ଭୁବନେଶ୍ୱର(ଓଡ଼ିଶା ୱେୟାର) : ନିଜ ଅଧସ୍ତନ କର୍ମଚାରୀଙ୍କୁ ଜାତିଆଣ ଆକ୍ଷେପ କରିବା ଏବେ ରାଜ୍ୟ ସୂଚନା ଓ ଲୋକସମ୍ପର୍କ ବିଭାଗର ନିର୍ଦ୍ଦେଶକ ଇନ୍ଦ୍ରମଣି ତ୍ରିପାଠୀଙ୍କ ପାଇଁ ଅଡ଼ୁଆ ବଢ଼ାଇଛି। କର୍ମଚାରୀମାନେ ଗତକାଲି ଏନେଇ ନିର୍ଦ୍ଦେଶକଙ୍କୁ ଘେରାଉ କରିବା ପରେ ବିଭାଗୀୟ ସଚିବଙ୍କ ପାଖରେ ଲିଖିତ ଭାବେ ଅଭିଯୋଗ କରିଥିବା ଜଣାପଡ଼ିଛି। ଏପଟେ ବିଭାଗୀୟ ନିର୍ଦ୍ଦେଶକଙ୍କ ଏଭଳି ଆଚରଣ ଓ କର୍ମଚାରୀଙ୍କ ମଧ୍ୟରେ ବଢ଼ୁଥିବା ଅସନ୍ତୋଷ ଭିତରେ ଆଜି ଏହି ସମସ୍ତ ଘଟଣାର ଖୋଳତାଡ଼ ଆରମ୍ଭ ହୋଇଥିବାବେଳେ ଗୁଇନ୍ଦା ବିଭାଗ ଏନେଇ ଅଢ଼େଇ ମିନିଟର ଏକ ଭିଡିଓ ମଧ୍ୟ ତୃତୀୟ ମହଲାକୁ ପ୍ରଦାନ କରିଥିବା ଜଣାପଡ଼ିଛି।
ମିଳିଥିବା ସୂଚନା ଅନୁସାରେ, ସୂଚନା ଓ ଲୋକସମ୍ପର୍କ ବିଭାଗରେ କାର୍ଯ୍ୟରତ ଏଏସଓ ଗଣେଶ୍ୱର ଭୋଇଙ୍କୁ ବିଭାଗୀୟ ନିର୍ଦ୍ଦେଶକ ଶ୍ରୀ ତ୍ରିପାଠୀ ଜାତିଆଣ ଆକ୍ଷେପ କରିଥିବା ଅଭିଯୋଗ ହୋଇଛି। ଏ ସଂକ୍ରାନ୍ତରେ ଭାଇରାଲ ହୋଇଥିବା ଏକ ଭିଡିଓରେ କର୍ମଚାରୀମାନେ ଗତକାଲି ନିର୍ଦ୍ଦେଶକ ଶ୍ରୀ ତ୍ରିପାଠୀଙ୍କୁ ଅଫିସ ଘେରାଉ କରି ତାଙ୍କଠୁ କୈଫିୟତ ତଲବ କରିଥିଲେ। କେଉଁ କାରଣ ପାଇଁ ଏଭଳି ଜାତିଆଣ ଆକ୍ଷେପ କଲେ ବୋଲି ପଚାରିଥିଲେ। “ସେ ଭୋଇ ପିଲା କରୁନି, ସେ ଏସସି ପିଲାଟା, ମୂର୍ଖଟା କିଛି କରୁନି, ତାକୁ କାହିଁ ସେ ଦାୟିତ୍ୱରେ ରଖିଛନ୍ତି” ବୋଲି ଶ୍ରୀ ତ୍ରିପାଠୀ କହିଥିବା ନେଇ କର୍ମଚାରୀମାନେ ଅଭିଯୋଗ କରିଥିଲେ। ତେବେ ଏଭଳି ଜାତିଆଣ ଆକ୍ଷେପକୁ ନିର୍ଦ୍ଦେଶକ ଶ୍ରୀ ତ୍ରିପାଠୀ ସିଧାସଳଖ ଖଣ୍ଡନ କରିିବା ସହ ତାଳିପକା ଉଦ୍ୟମ ଆରମ୍ଭ କରିଥିଲେ। ମାତ୍ର ଏଥିରେ କର୍ମଚାରୀମାନେ ସନ୍ତୁଷ୍ଟ ନହୋଇ ବିଭାଗୀୟ ସଚିବଙ୍କୁ ଲିଖିତ ଭାବେ ଅଭିଯୋଗ କରିବାକୁ ନିଷ୍ପତ୍ତି ନେଇଥିଲେ। ସେ କୋରାପୁଟ ଗସ୍ତରୁ ଫେରିବା ପରେ କର୍ମଚାରୀମାନେ ତାଙ୍କୁ ଏହି ଲିଖିତ ଅଭିଯୋଗ ଦେବେ ବୋଲି ଜଣାପଡ଼ିଛି ।
କର୍ମଚାରୀମାନଙ୍କ ମଧ୍ୟରେ ଏଭଳି ଅସନ୍ତୋଷ ଓ ଉତ୍ତେଜନା ସମ୍ପର୍କରେ ଗୁଇନ୍ଦା ବିଭାଗ ଆଜି ତୃତୀୟ ମହଲାକୁ ଅବଗତ କରିଥିବାବେଳେ ଏହି ଘଟଣାକୁ ରଫାଦଫା ନିମନ୍ତେ ଗୋଟିଏ ଗୋଷ୍ଠୀ ଜୋରଦାର ଉଦ୍ୟମ କରୁଥିବା ସୂଚନା ମିଳିଛି। ମାତ୍ର ନିର୍ଦ୍ଦେଶକ ଶ୍ରୀ ତ୍ରିପାଠୀ ଏଭଳି ଆଚରଣ ପାଇଁ କ୍ଷମା ନମାଗିଲେ ଆଗାମୀ ଦିନରେ ଅନୁସୂଚିତ ଜାତି ଓ ଜନଜାତି ବର୍ଗର କର୍ମଚାରୀମାନଙ୍କୁ ନେଇ ଜୋରଦାର ଆନ୍ଦୋଳନ କରାଯିବ ବୋଲି ଅନ୍ୟ ଏକ ଗୋଷ୍ଠୀ ଚେତାବନୀ ଦେଇଛି।
