ଭୁବନେଶ୍ୱର୍ : ବ୍ଲାକ୍ ରୋଜ୍ ଜାହାଜ ବୁଡ଼ି ଘଟଣାର ସିବିଆଇ ତଦନ୍ତ ଦାବିକୁ ବିଜେଡି ବିରୋଧ କରିଛି । ବ୍ଲାକ୍ ରୋଜ୍ ଘଟଣାର କ୍ରାଇମବ୍ରାଞ୍ଚ ତଦନ୍ତ କରିଥିବାବେଳେ ଏହି ମାମଲାକୁ ପୁଣିଥରେ ସିବିଆଇକୁ ହସ୍ତାନ୍ତର କରାଯିବା ରାଜନୀତିକ ଉଦ୍ଦେଶ୍ୟ ପ୍ରଣୋଦିତ ବୋଲି ବିଜେଡି କହିଛି ।
ବିଜେଡି ମୁଖପାତ୍ର ତଥା ସାଂସଦ ପ୍ରତାପ କେଶରୀ ଦେବ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି ଯେ ବ୍ଲାକ୍ ରୋଜ୍ ଜାହାଜ ବୁଡ଼ି ଘଟଣାର ତଦନ୍ତ କ୍ରାଇମବ୍ରାଞ୍ଚ କରି ଫାଇନାଲ ଚାର୍ଜସିଟ୍ କୋର୍ଟରେ ଦାଖଲ କରିସାରିଛି । ଏବେ ମାମଲା କୋର୍ଟଙ୍କ ବିଚାରାଧୀନ ରହିଥିବାବେଳେ ସିବିଆଇକୁ ତଦନ୍ତ ଦାୟିତ୍ୱ ଦିଆଯିବାର ଉଦ୍ଦେଶ୍ୟ କ’ଣ? ଆଉ ପୁଣି ଜାହାଜ ଚଳାଚଳ ମନ୍ତ୍ରଣାଳୟ ଦ୍ୱାରା ସିବିଆଇକୁ ଯେଉଁ ଚିଠି ଲେଖାଯାଇଛି ସେଥିରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସୁପାରିସ୍ କଥା ଉଲ୍ଲେଖ ରହିଛି । ତେଣୁ ଏହା ପଛରେ ରାଜନୀତି ଥିବା ଜଳଜଳ ଦେଖାଯାଉଛି । ଗତ ୪ବର୍ଷ ହେଲା କେନ୍ଦ୍ର ସରକାର ଏହି ମାମଲାରେ କାହିଁକି ତତ୍ପରତା ଦେଖାଉନଥିଲେ । ଏବେ କାହିଁକି ଦେଖାଉଛନ୍ତି ବୋଲି ଶ୍ରୀ ଦେବ ପ୍ରଶ୍ନ କରିଛନ୍ତି । ଏପଟେ ବ୍ଲକ୍ ରୋଜ୍ ବୁଡ଼ି ଘଟଣାର ସିବିଆଇ ତଦନ୍ତ ଉପରେ ପ୍ରତିକ୍ରିୟା ଦେଇ ପାରାଦୀପ ବିଧାୟକ ଡାକ୍ତର ଦାମୋଦର ରାଉତ କହିଛନ୍ତି ଯେ, କ୍ରାଇମବ୍ରାଞ୍ଚ ତଦନ୍ତ କଲା କିନ୍ତୁ ଜାହାଜର ମାଲିକ କିଏ ଓ କାହାର ମାଲ୍ ସେଥିରେ ବିଦେଶ ଯାଉଥିଲା ତାହା ଜାଣିପାରିଲା ନାହିଁ । କିମ୍ବା ମାଲିକ ଓ ମାଲ ପଠାଉଥିବା ଲୋକଙ୍କୁ ବି ଖୋଜିଲା ନାହିଁ । କିନ୍ତୁ ହରିଦାସପୁରର ଜଣେ ସାଧାରଣ ଲୋକ ସୂଚନା ଅଧିକାର ଆଇନ ବଳରେ ତଥ୍ୟ ମାଗି ଜାହାଜର ମାଲିକ କିଏ, କାହାର ମାଲ୍ ଯାଉଥିଲା ସବୁ ତଥ୍ୟ ପାଇଗଲେ । ପୂର୍ବରୁ ସେ ଏହି କଥା କହି କିଛି ଲୋକଙ୍କ ରୋଷର ଶିକାର ହୋଇଛନ୍ତି । ଏବେ ଯଦି ସିବିଆଇ ତାଙ୍କୁ ଏନେଇ ପଚାରିବ ସେ ନିଶ୍ଚିତ ଭାବେ ଯାହା ଜାଣିଛନ୍ତି ତାହା କହିବେ ବୋଲି ଡାକ୍ତର ରାଉତ କହିଛନ୍ତି ।
