ଲକ୍ଷ୍ନୌ: ଉତ୍ତରପ୍ରଦେଶ ବିଧାନସଭା ନିର୍ବାଚନ ପାଇଁ ଆମ ଆଦମୀ ପାର୍ଟି ତାର ରଣନୀତି ଆରମ୍ଭ କରିଦେଇଛି। ଉତ୍ତରପ୍ରଦେଶ ନିର୍ବାଚନ ପାଇଁ ପ୍ରାର୍ଥୀଙ୍କ ନାଁ ମଧ୍ୟ ଘୋଷଣା କରିସାରିଛି ଦଳ । ତେବେ ଏହାରି ମଧ୍ୟରେ ଉତ୍ତରପ୍ରଦେଶରେ ବିପୁଳ ବିଜୟର ଆଶା ରଖିଛି ଆମଆଦମୀ ପାର୍ଟି । ଫଳରେ ଦିଲ୍ଲୀର ଉପ ମୁଖ୍ୟମନ୍ତ୍ରୀ ମନୀଷ ସିସୋଦିଆ ଏକ ବଡ଼ ଘୋଷଣା କରିଛନ୍ତି। ଶ୍ରୀ ସିସୋଦିଆ କହିଛନ୍ତି କି ରାଜ୍ୟରେ ଆପ ସରକାର ଗଢିଲେ ସମସ୍ତ ଘରୋଇ ବ୍ୟବହାର ପାଇଁ ୩୦୦ ୟୁନିଟ ବିଜୁଳି ସମ୍ପୂର୍ଣ୍ଣ ଭାବେ ମାଗଣା ଦିଆଯିବ।
କେବଳ ଏତିକି ନୁହେଁ, ସିସୋଦିଆ ଲକ୍ଷ୍ନୌରେ ପହଞ୍ଚି କହିଛନ୍ତି କି ଉତ୍ତରପ୍ରଦେଶର ଲୋକମାନଙ୍କୁ ଏହି ମହଙ୍ଗା ବିଜୁଳିରୁ ମୁକ୍ତି ଦିଆଯିବାର ଆବଶ୍ୟକତା ରହିଛି। ସୂଚନା ଯୋଗ୍ୟ ଉତ୍ତରପ୍ରଦେଶ ବ୍ୟତୀତ ଯେଉଁ ରାଜ୍ୟରେ ବର୍ତ୍ତମାନ ନିର୍ବାଚନ ଅନୁଷ୍ଠିତ ହେବାକୁ ଯାଉଛି ସେହି ରାଜ୍ୟ ଗୁଡ଼ିକରେ ମାଗଣାରେ ବିଦ୍ୟୁତ ଯୋଗାଇ ଦେବା ପାଇଁ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ୱାଲ ଘୋଷଣା କରିଛନ୍ତି। ଏହା ମଧ୍ୟରେ ଗୁଜୁରାଟ, ପଞ୍ଜାବ, ଉତ୍ତରାଖଣ୍ଡ, ଗୋଆ ସାମିଲ ରହିଛି। ସେପଟେ ଆପର ଏହି ଘୋଷଣା ପରେ ଅନ୍ୟ ରାଜନୈତିକ ଦଳଗୁଡ଼ିକର ଚିନ୍ତା ବଢିବା ନେଇ ରାଜନୈତିକ ବିଶ୍ଲେଷକମାନେ ଅନୁମାନ କରିଛନ୍ତି।
ଏଠାରେ କହି ରଖୁଛୁ କି ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ ଆମ୍ ଆଦମୀ ପାର୍ଟି ୧୦୦ ସମ୍ଭାବ୍ୟ ପ୍ରାର୍ଥୀଙ୍କ ନାମ ଘୋଷଣା କରିଛି। ବୁଧବାର ଦିନ ଆପର ରାଜ୍ୟସଭା ସାଂସଦ ସଞ୍ଜୟ ସିଂ ଇନ୍-ଚାର୍ଜ ତାଲିକା ପ୍ରକାଶ କରିଛନ୍ତି। ସଞ୍ଜୟ ସିଂ କହିଛନ୍ତି ଯେ ନିର୍ବାଚନ ସମୟରେ ଏହି ଇନ୍-ଚାର୍ଜମାନେ ମଧ୍ୟ ପ୍ରାର୍ଥୀ ହୋଇପାରିବେ। କାହା ସହିତ କୌଣସି ମେଣ୍ଟ ନକରି ୟୁପିରେ ଏକାକୀ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଆମ୍ ଆଦମୀ ପାର୍ଟି ନିଷ୍ପତ୍ତି ନେଇଛି। ଆମ୍ ଆଦମୀ ପାର୍ଟି ୩୫ ପ୍ରତିଶତ ଆସନରେ ଅଧିକାଂଶ ପଛୁଆ ପ୍ରାର୍ଥୀଙ୍କୁ ସ୍ଥାନିତ କରିଛି, ଅନୁସୂଚିତ ଜାତିରୁ ୧୬ ଜଣ ପ୍ରାର୍ଥୀ ଘୋଷଣା ହୋଇଥିବାବେଳେ ୨୦ଟି ବ୍ରାହ୍ମଣ ଏବଂ ମୁସଲମାନ ପ୍ରାର୍ଥୀଙ୍କୁ ୫ଟି ଆସନରେ ଟିକେଟ ଦିଆଯାଇଛି।
