ଭୁବନେଶ୍ୱର(ଓଡ଼ିଶା ୱେୟାର): ବିଗତ ୫ବର୍ଷ ମଧ୍ୟରେ ରାଜ୍ୟରେ ୫୬୩୨ଟି ସ୍କୁଲକୁ ବନ୍ଦ କରିଦିଆଯାଇଛି ଅବା ପାଖ ସ୍କୁଲରେ ମିଶ୍ରଣ କରାଯାଇଛି । ବିଜେଡି ସରକାର ଅମଳରେ ବନ୍ଦ ହୋଇଥିବା ସ୍କୁଲକୁ ପୁନଃ ଖୋଲାଯିବ ବୋଲି ଦାବି କରୁଥବା ବିଜେପି କିନ୍ତୁ ନିଜର ସରକାର ରାଜ୍ୟରେ କ୍ଷମତାସୀନ ହେବାପରେ ମଧ୍ୟ ଗୋଟିଏ ବି ସ୍କୁଲ ଖୋଲିବାରେ ସକ୍ଷମ ହୋଇପାରିନି । ଏଭଳି ଚାଂଚଲ୍ୟକର ତଥ୍ୟ ବିଧାନସଭାରେ ଉପସ୍ଥାପନ କରିଛନ୍ତି ଖୋଦ୍ ରାଜ୍ୟ ସ୍କୁଲ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ।
ବିଧାୟିକା ସୋଫିଆ ଫିର୍ଦ୍ଦୋଷଙ୍କ ଏକ ପ୍ରଶ୍ନର ଲିଖିତ ଉତ୍ତର ଦେଇ ମନ୍ତ୍ରୀ ଶ୍ରୀ ଗଣ୍ଡ କହିଛନ୍ତି ଯେ, ବିଗତ ୫ବର୍ଷ ମଧ୍ୟରେ ରାଜ୍ୟରେ ୫୬୩୨ଟି ସ୍କୁଲକୁ ବନ୍ଦ କରି ମିଶ୍ରଣ କରିଦିଆଯାଇଛି । ୨୦୨୪ ଜୁନ୍ ମାସ ପରଠୁ ରାଜ୍ୟରେ କୌଣସି ବନ୍ଦ ସ୍କୁଲକୁ ପୁନଃ ଖୋଲା ଯାଇନାହିଁ । ଯଦି ବନ୍ଦ ଥିବା ସ୍କୁଲକୁ ପୁନଃ ଖୋଲିବା ପାଇଁ କୌଣସି ନିର୍ଦ୍ଦିଷ୍ଟ ଅଭିଯୋଗ ଆସିବ ତେବେ ତାହା ଜିଲ୍ଲା ଅଭିଯୋଗ ସମାଧାନ କମିଟି ଦ୍ୱାରା ଯାଂଚ ହେବା ପରେ ରାଜ୍ୟ ସରକାରଙ୍କ ଅଭିଯୋଗ ସମାଧାନ କମିଟିକୁ ଆସିବ । ଏହି ରାଜ୍ୟସ୍ତରୀୟ କମିଟିର ସୁପାରିଶ ଆଧାରରେ ସରକାର ବନ୍ଦ ଥିବା ସ୍କୁଲକୁ ପୁନଃଖୋଲିବା ପାଇଁ ନିଷ୍ପତ୍ତି ନେବେ । ପୁରୀ ଜିଲ୍ଲାରେ କୌଣସି ଗୋଟିଏ ବି ସ୍କୁଲ ବନ୍ଦ କିମ୍ବା ମିଶ୍ରଣ ହୋଇନଥିବାବେଳେ ଅନ୍ୟ ସମସ୍ତ ଜିଲ୍ଲାରେ ଏହି ସ୍କୁଲଗୁଡ଼ିକ ରହିଥିବା ମନ୍ତ୍ରୀ ସୂଚନା ଦେଇଛନ୍ତି ।
