ଭୁବନେଶ୍ୱର : ତୈଳ ଦର ବୃଦ୍ଧି ପ୍ରତିବାଦରେ ବିଜେଡି ରାଜ୍ୟବ୍ୟାପୀ ବିକ୍ଷୋଭ ଓ ପ୍ରତିବାଦ ସଭା କରିବା ପରେ କଂଗ୍ରେସ ଏବେ ରାଜରାସ୍ତାକୁ ଓହ୍ଲାଇବାକୁ ନିଷ୍ପତି ନେଇଛି । ଦଳ ଆସନ୍ତା ୪ତାରିଖରେ କଟକ ଓ ଭୁବନେଶ୍ୱର ସହରରେ ସକାଳ ୬ଟାରୁ ଅପରାହ୍ନ ୧୨ଟା ପର୍ଯ୍ୟନ୍ତ ଚକାବନ୍ଦ ଆନ୍ଦୋଳନ ଡାକରା ଦେଇଛି ।
ଓଡ଼ିଶା ପିସିସି ସଭାପତି ନିରଞ୍ଜନ ପଟ୍ଟନାୟକ ଏନେଇ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ତୈଳ ଦର ଅହେତୁକ ମୂଲ୍ୟ ବୃଦ୍ଧି ପ୍ରତିବାଦରେ କଂଗ୍ରେସ ପକ୍ଷରୁ ସୋମବାର କଟକ ଓ ଭୁବନେଶ୍ୱର ସହରରେ ଚକାବନ୍ଦ କାର୍ଯ୍ୟକ୍ରମ ପାଳନ କରାଯିବ । ଏହି ଦୁଇ ସହରର ଲୋକମାନଙ୍କୁ ସୋମବାର ଦିନ ସକାଳ ୬ଟାରୁ ୧୨ଟା ପର୍ଯ୍ୟନ୍ତ ଗାଡ଼ିମୋଟର ଚଳାଚଳ ନକରିବା ପାଇଁ ନିବେଦନ କରାଯାଇଛି । ବାରମ୍ବାର ବଢ଼ୁଥିବା ତୈଳ ଦର ପ୍ରତିବାଦରେ କଂଗ୍ରେସ ଏହି କାର୍ଯ୍ୟକ୍ରମ ଡାକରା ଦେଇଛି । ତେବେ ଏହି କାର୍ଯ୍ୟକ୍ରମରେ ଲୋକଙ୍କୁ ସ୍ୱତଃ ସାମିଲ ହେବା ପାଇଁ ନିବେଦନ କରାଯାଉଛି । ଅନ୍ୟପକ୍ଷରେ ବିଜେଡି ମୁଖପାତ୍ର ପ୍ରତାପ କେଶରୀ ଦେବ ଏ ସମ୍ପର୍କରେ ପ୍ରତିକ୍ରିୟା ଦେଇ କହିଛନ୍ତି ଯେ, କଂଗ୍ରେସ ଏକ ରାଜନୀତିକ ଦଳ । ତୈଳ ଦର ବୃଦ୍ଧି ପ୍ରତିବାଦରେ ସେମାନେ ଏକ ରାଜନୀତିକ ଦଳ ଭାବେ କିଛି କାର୍ଯ୍ୟକ୍ରମ ହାତକୁ ନେଇପାରିବେ । ବିଜେଡି ପୂର୍ବରୁ ରାଜ୍ୟବ୍ୟାପୀ ଏହି ପ୍ରସଙ୍ଗରେ କାର୍ଯ୍ୟକ୍ରମ କରିସାରିଛି । ତେଣୁ କଂଗ୍ରେସର ଆନ୍ଦୋଳନ ସହ ବିଜେଡିର କିଛି ସାମଞ୍ଜସ୍ୟ ନାହିଁ । ବିଜେଡି ଏହାକୁ ସମର୍ଥନ କରିବ କି ବୋଲି ପ୍ରଶ୍ନକୁ ଶ୍ରୀ ଦେବ ଏଡ଼ାଇ ଯାଇଥିଲେ । ଅନ୍ୟପକ୍ଷରେ ନିର୍ଭରଯୋଗ୍ୟ ସୂତ୍ରରୁ ମିଳିଥିବା ସୂଚନା ଅନୁସାରେ କେନ୍ଦ୍ରରେ ବିଜେପି ନେତୃତ୍ୱାଧୀନ ସରକାର ଉପରେ ଚାପ ସୃଷ୍ଟି କରିବା ନିମନ୍ତେ କଂଗ୍ରେସର ଏହି ଚକାବନ୍ଦ କାର୍ଯ୍ୟକ୍ରମକୁ ବିଜେଡି ପ୍ରଚ୍ଛଦ ପଟ୍ଟରେ ରହି ସଫଳ କରିବାକୁ ରଣନୀତି ପ୍ରସ୍ତୁତ କରିଛି । କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଓଡ଼ିଶାର ହୋଇଥିବାରୁ କଂଗ୍ରେସ ଓ ବିଜେଡି ତୈଳ ଦର ବୃଦ୍ଧିର ପ୍ରତିବାଦ ଜଣାଇବା ଆଳରେ ତାଙ୍କ ବିରୋଧରେ ମାହୋଲ୍ ପ୍ରସ୍ତୁତ କରିବାରେ ଲାଗିଥିବା ପଡ଼ିଥିବା ଜଣାପଡ଼ିଛି ।
