ଭୁବନେଶ୍ୱର(ଓଡ଼ିଶା ୱେୟାର): ଓଡ଼ିଶାବାସୀଙ୍କ ଆୟୁଷ ଅନ୍ୟ କେତେକ ପ୍ରମୁଖ ରାଜ୍ୟର ବାସିନ୍ଦାଙ୍କ ତୁଳନାରେ ଅଧିକ। ଏପରିକି ୨୦୧୦-୧୪ ମସିହା ମଧ୍ୟରେ ଓଡ଼ିଶାବାସୀଙ୍କ ହାରାହାରି ଆୟୁଷରେ ଏକବର୍ଷ ବୃଦ୍ଧି ହୋଇଛି। ମଧ୍ୟପ୍ରଦେଶ,ଉତ୍ତରପ୍ରଦେଶ, ଝାଡ଼ଖଣ୍ଡ, ଛତିଶଗଡ଼ ଓ ଆସାମ ରାଜ୍ୟର ବାସିନ୍ଦାଙ୍କ ତୁଳରେ ଓଡ଼ିଶାର ଲୋକମାନେ ଅଧିକ ଦୀର୍ଘାୟୁ ଓ ସୁସ୍ଥ ବୋଲି ଓଡ଼ିଶା ଅର୍ଥନୀତିକ ସର୍ଭେ ରିପୋର୍ଟ ୨୦୧୮-୧୯ରେ ଉଲ୍ଲେଖ ରହିଛି।
ଅର୍ଥନୀତିକ ସର୍ଭେ ରିପୋର୍ଟ ଅନୁସାରେ, ଓଡ଼ିଶାର ଲୋକଙ୍କ ହାରାହାରି ମୁଣ୍ଡପିଛା ଆୟରେ ଆଖିଦୃଶିଆ ବୃଦ୍ଧି ପାଇଛି । ୨୦୧୭-୧୮ରେ ମୁଣ୍ଡପିଛା ହାରାହାରି ଆୟ ୮୩,୭୯୬ ଟଙ୍କା ଥିବାବେଳେ ୨୦୧୮-୧୯ରେ ମୁଣ୍ଡପିଛା ଆୟ(ଅଗ୍ରୀମ ଆକଳନ) ୯୨,୬୯୧ ଟଙ୍କାକୁ ବୃଦ୍ଧି ପାଇଛି । ଓଡ଼ିଶାବାସୀଙ୍କ ହାରାହାରି ମୁଣ୍ଡପିଛା ଆୟ ବାର୍ଷିକ ୯.୮% ବୃଦ୍ଧି ପାଇଛି। ଯାହାକି ରାଜ୍ୟବାସୀଙ୍କୁ ଏକ ସୁସ୍ଥ ଓ ସଭ୍ୟ ଜୀବନ ଅତିବାହିତ କରିବା ପାଇଁ ପ୍ରୋତ୍ସାହିତ କରିଛି । ସ୍ୱାସ୍ଥ୍ୟ ସେବା କ୍ଷେତ୍ରର ସଂସ୍କାର ଉପରେ ଗୁରୁତ୍ୱ ଦେଇ ସ୍ଥାୟୀ ବିକାଶ ଲକ୍ଷ୍ୟକୁ ହାସଲ ନିମନ୍ତେ ଓଡ଼ିଶା ରାଜ୍ୟବାସୀଙ୍କୁ ଅପେକ୍ଷାକୃତ ସୁସ୍ଥ ଜୀବନଯାପନ ପାଇଁ ପ୍ରେରିତ କରିପାରିଛି ବୋଲି ଏହି ସର୍ଭେ ରିପୋର୍ଟରେ କୁହାଯାଇଛି ।
ରିପୋର୍ଟ ଅନୁସାରେ ୨୦୦୯-୧୩ ମସିହା ତୁଳନାରେ ୨୦୧୦-୧୪ ମସିହା ମଧ୍ୟରେ ଓଡ଼ିଶାର ଲୋକଙ୍କ ହାରାହାରି ଆୟୁଷ ୬୪.୮ବର୍ଷରୁ ୬୫.୮ବର୍ଷକୁ ବୃଦ୍ଧି ପାଇଛି । ରାଜ୍ୟରେ ମହିଳାଙ୍କ ହାରାହାରି ଆୟୁଷ ମଧ୍ୟ ପୁରୁଷଙ୍କ ତୁଳନାରେ ଅଧିକ । ଓଡ଼ିଶାର ଲୋକଙ୍କ ହାରାହାରି ଆୟୁଷ ମଧ୍ୟପ୍ରଦେଶ, ୟୁପି, ଝାଡ଼ଖଣ୍ଡ, ଛତିଶଗଡ଼ ଓ ଆସାମବାସୀଙ୍କ ତୁଳନାରେ ଅଧିକ । ତେବେ କେରଳବାସୀଙ୍କ ହାରାହାରି ଆୟୁଷ ୭୪.୯ବର୍ଷ ଥିବାବେଳେ ଦିଲ୍ଲୀବାସୀଙ୍କ ୭୩.୨ବର୍ଷ, ଜାମ୍ମୁ ଓ କଶ୍ମୀରବାସୀଙ୍କ ୭୨.୬ବର୍ଷ, ଉତ୍ତରାଖଣ୍ଡବାସୀଙ୍କ ୭୧.୭ବର୍ଷ ରହିଥିବାରୁ ଓଡ଼ିଶାବାସୀଙ୍କ ହାରାହାରି ଆୟୁଷ ବୃଦ୍ଧି ଦିଗରେ ସରକାରଙ୍କ ଅଧିକ ପଦକ୍ଷେପ ନେବାର ସୁଯୋଗ ରହିଛି ବୋଲି ଅର୍ଥନୀତିକ ସର୍ଭେ ରିପୋର୍ଟରେ କୁହାଯାଇଛି । ଗତକିଛି ବର୍ଷ ମଧ୍ୟରେ ରାଜ୍ୟର ଲୋକଙ୍କ ଖାଦ୍ୟ ଓ ପୃଷ୍ଟିକର ଆହାରରେ ଉଲ୍ଲେଖନୀୟ ସୁଧାର ହୋଇଥିବାବେଳେ ଅନ୍ୟଦିଗ ପ୍ରତି ଦୃଷ୍ଟି ଦେବାର ଆବଶ୍ୟକତା ରହିଛି ।
