ଭୁବନେଶ୍ୱର : ବିଜେଡି ରାଜ୍ୟ ସମ୍ପାଦକ ତଥା ରାଜ୍ୟ ଯୋଜନା ବୋର୍ଡ ସଦସ୍ୟ ଈଶ୍ୱର ଚନ୍ଦ୍ର ପାଣିଗ୍ରାହୀଙ୍କୁ କୋରାପୁଟ ଜିଲ୍ଲା ବିଜେଡି ସଭାପତି ଭାବେ ନିଯୁକ୍ତି ମିଳିଛି । ଦଳର ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଶ୍ରୀ ପାଣିଗ୍ରାହୀଙ୍କୁ ଏହି ନୂଆ ଦାୟିତ୍ୱ ଦେଇଛନ୍ତି । ଏହା ସହିତ କୋରାପୁଟ ଜିଲ୍ଲା ବିଜେଡି କାର୍ଯ୍ୟକାରୀ ସଭାପତି ଭାବେ ସୁକାନ୍ତି ବାଗଡୋରିଆଙ୍କୁ ମଧ୍ୟ ନିଯୁକ୍ତି ମିଳିଛି । ଦଳର ରାଜ୍ୟ ସମ୍ପାଦକ ବିଜୟ ନାୟକ ଆଜି ଏକ ପ୍ରେସ୍ ରିଲିଜ୍ ମାଧ୍ୟମରେ ଏହି ସୂଚନା ଦେଇଛନ୍ତି । ତେବେ ଦୀର୍ଘଦିନ ଧରି ଅଣଦେଖା ହୋଇ ରହିଥିବା ଶ୍ରୀ ପାଣିଗ୍ରାହୀଙ୍କ ପ୍ରତି ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଏଭଳି ମେହରବାନକୁ ନେଇ ଦଳରେ ଚର୍ଚ୍ଚା । ବିଜେଡିରୁ ଇସ୍ତଫା ଦେଇଥିବା ବରିଷ୍ଠ ନେତା ବୈଜୟନ୍ତ ପଣ୍ଡାଙ୍କ ଘନିଷ୍ଠ ସହଯୋଗୀ ଭାବେ ଶ୍ରୀ ପାଣିଗ୍ରାହୀ ଜଣାଶୁଣା । ଜୟରାମ ପାଙ୍ଗୀଙ୍କୁ ବିଜେଡି ନିଲମ୍ବିତ କରିବା ଓ ସେ ଦଳ ଛାଡ଼ି ବିଜେପିରେ ଯୋଗ ଦେବା ପରେ ଶ୍ରୀ ପାଣିଗ୍ରାହୀଙ୍କୁ କୋରାପୁଟ ଜିଲ୍ଲା ସଂଗଠନରେ ଅପେକ୍ଷାକୃତ ଗୁରୁତ୍ୱ ମିଳିଛି । ବୈଜୟନ୍ତଙ୍କ କ୍ୟାମ୍ପରୁ ଶ୍ରୀ ପାଣିଗ୍ରାହୀଙ୍କୁ ଦୂରେଇ ରଖିବା ପାଇଁ ତାଙ୍କୁ ପ୍ରଥମେ ଦଳର ରାଜ୍ୟ ସମ୍ପାଦକ ଓ ରାଜ୍ୟ ଯୋଜନା ବୋର୍ଡର ସଦସ୍ୟ କରାଯାଇଥିଲା । ଏବେ କୋରାପୁଟ ଜିଲ୍ଲା ବିଜେଡି ସଭାପତି ଦାୟିତ୍ୱ ଦିଆଯାଇଛି । କୋରାପୁଟ ସାଂସଦ ଝିନ୍ନ ହିକକା କୋରାପୁଟ ଜିଲ୍ଲା ବିଜେଡି ସଭାପତି ଭାବେ କାର୍ଯ୍ୟ କରୁଥିଲେ । କିନ୍ତୁ ସେ ବିଜେଡି ଅନୁସୂଚିତ ଜନଜାତି ସାମ୍ମୁଖ୍ୟର ଉପସଭାପତି ହେବା ପରେ ଶ୍ରୀ ପାଣିଗ୍ରାହୀଙ୍କୁ ଏହି ନୂଆ ଦାୟିତ୍ୱ ମିଳିଛି । କୋରାପୁଟ ଜିଲ୍ଲା ସଂଗଠନ ଉପରେ ଶ୍ରୀ ପାଣିଗ୍ରାହୀଙ୍କର ମଧ୍ୟ ବେଶ୍ ପ୍ରଭାବ ରହିଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆସନ୍ତା ୨୬ତାରିଖରେ ଗୁରୁପ୍ରିୟା ସେତୁ ଉଦ୍ଘାଟନ କରିବା ପାଇଁ ମାଲକାନଗିରି ଜିଲ୍ଲା ଗସ୍ତରେ ଯାଉଥିବାରୁ ତା’ ପୂର୍ବରୁ ଶ୍ରୀ ପାଣିଗ୍ରାହୀଙ୍କୁ ନିଯୁକ୍ତି ଦେଇ ବିଜେଡି ଅବିଭକ୍ତ କୋରାପୁଟ ଜିଲ୍ଲାରେ ନିଜର ଶକ୍ତି ପ୍ରଦର୍ଶନ କରିବାକୁ ଚାହୁଁଛି । ସୂଚନାଯୋଗ୍ୟ ଚଳିତ ମାସ ଦ୍ୱିତୀୟ ସପ୍ତାହରେ ମାଲକାନଗିରିର ବଙ୍ଗୀୟ ଭୋଟ୍କୁ ଆକର୍ଷିତ କରିବା ପାଇଁ ଦୀର୍ଘଦିନ ଧରି ଅଣଦେଖା ହୋଇ ରହିଥିବା ପୂର୍ବତନ ମନ୍ତ୍ରୀ ଅରବିନ୍ଦ ଢାଲିଙ୍କୁ ରାଜ୍ୟ ବିହନ ନିଗମର ଅଧ୍ୟକ୍ଷ ଭାବେ ନିଯୁକ୍ତି ଦିଆଯାଇଥିଲା ।
