ଭୁବନେଶ୍ୱର(ଓଡବ୍ଲ୍ୟୁ): ବିଶ୍ୱକପ୍ ହକି ମ୍ୟାଚ ପୂର୍ବରୁ ଭୁବନେଶ୍ୱର ସହରରେ ଆଜିଠୁ ମାଗଣା ୱାଇଫାଇ ସୁବିଧା ଆରମ୍ଭ ହୋଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସ୍ମାର୍ଟସିଟି ପ୍ରକଳ୍ପର ଏହି ମାଗଣା ୱାଇଫାଇ ସୁବିଧାର ଶୁଭାରମ୍ଭ କରିଛନ୍ତି । ପ୍ରଥମ ପର୍ଯ୍ୟାୟରେ ସହରରେ ୧୦୦ଟି ୱାଇଫାଇ ହଟସ୍ପଟ୍ ଓ ୨୭୫ ଆକସେସ୍ ପଏଂଟ ମାଧ୍ୟମରେ ଏହି ସୁବିଧା ପାଇପାରିବେ ।
ଏହି ମାଗଣା ୱାଇଫାଇ ସୁବିଧା ଆଗାମୀ ଦନରେ ସମସ୍ତ ମହାନଗର ନିଗମ ଓ ପୁରୀ ସହରରେ ଉପଲବ୍ଧ ହେବ ବୋଲି ମୁଖ୍ୟମନ୍ତ୍ରୀ କହିଛନ୍ତି । ଏହି ୱାଇଫାଇ ସୁବିଧା ମାଧ୍ୟମରେ ଭୁବନେଶ୍ୱର ସହରରେ ଜଣେ ମୋବାଇଲ ଗ୍ରାହକଙ୍କୁ ଦୈନିକ ୨ଏମବିିପିଏସ୍ ସ୍ପିଡରେ ୨୫୦ଏମବି ମାଗଣା ଡାଟା ପାଇପାରିବେ । ମାତ୍ର ଏଥିପାଇଁ ଗ୍ରାହକଙ୍କୁ ପ୍ରଥମେ ନିଜର ମୋବାଇଲ ପଞ୍ଜିକରଣ କରିବାକୁ ପଡ଼ିବ । ଗୋଟିଏ ୱାଇଫାଇ ହଟସ୍ପଟ ଅଧୀନରେ ସର୍ବାଧିକ ୧୫୦ଜଣ ଏକକାଳୀନ ଇଂଟରନେଟ ଉପଯୋଗ କରିପାରିବେ । ସହରର ୮୦ କିମି ଲମ୍ବ ମୁଖ୍ୟ ରାସ୍ତାରେ ଏହି ସେବା ଉପଲବ୍ଧ ହେବ । ଭୁବନେଶ୍ୱରର ସମସ୍ତ ପ୍ରମୁଖ ରାସ୍ତା ଯଥା ଏୟାରପୋର୍ଟ ଛକରୁ ରାଜଭବନ ଦେଇ କିଟ ଛକ ପର୍ଯ୍ୟନ୍ତ, ଆଚାର୍ଯ୍ୟ ବିହାରରୁ ଏଜି ଛକ, ବାଣୀବିହାରରୁ ଶିଶୁଭବନ ଛକ ଓ ନାଲକୋ ଛକରୁ ଆଚାର୍ଯ୍ୟ ବିହାର ଛକ ପର୍ଯ୍ୟନ୍ତ ଏବେ ଏହି ସୁବିଧା ଉପଲବ୍ଧ ହେବ । ଆଗାମୀ ଦିନରେ କଟକ, ବ୍ରହ୍ମପୁର, ରାଉରକେଲା, ସମ୍ବଲପୁର ଓ ପୁରୀ ସହରରେ ଏହି ମାଗଣା ୱାଇଫାଇ ସେବା କାର୍ଯ୍ୟକାରୀ ହେବ ବୋଲି ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କହିଛନ୍ତି ।
