, ବିଜେଡି ୨୦୧୪ ସାଧାରଣ ନିର୍ବାଚନରେ ତା’ର ପରିକଳ୍ପନା କରିଥିଲା । ବିଜେଡି ନିଜର ନିର୍ବାଚନୀ ଇସ୍ତାହାରରେ ରାଜ୍ୟବାସୀଙ୍କୁ ସ୍ୱାସ୍ଥ୍ୟ ସୁବିଧା ଯୋଗାଇବାକୁ ପ୍ରତିଶ୍ରୁତି ଦେଇଥିଲା । ଯାହାକୁ ଓଡ଼ିଶା ସରକାର କାର୍ଯ୍ୟକାରୀ ପାଇଁ ନିଷ୍ପତ୍ତି ନେଇଛନ୍ତି ବୋଲି ବିଜେଡି କହିଛି ।
ଆଜି ଦଳର ମୁଖ୍ୟାଳୟରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ବିଜେଡି ମୁଖପାତ୍ର ତଥା ସାଂସଦ ପ୍ରତାପ ଦେବ କହିଛନ୍ତି ଯେ, କେନ୍ଦ୍ର ସରକାର ତାଙ୍କ ଶେଷବେଳକୁ ସମ୍ବିଧାନ ପ୍ରଣେତା ଭୀମରାଓ ଆମ୍ବେଦକରଙ୍କ ଜୟନ୍ତୀ ଦିନ ପ୍ରଧାନମନ୍ତ୍ରୀ ଏହିଭଳି ଏକ ଯୋଜନା ହେବ ବୋଲି ଘୋଷଣା କରିଥିଲେ, ଯାହା ତାକୁ ବଜେଟରେ ରୂପାୟନ ଦେଇଥିଲେ । କିନ୍ତୁ କେବେ ହେବ, କେଉଁ ପ୍ରକାର ହେବ ତାହା ଏ ପର୍ଯ୍ୟନ୍ତ ଲୋକଙ୍କ ପାଖରେ ଉପସ୍ଥାପିତ କରିପାରି ନାହାନ୍ତି । ଏବେ କେନ୍ଦ୍ରର ଆୟୁଷ୍ମାନ ଯୋଜନା ଓ ରାଜ୍ୟର ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଭିତରେ ଗୋଟିଏ ମୌଳିକ ପ୍ରାର୍ଥକ୍ୟ ରହିଛି, ଯାହା ଦୁଇଟିଯାକ ଯୋଜନା ଏକାଭଳିଆ ନୁହେଁ । ଆୟୁଷ୍ମାନ ଯୋଜନା ବୀମା ଆଧାରିତ ଯୋଜନା, ଯାହା କେନ୍ଦ୍ର ସରକାର ୬୦ ଭାଗ ଅର୍ଥ ଦେଉଥିବା ବେଳେ ରାଜ୍ୟ ସରକାର ଏଥିରେ ୪୦ ଭାଗ ଅର୍ଥ ଦେବେ । ହିତାଧିକାରୀଙ୍କୁ ଚୟନ କରିବା, ସର୍ବେକ୍ଷଣ ଭଳି ଯଦି ରାଜ୍ୟର ଅନ୍ୟାନ୍ୟ ଆନୁଷଙ୍ଗିକ ଉପକରଣଗୁଡିକୁ ଯୋଡ଼ିବେ, ତେବେ ଏହା ୫୦:୫୦ ଅନୁପାତକୁ ଆସିଯିବ । ଅପରପକ୍ଷରେ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଆଶ୍ୱାସନା ଭିତ୍ତିକ ଯୋଜନା । ରାଜ୍ୟ ସରକାର ଯେଉଁ ଯୋଜନା କରିଛନ୍ତି, ସେଥିରେ ଜଣେ ନାଗରିକ ସିଧାସଳଖ ଉପକୃତ ହୋଇପାରିବ । ଏଥିରେ କୌଣସି ବୀମା କରିବାକୁ ପଡିବ ନାହିଁ । ଗୋଟିଏ ଯୋଜନାରେ ଜଣେ ହିତାଧିକାରୀ ସିଧାସଳଖ ଉପକୃତ ହେଉଥିବା ବେଳେ ଅନ୍ୟ ଯୋଜନାରେ ବୀମା ମାଧ୍ୟମରେ ଉପକୃତ ହେଉଛି, ଯାହା ଏହି ଦୁଇଟି ଯୋଜନା ମଧ୍ୟରେ ପ୍ରାର୍ଥକ୍ୟ । କେନ୍ଦ୍ର ସରକାର ୨୦୧୧ ଏସ୍ଇସିସି ତାଲିକା ଅନୁସାରେ ଆୟୁଷ୍ମାନ ଭାରତ ଯୋଜନା କାର୍ଯ୍ୟକାରୀ ପାଇଁ ନିଷ୍ପତ୍ତି ନେଇଥିବାରୁ ବହୁ ଗରିବ ଲୋକଙ୍କୁ ସ୍ୱାସ୍ଥ୍ୟସେବାରୁ ବଞ୍ôଚତ ହେବାକୁ ପଡ଼ିବ । କେନ୍ଦ୍ର ସରକାର ପ୍ରଥମେ ୪୮ଲକ୍ଷ ଓ ପରେ ୬୧ଲକ୍ଷ ପରିବାରକୁ ସାମିଲ କରିବାକୁ କହିଲେ । କିନ୍ତୁ ବିଜୁ ସ୍ୱାସ୍ଥ୍ୟ କଲ୍ୟାଣରେ ସିଧାସଳଖ ୭୦ଲକ୍ଷ ପରିବାର ସାମିଲ ହେଉଛନ୍ତି । କେନ୍ଦ୍ର ସରକାର ଆୟୁଷ୍ମାନ ଯୋଜନା ପାଇଁ ଏ ପର୍ଯ୍ୟନ୍ତ ତାରିଖ ଘୋଷଣା କରିନାହାନ୍ତି । ଏହା ଏକ ସମୟସାପେକ୍ଷ କାର୍ଯ୍ୟଧାରା । ନିର୍ବାଚନର କିଛି ମାସ ପୂର୍ବରୁ ଏହାକୁ କାର୍ଯ୍ୟକାରୀ କରାଇବା ନିଶ୍ଚିତ ଏକ ବିରାଟ ପ୍ରଶ୍ନବାଚୀ ସୃଷ୍ଟି କରିଛି । ରାଜ୍ୟ ମୁଖ୍ୟ ସଚିବ କେନ୍ଦ୍ର ସରକାରଙ୍କୁ ଏକ ଚିଠି ଜରିଆରେ ୯ଲକ୍ଷ ପରିବାର ଆୟୁଷ୍ମାନ ଯୋଜନାରୁ ବାଦ୍ ପଡିବେ ବୋଲି ଆଶଙ୍କା କରିଥିଲେ । ରାଜ୍ୟ ସରକାର ୩ଟି ପ୍ରସ୍ତାବ ଦେଇଥିଲେ କିନ୍ତୁ କେନ୍ଦ୍ର ସରକାର ଏହାକୁ ଅଗ୍ରାହ୍ୟ କରିଦେଇଥିଲେ । ତେଣୁ ରାଜ୍ୟ ସରକାରଙ୍କ ଏହି ନିଜସ୍ୱ ଯୋଜନା ରାଜ୍ୟର ଗରିବ ହିତାଧିକାରୀଙ୍କ ପାଇଁ ସମ୍ପୂର୍ଣ୍ଣ ଫିଟ୍ ହେବ ବୋଲି ବିଜେଡି ଦାବି କରିଛି । ତେଣୁ ଗୋଟିଏ ଯୋଜନା ଆସିବା ଆଗରୁ ତାକୁ ନିନ୍ଦା ଓ ସମାଲୋଚନା କରିବା କଦାପି ଗ୍ରହଣଯୋଗ୍ୟ ନୁହେଁ । ଏହି ସାମ୍ବାଦିକ ସମ୍ମିଳନୀରେ ମୁଖପାତ୍ର ଡ. ସସ୍ମିତ ପାତ୍ର ଉପସ୍ଥିତ ଥିଲେ ।
