ଭୁବନେଶ୍ୱର : ସମବାୟ ମନ୍ତ୍ରୀ ସୂର୍ଯ୍ୟନାରାୟଣ ପାତ୍ର ଭିଡିଓ କନ୍ଫରେନ୍ସିଂ ମାଧ୍ୟମରେ ଆଜି ରାଜ୍ୟର ସମସ୍ତ ଜିଲ୍ଲା ଯୋଗାଣ ଅଧିକାରୀ, ସହକାରୀ ଯୋଗାଣ ଅଧିକାରୀ, ସମବାୟ ସମିତି ସମୂହର ଉପନିବନ୍ଧକ ଓ ସହକାରୀ ନିବନ୍ଧକ ଏବଂ କେନ୍ଦ୍ର ସମବାୟ ବ୍ୟାଙ୍କର ପରିଚାଳକମାନଙ୍କୁ ୨୦୧୮-୧୯ ବର୍ଷ ପାଇଁ ଧାନ କ୍ରୟ ଉଦ୍ଦେଶ୍ୟରେ ଚାଷୀମାନଙ୍କ ନାମ ତୁରନ୍ତ ପଞ୍ଜୀକରଣ କରିବାକୁ ନିର୍ଦ୍ଦେଶ ଦେଇଛନ୍ତି । ଗତ ୨୦୧୭ ଖରିଫ୍ ଋତୁରେ ୧୧ଲକ୍ଷ ୨୦ ହଜାର ୨୪୪ ଜଣ ଚାଷୀ ପଞ୍ଜୀକୃତ ହୋଇଥିବାବେଳେ ଚଳିତ ବର୍ଷ ୧୫ ଲକ୍ଷ ଚାଷୀଙ୍କୁ ପଞ୍ଜୀକୃତ କରିବା ପାଇଁ ଲକ୍ଷ୍ୟ ରଖାଯାଇଛି । ଏଥିରେ ଅଧିକରୁ ଅଧିକ କ୍ଷୁଦ୍ର ଓ ନାମମାତ୍ର ଚାଷୀଙ୍କୁ ସାମିଲ କରିବା ସହ ପ୍ରକୃତ ଚାଷୀଙ୍କୁ ପଞ୍ଜୀକୃତ କରିବା ପାଇଁ ନିର୍ଦ୍ଦେଶ ଦିଆଯାଇଛି । ‘ଚାଷୀ ପଞ୍ଜୀକରଣ ସଚେତନତା ରଥ’ ମାଧ୍ୟମରେ ପ୍ରତି ଗ୍ରାମର ଚାଷୀମାନଙ୍କୁ ସଚେତନ କରାଯିବ । ସମବାୟ ବିଭାଗ ପକ୍ଷରୁ ରାଜ୍ୟରେ ନୂଆକରି ବିଭିନ୍ନ ଜିଲ୍ଲା କେନ୍ଦ୍ର ସମବାୟ ବ୍ୟାଙ୍କ ଓ ସେମାନଙ୍କ ଅଧୀନରେ ଥିବା ପ୍ରାଥମିକ କୃଷି ସମବାୟ ସମିତି (ପ୍ୟାକ୍ସ)ଜରିଆରେ ବର୍ତ୍ତମାନ ସୁଦ୍ଧା ୧୪ହଜାର ୭୭୮ ଟି ଯୁଗ୍ମ ଦେୟ ଗୋଷ୍ଠୀ (ଜେଏଲ୍ଜି)କୁ ପଞ୍ଜୀକୃତ କରାଯାଇଥିବାବେଳେ ୧୦ ହଜାର ୭୨୨ଟି ଯୁଗ୍ମଦେୟ ଗୋଷ୍ଠୀଙ୍କୁ ଋଣ ପ୍ରଦାନ କରାଯାଇଛି । ‘ସମବାୟ ଆପଣଙ୍କ ଦ୍ୱାର’ରେ କାର୍ଯ୍ୟକ୍ରମ ଅନ୍ତର୍ଗତ ପ୍ରତ୍ୟେକ ପ୍ୟାକ୍ସ ଅନ୍ତତଃ ପକ୍ଷେ ୧୦ଟି ଜେଏଲ୍ଜିକୁ ଋଣ ଦେବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିର୍ଦ୍ଦେଶ ଦେଇଛନ୍ତି । ତେଣୁ ଯେଉଁ ସମବାୟ ସମିତିଗୁଡ଼ିକ ବର୍ତ୍ତମାନ ସୁଦ୍ଧା ଅନ୍ତତଃ ୧୦ଟି ଜେଏଲ୍ଜିକୁ ଋଣ ପ୍ରଦାନ କରିନାହାନ୍ତି ସେମାନଙ୍କ ତାଲିକା ଜିଲ୍ଲାରେ କାର୍ଯ୍ୟରତ ସମବାୟ ବିଭାଗର ଅଧିକାରୀମାନେ ତୁରନ୍ତ ସମବାୟ ବିଭାଗକୁ ଜଣାଇବା ପାଇଁ ମନ୍ତ୍ରୀ ଶ୍ରୀ ପାତ୍ର ନିର୍ଦ୍ଦେଶ ଦେଇଛନ୍ତି । ଏହି ଭିଡ଼ିଓ କନ୍ଫରେନ୍ସିଂ ସମୟରେ ଖାଦ୍ୟଯୋଗାଣ ଓ ଖାଉଟି କଲ୍ୟାଣ ବିଭାଗର ସଚିବ ବୀର୍ ବିକ୍ରମ ୟାଦବ ଓ ସମବାୟ ବିଭାଗର ସଚିବ ରଞ୍ଜନା ଚୋପ୍ରା ଉପସ୍ଥିତ ଥିଲେ ।
