ଭୁବନେଶ୍ୱର(ଓଡ଼ିଶା ୱେୟାର): ଅବସରପ୍ରାପ୍ତ ମୁଖ୍ୟ ସଚିବ ପ୍ରଦୀପ କୁମାର ଜେନା ଓଡ଼ିଶା ବିଦ୍ୟୁତ ନିୟାମକ ଆୟୋଗ(ଓଇଆରସି)ର ନୂଆ ଅଧ୍ୟକ୍ଷ ହେବେ । ରାଜ୍ୟର କ୍ଷମତାସୀନ ବିଜେପି ସରକାର ଶ୍ରୀ ଜେନାଙ୍କୁ ଏହି ପଦବୀରେ ଅବସ୍ଥାପିତ କରିବ ବୋଲି ନିର୍ଭରଯୋଗ୍ୟ ସୂତ୍ରରୁ ସୂଚନା ମିଳିଛି । ଦୀର୍ଘଦିନ ଧରି ଓଇଆରସି ଅଧ୍ୟକ୍ଷ ପଦବୀ ଖାଲି ପଡ଼ିଛି ।
ସୂଚନା ଅନୁସାରେ, ରାଜ୍ୟ ସରକାର ଦୀର୍ଘଦିନ ଧରି ଖାଲି ପଡ଼ିଥିବା ଓଇଆରସି ଅଧ୍ୟକ୍ଷ ପଦବୀ ପୂରଣ ନିମନ୍ତେ ୨୦୨୫ ଜାନୁୟାରୀ ୨୪ତାରିଖରେ ବିଜ୍ଞାପନ ଦେଇଥିଲେ । ଏହି ପଦବୀ ପାଇଁ ନିର୍ଦ୍ଧାରିତ ଫର୍ମାଟରେ ଆବେଦନ କରିବାର ଶେଷ ତାରିଖ ଫେବୃୟାରୀ ୨୪ ରହିଥିଲା । ରାଜ୍ୟର ବହୁ ଅବସରପ୍ରାପ୍ତ ଆଇଏଏସ୍ ଅଫିସରମାନେ ଏହି ଅଧ୍ୟକ୍ଷ ପଦବୀ ପାଇଁ ଆବେଦନ କରିଥିବାବେଳେ ଦୌଡ଼ରେ ଦୁଇ ଆଇଏଏସ୍ ପ୍ରଦୀପ କୁମାର ଜେନା ଓ ପ୍ରଦୀପ୍ତ କୁମାର ମହାପାତ୍ର ରହିଛନ୍ତି ।
ତେବେ ଶ୍ରୀ ଜେନାଙ୍କୁ ଏହି ପଦବୀରେ ଅବସ୍ଥାପିତ କରାଇବା ପାଇଁ ବିଜେପିର ଏକ ପ୍ରଭାବଶାଳୀ ଗୋଷ୍ଠୀ ଲବି ଚଳାଇଛି । ଚଳିତମାସ ଶେଷ ସପ୍ତାହ ସୁଦ୍ଧା ଏହି ଅଧ୍ୟକ୍ଷ ପଦବୀ ପାଇଁ ନାଁ ଘୋଷଣା ହେବାର ସମ୍ଭାବନା ରହିଛି । ଯଦି ସବୁକିଛି ଠିକଠାକ୍ ରୁହେ, ତେବେ ଶ୍ରୀ ଜେନା ପରବର୍ତ୍ତୀ ଓଇଆରସି ଅଧ୍ୟକ୍ଷ ହେବା ପ୍ରାୟତଃ ଏକରକମ ଚୂଡ଼ାନ୍ତ ବୋଲି କୁହାଯାଉଛି ।
ସୂଚନାଯୋଗ୍ୟ, ଅବସରପ୍ରାପ୍ତ ମୁଖ୍ୟ ସଚିବ ସୁରେଶ ଚନ୍ଦ୍ର ମହାପାତ୍ର ୨୦୨୩ ନଭେମ୍ବର ମାସରେ ଓଇଆରସି ଅଧ୍ୟକ୍ଷ ପଦରୁ ଅଚାନକ ଇସ୍ତଫା ଦେଇଥିଲେ । ସେ ଏହି ପଦବୀରେ ମାତ୍ର ୮ମାସ ରହି ଇସ୍ତଫା ଦେବା ପରେ ତତକାଳୀନ ବିଜେଡି ସରକାରରେ ମୁଖ୍ୟମନ୍ତ୍ରୀଙ୍କ ମୁଖ୍ୟ ଉପଦେଷ୍ଟାଭାବେ ଯୋଗ ଦେଇଥିଲେ । କିନ୍ତୁ ରାଜ୍ୟରେ ବିଜେପି ସରକାର କ୍ଷମତାକୁ ଆସିବା ପରେ ଶ୍ରୀ ମହାପାତ୍ର ପୁଣିଥରେ ଏହି ପଦବୀରେ ଥଇଥାନ ହେବା ଆଶାରେ ପୂର୍ଣ୍ଣଚ୍ଛେଦ ପଡ଼ିଛି ।
