ଭୁବନେଶ୍ୱର: ଯଦି କୌଣସି ସରକାରୀ ଜମି ଜବରଦଖଲରେ ରହିଥିବ ଓ ତା’ଉପରେ କାହାରି ଆପତ୍ତି ନଥିବ ତା’ହେଲେ ତାକୁ ନିୟମିତ କରାଯିବ ବୋଲି ରାଜସ୍ୱ ଓ ବିପର୍ଯ୍ୟୟ ପ୍ରଶମନ ମନ୍ତ୍ରୀ ମହେଶ୍ୱର ମହାନ୍ତି ସୂଚନା ଦେଇଛନ୍ତି ।
ଆଜି ଏକ ଉଚ୍ଚସ୍ତରୀୟ ବୈଠକ ପରେ ସାମ୍ବାଦିକମାନଙ୍କୁ ସୂଚନା ଦେଇ ଶ୍ରୀ ମହାନ୍ତି କହିଛନ୍ତି ଯେ, ଯଦି କୌଣସି ବ୍ୟକ୍ତି ସରକାରୀ ଜମିକୁ ଜବରଦଖଲ କରି ସେଠାରେ ଘର ନିର୍ମାଣ କରିଥିବେ ଓ ସମ୍ପୃକ୍ତ ଜାଗାକୁ ନେଇ କିଛି ଆପତ୍ତି ନଥିବ ତା’ହେଲେ ସେହି ଲୋକଙ୍କୁ ଉକ୍ତ ଜମିର ମାଲିକାନା ସତ୍ତ୍ୱ ପ୍ରଦାନ କରାଯିବ । ଏନେଇ ଖୁବଶୀଘ୍ର ବିଧାନସଭାରେ ଏକ ବିଲ୍ ଆସିବ ଓ ଏବେ ଚିଠା ବିଲ୍ ପ୍ରସ୍ତୁତ ହେଉଛି । ଅବଶ୍ୟ ଆଜିର ବୈଠକରେ ଏନେଇ କିଛି ଚୂଡ଼ାନ୍ତ ହୋଇନି ଓ ବୈଠକ ଅସମାପ୍ତ ରହିଛି ବୋଲି ମନ୍ତ୍ରୀ ଶ୍ରୀ ମହାନ୍ତି କହିଛନ୍ତି । ତେବେ ଜବରଦଖଲକାରୀଙ୍କ ପାଇଁ ସରକାରଙ୍କ ଏଭଳି ଗଳାବାଟକୁ ଉଭୟ କଂଗ୍ରେସ ଓ ବିଜେପି ଦୃଢ଼ ବିରୋଧ କରିଛନ୍ତି । ନିର୍ବାଚନକୁ ଦୃଷ୍ଟିରେ ରଖି ସରକାର ଏପରି ଗଳାବାଟ ବାହାର କରିଛନ୍ତି ବୋଲି ବିରୋଧୀ ଅଭିଯୋଗ କରିଛନ୍ତି ।
