ଭୁବନେଶ୍ୱର(ଓଡ଼ିଶା ୱେୟାର): କୃଷିଋଣ ଛାଡ଼ ଓ ଏମଏସପି ଉପରେ ବୋନସ ପ୍ରଦାନ ପ୍ରସଙ୍ଗରେ ବିରୋଧୀ କଂଗ୍ରେସ ଓ ବିଜେପିର ଦାବିକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଖାରଜ କରିବା ସହ ଦେଶ ଓ ରାଜ୍ୟର ଅର୍ଥନୀତିକୁ ଦେବାଳିଆ ଆଡ଼କୁ ଠେଲି ଦେବାକୁ ଉଦ୍ୟମ ଚାଲିଛି ବୋଲି କହିଛନ୍ତି ।
ଆଜି ସାମ୍ବାଦିକଙ୍କ ପ୍ରଶ୍ନର ଉତର ଦେଇ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କହିଛନ୍ତି ଯେ,କୃଷିଋଣ ଛାଡ଼ ଓ ବୋନସ ପରିବର୍ତେ ଚାଷୀଙ୍କୁ ଦୀର୍ଘକାଳୀନ ଭିତିରେ ଆର୍ଥିକ ସ୍ୱାବଲମ୍ବୀ କରିବା ପାଇଁ ସରକାର ଚାହାଁନ୍ତି । କୃଷିଋଣ ଛାଡ଼ ଘୋଷଣା କରି କଂଗ୍ରେସ ଏବେ ଦେଶର ଅର୍ଥନୀତି ଓ ରାଜ୍ୟର ଅର୍ଥନୀତିକୁ ଦେବାଳିଆ ଆଡ଼କୁ ଠେଲି ଦେଉଛି ।କୃଷିଋଣ ଛାଡ ଅପେକ୍ଷା କାଳିଆ ଯୋଜନାରେ ଅଧିକ ଲାଭ ଦାୟକ ବ୍ୟବସ୍ଥା ଚାଷୀଙ୍କ ପାଇଁ କରାଯାଇଛି । ଯେଉଁଥିରେ ୯୨ ପ୍ରତିଶତ ବିଭିନ୍ନ ଶ୍ରେଣୀର ଚାଷୀ ଉପକୃତ ହେବେ । କୃଷିଋଣ ଛାଡରେ ନିଦ୍ଦିଷ୍ଟ ଚାଷୀ ସୁବିଧା ପାଇବେ । ଭାଗ ଚାଷୀମାନେ ଏଥିରେ ଉପକୃତ ହୋଇପାରିବେ ନାହିଁ । ରାଜ୍ୟର ୩୨ ଲକ୍ଷ ଚାଷୀଙ୍କ ମଧ୍ୟରୁ ୨୦ ଲକ୍ଷ ଚାଷୀ ଋଣ ନେଇଥାନ୍ତି । ଏଥିରୁ ୬୦ ପ୍ରତିଶତ ଋଣ ପରିଶୋଧ କରିଥାନ୍ତି । ଏଣୁ ଋଣଛାଡ ଦ୍ୱାରା ସବୁ ଚାଷୀ ଉପକୃତ ହେବେ ନାହିଁ । ସେଥିପାଇଁ ସମସ୍ତେ ଯେପରି ସୁବାଧା ପାଇବେ କାଳିଆ ଯୋଜନାରେ ବ୍ୟବସ୍ତା କରାଯାଇଛି । କଂଗ୍ରେସ ଛାଡ କରିବା ନେଇ ଘୋଷଣା କରିଥିବା ସଂପର୍କରେ କହିଛନ୍ତି ଅତୀତରେ କଂଗ୍ରେସ ଶାସନରେ ରାଜ୍ୟର ଆର୍ଥିକ ସ୍ଥିତି କିପରି ଶୋଚନୀୟ ହୋଇପଡିଥିଲା ତାହା ସମସ୍ତେ ଜାଣନ୍ତି । ୧୯୯୫ରେ ଶାସନକୁ ଆସି ୧୯୯୯ ମସିହାରେ ଛାଡିଲା ବେଳେ ରାଜ୍ୟ ଟ୍ରେଜେରୀକୁ ଦେବାଳିଆ କରିଥିଲେ । ଦରମା ଦେବାକୁ ପଇସା ନଥିଲା । କୌଣସି ଭିତ୍ତିଭୂମି କାର୍ୟ୍ୟକ୍ରମ ହୋଇପାରୁନଥିଲା । କଭଳି ସ୍ଥିତିରେ ରାଜ୍ୟ ପହଁଞ୍ଚିଥିଲା ତାହା ସମସ୍ତଙ୍କୁ ଜଣା । ସେହିପରି ବିଜେପି ଯେଉଁ ଋଣଛାଡ କରିବ ବୋଲି କହୁଛି ୨୦୧୪ ନିର୍ବାଚନରେ ଓଡିଶାକୁ ସ୍ୱତନ୍ତ୍ର ପାହ୍ୟା ରାଜ୍ୟର ମାନ୍ୟତା ଦେବାକୁ ପ୍ରତିଶୃତି ଦେଇଥିଲା । ଏହାର ଅବସ୍ଥା ଏବେ କଣ ତାହା କାହାକୁ ଅଛପା ନାହିଁ । ଧାନର ଏମଏସପି ବୃଦ୍ଧି ଦାୟିତ୍ୱ କେନ୍ଦ୍ରର ବୋଲି କହି ନବୀନ ଏହି ପ୍ରସଙ୍ଗକୁ ଏଡ଼ାଇ ଯାଇଥିଲେ ।
