ଭୁବନେଶ୍ୱର: ମହାନଦୀ ପ୍ରସଙ୍ଗରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ୟୁ-ଟର୍ଣ୍ଣ ପରେ ବିଜେପିକୁ ଘେରିବା ପାଇଁ ବିଜେଡି ଏହାକୁ ନୂଆ ଅସ୍ତ୍ର କରିଛି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, କେନ୍ଦ୍ର ସରକାର ଓ ଛତିଶଗଡ଼ ମୁଖ୍ୟମନ୍ତ୍ରୀ ରମଣ ସିଂଙ୍କଠାରୁ ଆରମ୍ଭ କରି ରାଜ୍ୟର ଅନ୍ୟ ବିଜେପି ନେତାମାନେ ବାରମ୍ବାର ମହାନଦୀ ପ୍ରସଙ୍ଗରେ ମତ ପରିବର୍ତ୍ତନ କରୁଛନ୍ତି। ଏମିତି କି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ମହାନଦୀ ଟ୍ରିବ୍ୟୁନାଲ୍ ନେଇ କଟକରେ ମିଥ୍ୟା ତଥ୍ୟ ଉପସ୍ଥାପନ କଲେ ବୋଲି ବିଜେଡି ଅଭିଯୋଗ କରିଛି। ବିଜେପି ଓ କେନ୍ଦ୍ରର ଏହା ଦୋମୁହାଁ ନୀତି । ମହାନଦୀ ମହାସଂଗ୍ରାମ ଚାଲିଛି ଓ ଚାଲିବ । ଆଗକୁ ଏହାର ତୃତୀୟ ପର୍ଯ୍ୟାୟ ଆନ୍ଦୋଳନ କରାଯିବ । ଆଜି ବିଜେଡି ପକ୍ଷରୁ ରାଜ୍ୟ କାର୍ଯ୍ୟାଳୟରେ ଏକ ସାମ୍ବାଦିକ ସମ୍ମିଳନୀରେ ଉପସଭାପତି ଦେବୀ ପ୍ରସାଦ ମିଶ୍ର, ମୁଖପାତ୍ର ପ୍ରତାପ କେଶରୀ ଦେବ ଓ ସାଧାରଣ ସଂପାଦକ ସଂଜୟ କୁମାର ଦାସବର୍ମା ଏହି ସୂଚନା ଦେଇଛନ୍ତି ।
ବିଭିନ୍ନ ସମୟରେ କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ, ବିଜେପିର ରାଜ୍ୟ ପ୍ରଭାରୀ, ରାଜ୍ୟ ସଭାପତି, ଏପରିକି କେନ୍ଦ୍ର ବିଭାଗୀୟ ମନ୍ତ୍ରୀମାନଙ୍କ ମତ କାହା ସହିତ କାହାର ମେଳ ଖାଉନାହିଁ । ଏହି ଅଢ଼େଇ ବର୍ଷ ଭିତରେ କୌଣସି ସ୍ତରରେ ବିଜେପିର ମତ ଏକ ହୋଇପାରି ନାହିଁ । ଏଥିରୁ ସ୍ପଷ୍ଟ ହେଉଛି ବିଜେପିର କୌଣସି ନେତୃବୃନ୍ଦଙ୍କ ଓଡ଼ିଶା କିମ୍ବା ମହାନଦୀ ଉପରେ ସେମାନଙ୍କର କୌଣସି ନିଘା ନାହିଁ । ଶ୍ରୀ ପ୍ରଧାନ ରମଣ ସିଂହଙ୍କ ଉପରେ ଯେଉଁ ଟିପ୍ପଣୀ ରଖିଛନ୍ତି ଯେ ଛତିଶଗଡ଼ ମୁଖ୍ୟମନ୍ତ୍ରୀ ଭୁଲ୍ କଥା କହିଛନ୍ତି, ସେହି ଟିପ୍ପଣୀରେ ଆମର କୌଣସି ଲାଭ ହେବ ନାହିଁ । ସେହି ପରାମର୍ଶ ସେ ଛତିଶଗଡ଼ ମୁଖ୍ୟମନ୍ତ୍ରୀଙ୍କୁ ଦିଅନ୍ତୁ, କି ଛତିଶଗଡ଼ ବେଆଇନ୍ ନିର୍ମାଣବନ୍ଦ କରୁ, ଅଣମୌସୁମୀ ସମୟରେ କଲ୍ମା ବ୍ୟାରେଜ୍ର ୬୫ଟି ଗେଟ୍ ଖୋଲୁ । ସରକାର ନ୍ୟାୟିକ ଲଢ଼େଇ ଲଢ଼ୁଛନ୍ତି, ବିଜୁ ଜନତା ଦଳ ଯେଉଁ ଜନମତ ଲଢ଼େଇ ଲଢ଼ୁଛି, ସେଥିରେ ବିଜେପି ସାମିଲ ହେଉ । ରାଜ୍ୟ ବିଜେପି ଛତିଶଗଡ଼ ସରକାରକୁ ପରାମର୍ଶ ଦେଇ ରାଜ୍ୟର ସ୍ୱାର୍ଥ ଓ ମହାନଦୀ ପ୍ରତି ଥିବା ପ୍ରତିବଦ୍ଧତା ପ୍ରକାଶ କରୁ । ଭାରତବର୍ଷରେ ଗଣତନ୍ତ୍ରର ଧାରା ଯେଉଁଭଳି କଡ଼ ଲେଉଟାଣି, ନିକଟରେ ଅନୁଷ୍ଠିତ ସମସ୍ତ ଉପ-ନିର୍ବାଚନରେ ବିଜେପିକୁ ଯେଭଳି ଜନସାଧାରଣ ପ୍ରତ୍ୟାଖ୍ୟାନ କଲେଣି, ସେହି ଭୟରେ କେନ୍ଦ୍ରମନ୍ତ୍ରୀ ବିବ୍ରତ ହୋଇ ରମଣ ସିଂହଙ୍କ ବିଷୟରେ ଯେଉଁ ଟିପ୍ପଣୀ ଦେଇଛନ୍ତି, ତାହା ରାଜ୍ୟର ସ୍ୱାର୍ଥ ପାଇଁ ଉଦ୍ଦିଷ୍ଟ ନୁହେଁ, କେବଳ ରାଜ୍ୟରେ ନିଜର ଦଳକୁ ବଞ୍ଚାଇ ରଖିବା ପାଇଁ ଉଦ୍ଦିଷ୍ଟ । ନିକଟରେ ଦ୍ୱିତୀୟ ପର୍ଯ୍ୟାୟ ମହାନଦୀ ପାଇଁ ମହାସଂଗ୍ରାମ ଯାତ୍ରା ଶେଷ ହୋଇଛି, ଏବଂ ତୃତୀୟ ପର୍ଯ୍ୟାୟ ମହାସଂଗ୍ରାମ ପାଇଁ ଖୁବ୍ଶୀଘ୍ର ରୂପରେଖ ପ୍ରସ୍ତୁତ ହେବ । ଯେତେଦିନ ପର୍ଯ୍ୟନ୍ତ ମହାନଦୀର ସୁରକ୍ଷା ନହୋଇଛି ଏବଂ ଜନସାଧାରଣ ତାଙ୍କ ନ୍ୟାଯ୍ୟ ହକ୍ ପାଇନାହାନ୍ତି, ସେ ପର୍ଯ୍ୟନ୍ତ ବିଜୁ ଜନତା ଦଳ ରାଜରାସ୍ତାରେ ଲଢ଼େଇ ଜାରି ରଖିବ ବୋଲି ଆଜି ବିଜୁ ଜନତା ଦଳ ରାଜ୍ୟ କାର୍ଯ୍ୟାଳୟରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଦଳର ଉପ-ସଭାପତି ଶ୍ରୀ ମିଶ୍ର, ମୁଖପାତ୍ର ଶ୍ରୀ ଦେବ ଓ ସାଧାରଣ ସଂପାଦକ ଶ୍ରୀ ଦାସବର୍ମା କହିଛନ୍ତି ।
