ଭୁବନେଶ୍ବର,(ଓଡ଼ିଶା ୱେୟାର): ବହୁ ଚର୍ଚ୍ଚିତ ଏସିଏଫ ସୌମ୍ୟରଞ୍ଜନ ମୃତ୍ୟୁ ମାମଲାରେ ଏକ ବଡ଼ ଖୁଲାସା କରିଛି କ୍ରାଇମବ୍ରାଞ୍ଚ। କ୍ରାଇମବ୍ରାଞ୍ଚ ଏଡ଼ିଜି ସଞ୍ଜିବ ପଣ୍ଡା ଏକ ସାମ୍ବାଦିକ ସମ୍ମିଳନୀରେ ସୌମ୍ୟଙ୍କ ମୃତ୍ୟୁ ସମ୍ବନ୍ଧୀୟ ତଥ୍ୟ ପ୍ରଦାନ କରିଛନ୍ତି। କ୍ରାଇମବ୍ରାଞ୍ଚ କହିଛି କି, ସୌମ୍ୟଙ୍କ ମୃତ୍ୟୁ ଏକ ଦୁର୍ଘଟଣାଜନିତ। ଏଥିରେ କାହାର କୌଣସି ପ୍ରକାର ସମ୍ପୃକ୍ତି ନାହିଁ ବୋଲି କ୍ରାଇମବ୍ରାଞ୍ଚ ଏଡ଼ିଜି ସୂଚନା ଦେଇଛନ୍ତି। ଟିକିନିଖି ଛାନଭିନ, ଲାଏ ଡିଟେକ୍ସନ ରିପୋର୍ଟ ଓ ସାକ୍ଷ୍ୟଙ୍କ ପ୍ରମାଣକୁ ପୁଙ୍ଖାନୁପୁଙ୍ଖ ଯାଞ୍ଚ ପରେ ଏହା ଏକ ଦୁର୍ଘଟଣାଜନିତ ମୃତ୍ୟୁ ବୋଲି କ୍ରାଇମବ୍ରାଞ୍ଚ କହିଛି।
ସେ ଆହୁରି ମଧ୍ୟ କହିଛନ୍ତି କି ଏସିଏଫଙ୍କ ମୃତ୍ୟୁ ତାଙ୍କ ବାସଭବନରେ ଘଟିଥିଲା। ସୌମ୍ୟଙ୍କ ମୃତ୍ୟୁ କାଳୀନ ଜମାନବନ୍ଦୀ ଓ ତଦନ୍ତରୁ ଏହା ଏକ ଦୁର୍ଘଟଣାଜନିତ ବୋଲି ସେ କହିଛନ୍ତି। ତାଙ୍କ ମୃତ୍ୟୁରେ ଡିଏଫଓ ଓ ରୋଷେୟାଙ୍କର କୌଣସି ସମ୍ପର୍କ ନାହିଁ। ଏପରିକି ଡିଏଫଓ ଓ ବିଦ୍ୟାଭାରତୀଙ୍କ ମଧ୍ୟରେ ଯେଉଁ ସମ୍ପର୍କ ନେଇ ଚର୍ଚ୍ଚା ଜୋର ଧରିଥିଲା, ତାହା ମଧ୍ୟ ଏକ ଗୁଜବ ଥିଲା ବୋଲି ସେ କହିଛନ୍ତି।
ତେବେ ସୌମ୍ୟଙ୍କ ମୃତ୍ୟୁ ସମୟରେ ପତ୍ନୀ ବିଦ୍ୟାଭାରତୀ ଅବହେଳା କରିଛନ୍ତି ବୋଲି ତଦନ୍ତ ବେଳେ ଜଣାପଡିଛି। ସୌମ୍ୟଙ୍କ ଦେହରେ ନିଆଁ ଲାଗିଥିବା ବେଳେ ପତ୍ନୀ ବିଦ୍ୟାଭାରତୀ ନିଆଁ ଲିଭାଇନଥିଲେ ବୋଲି ଏଡିଜି ସୂଚନା ଦେଇଛନ୍ତି। ଫଳରେ ଏନେଇ ତାଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ଦେଇଛନ୍ତି। ଏନେଇ ବିଦ୍ୟାଙ୍କ ନାଁରେ ୨୮୫, ୩୦୪(ଏ) ଧାରାରେ ମାମଲା ରୁଜୁ ହୋଇଥିବା ଏଡିଜି ଶ୍ରୀ ପଣ୍ଡା ସୂଚନା ଦେଇଛନ୍ତି।
